ەكسپو-نى باسقارۋعا ەسىموۆ كەلگەلى نە وزگەردى؟ كەمشىلىكتەر تۇزەلدى مە؟ كورمەنى وتكىزۋگە ساقاداي سايمىز با؟ كۇنى كەشە شەتەلدىك باسىلىمدارعا سۇحبات بەرگەن «استانا ەكسپو-2017» كورمەسىنىڭ باسقارما ءتوراعاسى وسى تۋراسىندا ايتقان ەكەن. اعىنان جارىلىپتى. قانداي كەدەرگىلەرمەن بەتپە-بەت كەلگەنىن ايتىپ بەرىپتى. سونىمەن ەسىموۆ نە دەيدى؟
ەسىمدە
ءيا، وسىدان ەكى جىل بۇرىن تامىزدىڭ ورتاسىندا نازاربايەۆتىڭ مەنى ەكسپو-نىڭ ءتوراعاسى ەتىپ تاعايىنداعان ءساتىن ءالى ۇمىتقان جوقپىن. بىردەن قۇرىلىس الاڭىنا تارتتىم. نىسانداردى ارالادىم. العاش كورگەن نىسان س1 پاۆيلونى ەدى. BI-Group كومپانياسى تۇرعىزىپ جاتقان. شىنىمدى ايتايىن، پاۆيلون دەگەنمەن بەتون قابىرعادان باسقا تۇگى جوق-تۇعىن. باسقا ەشتەڭە دە كورگەم جوق. مويىندايىن، ۇنجىرعام ءتۇسىپ كەتتى. جۇمىستىڭ العا باسىپ كەتەرىنە دە العاشقىدا سەنگەم جوق. كورمەنىڭ قۇرىلىسى توقتاپ تۇردى دەسەم ارتىق ايتپاسپىن.
سودان نە كەرەك...
ءيا، كوز قورقاق، قول باتىر. الدا اۋىر جۇمىس كۇتىپ تۇردى. ءبىراق، جۇمىستىڭ باسىن قۇرىلىستان باستاعان جوقپىن. الدىمەن ەكسپو-داعى ءتۇرلى دەپارتامەنتتەردىڭ ءتارتىبىن تەزگە ءتۇسىرۋ كەرەك بولدى. بىلىق كوپ ەدى...
دەپارتامەنتتەر ءبىرىنىڭ جۇمىسىن ءبىرى اتقاراتىن. تازا الاساپىران ەدى. كىمنىڭ نە قويىپ، نە اتقارىپ جاتقانىن اڭعارىپ بولمايسىڭ. ۋاقىت بولسا از قالعان.
ءيا، الدىمەن دەپارتامەنتتەردىڭ جۇمىسىن ءتارتىبىن رەتكە كەلتىردىم. ءبىر اي ءوتتى. مىنە، سول كەزدە عانا كورمەنى ءوز دەڭگەيىندە وتكىزەمىز دەگەن ءۇمىت پايدا بولا باستادى.
راسىن ايتايىن، العا جۇرۋدەن باسقا امال جوق ەدى. ەلباسىنىڭ ءوزى باقىلاپ وتىر. ودان بۇرىن سىنشىلار كوپ بولدى.
«ەسىموۆ ۇلگەرمەيدى. ەسىموۆ ەكسپو-نىڭ قۇرىلىسىن باقىلاي المايدى. كورمەنىڭ نىساندارىن ءوز ۋاقىتىندا وتكىزە الماي، قور بولادى، كوردە تۇرىڭىزدار» دەگەن نەبىر پىكىردى ەستىدىم.
ولاردىڭ اۋىزدارىنا قۇم قۇيىلدى. ۇلگەردىك. كۇدىكتەنگەندەردىڭ ءۇمىتى اقتالمادى.
ەكسپو-دان كەيىن
«كورمەدەن كەيىن مۇنداعى پاۆيلوندار بوس قالماي ما؟ قالاي پايدالانىلاتىن، قانداي قاجەتكە جارايتىن بولادى؟» دەگەن ساۋالداردى كوپ ەستيمىن. سوعان ناقتى جاۋاپ بەرەتىن كەز كەلدى.
كورمە اياقتالعاسىن مۇنداعى وبەكتىلەردىڭ ەشقايسىسى دا جۇمىسىن توقتاتپايدى. اتاپ ايتسام، سفەرا پاۆيلونى بولاشاق مۇراجايى دەگەن اتقا يە بولىپ وسى باعىتتا جۇمىس ىستەيدى.
