EKSPO-ny basqarýǵa Esimov kelgeli ne ózgerdi? Kemshilikter túzeldi me? Kórmeni ótkizýge saqadai saimyz ba? Kúni keshe sheteldik basylymdarǵa suhbat bergen «Astana EKSPO-2017» kórmesiniń basqarma tóraǵasy osy týrasynda aitqan eken. Aǵynan jarylypty. Qandai kedergilermen betpe-bet kelgenin aityp beripti. Sonymen Esimov ne deidi?
Esimde
Iá, osydan eki jyl buryn tamyzdyń ortasynda Nazarbaevtyń meni EKSPO-nyń tóraǵasy etip taǵaiyndaǵan sátin áli umytqan joqpyn. Birden qurylys alańyna tarttym. Nysandardy araladym. Alǵash kórgen nysan S1 pavilony edi. BI-Group kompaniiasy turǵyzyp jatqan. Shynymdy aitaiyn, pavilon degenmen beton qabyrǵadan basqa túgi joq-tuǵyn. Basqa eshteńe de kórgem joq. Moiyndaiyn, unjyrǵam túsip ketti. Jumystyń alǵa basyp keterine de alǵashqyda sengem joq. Kórmeniń qurylysy toqtap turdy desem artyq aitpaspyn.
Sodan ne kerek...
Iá, kóz qorqaq, qol batyr. Alda aýyr jumys kútip turdy. Biraq, jumystyń basyn qurylystan bastaǵan joqpyn. Aldymen EKSPO-daǵy túrli departamentterdiń tártibin tezge túsirý kerek boldy. Bylyq kóp edi...
Departamentter biriniń jumysyn biri atqaratyn. Taza alasapyran edi. Kimniń ne qoiyp, ne atqaryp jatqanyn ańǵaryp bolmaisyń. Ýaqyt bolsa az qalǵan.
Iá, aldymen departamentterdiń jumysyn tártibin retke keltirdim. Bir ai ótti. Mine, sol kezde ǵana kórmeni óz deńgeiinde ótkizemiz degen úmit paida bola bastady.
Rasyn aitaiyn, alǵa júrýden basqa amal joq edi. Elbasynyń ózi baqylap otyr. Odan buryn synshylar kóp boldy.
«Esimov úlgermeidi. Esimov EKSPO-nyń qurylysyn baqylai almaidy. Kórmeniń nysandaryn óz ýaqytynda ótkize almai, qor bolady, kórde turyńyzdar» degen nebir pikirdi estidim.
Olardyń aýyzdaryna qum quiyldy. Úlgerdik. Kúdiktengenderdiń úmiti aqtalmady.
EKSPO-dan keiin
«Kórmeden keiin mundaǵy pavilondar bos qalmai ma? Qalai paidalanylatyn, qandai qajetke jaraityn bolady?» degen saýaldardy kóp estimin. Soǵan naqty jaýap beretin kez keldi.
Kórme aiaqtalǵasyn mundaǵy obektilerdiń eshqaisysy da jumysyn toqtatpaidy. Atap aitsam, Sfera pavilony Bolashaq murajaiy degen atqa ie bolyp osy baǵytta jumys isteidi.
Sebebi, munda «Bolashaq energiiasy» taqyrybynyń túrli jobalary jinaqtalǵan. Joq, ras. Onyń ishinde ǵarysh, kún, jel, sý tipti kinetalyq energiia jobalary da bar. Saiyp kelgende, bul mura. Kórmeniń murasy. Erteń balalarymyzǵa kórsetemiz. Basqa da pavilondar bos qalmaidy.
Budan syrt
Árine, barlyq pavilondardy murajaiǵa ainaldyrmasymyz belgili. Aitalyq, halyqaralyq pavilondardyń bireýinde kórme aiaqtalǵannan keiin «Astana» halyqaralyq qarjylyq ortalyǵy ornalasatyn bolady. Oǵan qosa BUU-nyń jasyl energetika jobasy aiasynda pavilondardyń birinen halyqaralyq Jasyl energetika ortalyǵyn jasaimyz. Muny BUU Assambleiasynyń minberinde sóilegen sózinde Memleket basshysy da aitqan bolatyn. Aitpaqshy, IT – startaptar da jasalyp jatyr. Jaman emes.
Qoryta aitsam, bul pavilondar bos qalmaidy. Qańyrap qalmaidy. Qoryqpańyzdar.
Sizderge mynany aitaiyn: olardy óz qajetine paidalaný týraly tiimdi usynystar qazirden túsip jatyr.
Korrýptsiia qurtty
Moiyndaimyn. Kórmege qatysty jemqorlyq daýy EKSPO-nyń bedeline ájeptáýir nuqsan keltirdi. Qasyqtap jinaǵan abyroiymyzdan bir kúnde aiyryla jazdadyq. Aiyryldyq ta...
Bilseńiz, men osy qyzmetke taǵaiyndalǵan sala áleýmettik jelidegi pikirlerdi sholyp shyqtym. Pikirlerdiń 80 paiyzy negativti boldy. Qazir bul negativti sál de bolsa azaitqan boldyq. Árine, shalyǵy áli de bar. Budan arylý qiyn. Súiekke túsken tańba siiaqty.
Kúni kesheYouTube-ti shýlatqan videony kórgen bolarsyzdar. Kórmege qurylys materialdaryn ákelgen júrgizýshi óziniń uialy telefonyna jerge kómip jatqan qurylys materialdaryn túsirip alǵan ǵoi.
Másele nede? Álgi júrgizýshi bul materialdardyń ne ekenin, olardyń qandai maqsatta qoldanylatynyn bilmegen. Anyǵy, qurylys zattary kómilgen jerdiń ústimen jol júredi, al joldyń astynda qalanǵan qurylys zattary jer astyndaǵy nysandy jylytý úshin qoldanyldy. Eldi dúrliktirgen álgi júrgizýshini taýyp aldyq. Nege, ne sebepti bulai jasaǵanymyzdy túsindirdik. Túsindi. Keshirim surady.
Shyny kerek, EKSPO-ny qaralaityn talai video shyqty ǵoi. Olardyń barlyǵymen kúresý múmkin emes. Osy ýaqytqa deiin talai qyzmette boldym. Biraq, osynshalyqty synǵa ushyramappyn. Úirendik qoi. Tóseldik. Syndy da kótere bilý kerek eken. Degenmen, ońai emes...
Daiyndaǵan, Dýman BYQAI