سەبەبى، مۇندا «بولاشاق ەنەرگياسى» تاقىرىبىنىڭ ءتۇرلى جوبالارى جيناقتالعان. جوق، راس. ونىڭ ىشىندە عارىش، كۇن، جەل، سۋ ءتىپتى كينەتالىق ەنەرگيا جوبالارى دا بار. سايىپ كەلگەندە، بۇل مۇرا. كورمەنىڭ مۇراسى. ەرتەڭ بالالارىمىزعا كورسەتەمىز. باسقا دا پاۆيلوندار بوس قالمايدى.
بۇدان سىرت
ارينە، بارلىق پاۆيلونداردى مۇراجايعا اينالدىرماسىمىز بەلگىلى. ايتالىق، حالىقارالىق پاۆيلونداردىڭ بىرەۋىندە كورمە اياقتالعاننان كەيىن «استانا» حالىقارالىق قارجىلىق ورتالىعى ورنالاساتىن بولادى. وعان قوسا بۇۇ-نىڭ جاسىل ەنەرگەتيكا جوباسى اياسىندا پاۆيلونداردىڭ بىرىنەن حالىقارالىق جاسىل ەنەرگەتيكا ورتالىعىن جاسايمىز. مۇنى بۇۇ اسسامبلەياسىنىڭ مىنبەرىندە سويلەگەن سوزىندە مەملەكەت باسشىسى دا ايتقان بولاتىن. ايتپاقشى، ءىت – ستارتاپتار دا جاسالىپ جاتىر. جامان ەمەس.
قورىتا ايتسام، بۇل پاۆيلوندار بوس قالمايدى. قاڭىراپ قالمايدى. قورىقپاڭىزدار.
سىزدەرگە مىنانى ايتايىن: ولاردى ءوز قاجەتىنە پايدالانۋ تۋرالى ءتيىمدى ۇسىنىستار قازىردەن ءتۇسىپ جاتىر.
كوررۋپسيا قۇرتتى
مويىندايمىن. كورمەگە قاتىستى جەمقورلىق داۋى ەكسپو-نىڭ بەدەلىنە اجەپتاۋىر نۇقسان كەلتىردى. قاسىقتاپ جيناعان ابىرويىمىزدان ءبىر كۇندە ايىرىلا جازدادىق. ايىرىلدىق تا...
بىلسەڭىز، مەن وسى قىزمەتكە تاعايىندالعان سالا الەۋمەتتىك جەلىدەگى پىكىرلەردى شولىپ شىقتىم. پىكىرلەردىڭ 80 پايىزى نەگاتيۆتى بولدى. ءقازىر بۇل نەگاتيۆتى ءسال دە بولسا ازايتقان بولدىق. ارينە، شالىعى ءالى دە بار. بۇدان ارىلۋ قيىن. سۇيەككە تۇسكەن تاڭبا سياقتى.
كۇنى كەشەYouTubeء-تى شۋلاتقان ۆيدەونى كورگەن بولارسىزدار. كورمەگە قۇرىلىس ماتەريالدارىن اكەلگەن جۇرگىزۋشى ءوزىنىڭ ۇيالى تەلەفونىنا جەرگە كومىپ جاتقان قۇرىلىس ماتەريالدارىن ءتۇسىرىپ العان عوي.
ماسەلە نەدە؟ الگى جۇرگىزۋشى بۇل ماتەريالداردىڭ نە ەكەنىن، ولاردىڭ قانداي ماقساتتا قولدانىلاتىنىن بىلمەگەن. انىعى، قۇرىلىس زاتتارى كومىلگەن جەردىڭ ۇستىمەن جول جۇرەدى، ال جولدىڭ استىندا قالانعان قۇرىلىس زاتتارى جەر استىنداعى نىساندى جىلىتۋ ءۇشىن قولدانىلدى. ەلدى دۇرلىكتىرگەن الگى جۇرگىزۋشىنى تاۋىپ الدىق. نەگە، نە سەبەپتى بۇلاي جاساعانىمىزدى تۇسىندىردىك. ءتۇسىندى. كەشىرىم سۇرادى.
شىنى كەرەك، ەكسپو-نى قارالايتىن تالاي ۆيدەو شىقتى عوي. ولاردىڭ بارلىعىمەن كۇرەسۋ مۇمكىن ەمەس. وسى ۋاقىتقا دەيىن تالاي قىزمەتتە بولدىم. ءبىراق، وسىنشالىقتى سىنعا ۇشىراماپپىن. ۇيرەندىك قوي. توسەلدىك. سىندى دا كوتەرە ءبىلۋ كەرەك ەكەن. دەگەنمەن، وڭاي ەمەس...
دايىنداعان، دۋمان بىقاي
