ۇستالعانداردىڭ اراسىندا بۇلعارلار، رەسەيلىكتەر، بەلارۋستەر مەن البانيا ازاماتى بار.
«كومپانيانىڭ يەسى گرۋزيادا تۋعان گرەك ازاماتى، ەسەپشىسى قازاقستاندىق، مەنەدجەرلەر جانە لوگيستيكاعا جاۋاپتى ادامدار رەسەيلىكتەر. توپتا بەلورۋس پەن البان ازاماتى دا بار»، - دەدى بۇلعاريانىڭ بارلاۋ قىزمەتىنىڭ (SANS) باسشىسى پلامەن تونچيەۆ.
SANS اگەنتتىگىنىڭ حابارلاۋىنشا، قىلمىستىق توپ ۋكرايناداعى رەسەيلىك ارنايى بولىمشەلەرگە – رەسەي گۆاردياسىنا، اسكەري بارلاۋ قىزمەتىنە، ۆاگنەر مەن شەشەن سودىرلارىنا ارنالعان تاۋارلاردى ەكسپورتتاۋمەن اينالىسقان.
ءتىنتۋ كەزىندە وپتيكالىق كوزدەۋىشتەر مەن دۇربىلەر تابىلدى. قىلمىستىق توپ بۇدان بولەك باعدارلامالىق ونىمدەردى، اۆياسيالىق راديوقابىلداعىشتار مەن بالليستيكالىق ەسەپتەگىشتەردى بۇلعاريا جەرىنەن جىبەرگەنى تۋرالى دەرەكتەر بار.
ەل بيلىگى بۇل ونىمدەر رەسەيدىڭ تۇراقتى ارمياسىنا ەمەس، ۋكراينا اۋماعىندا سوعىسىپ جاتقان ارنايى جاساقتارعا ارنالعان دەپ مالىمدەدى.
تەرگەۋ بارىسىندا جينالعان مالىمەتتەرگە سايكەس، كۇدىكتىلەر جۇمىس ىستەگەن كومپانيا شامامەن 2 ميلليون ەۋروعا باعالانعان تاۋار ساتىپ العان. تاۋار پلوۆديۆ قالاسىندا جۇك كولىگىنە تيەلىپ، كەيىن سوفيا اۋەجايى ارقىلى ۋكرايناداعى باسقىنشىلار باسىپ العان ايماقتارعا جونەلتىلگەن.
كۇدىكتىلەردىڭ كەيبىرى رەسەيگە ۇشپاس بۇرىن سوفيا اۋەجايىندا ۇستالدى، كۋاگەرلەردەن جاۋاپ الۋ جالعاسۋدا.
قىلمىستىق توپ ەۋرووداق ايماعىنداعى رەسەيگە ەكسپورتتاۋعا تىيىم سالىنعان تاۋارلاردى ساتىپ العان، بۇلارعا ۇلىبريتانيا، شۆەيساريا، سەربيا، سينگاپۋر جانە بىرىككەن اراب امىرلىكتەرىندەگى سىبايلاستارى كومەكتەسكەن.
«ەۋرووداق پەن ناتو مۇشەسى رەتىندە بۇلعاريا ۋكرايناعا قارسى سوعىس باستالعاننان كەيىن رەسەي فەدەراسياسىنا سالىنعان سانكسيالاردى ساقتاۋعا مىندەتتەمە الدى»، - دەيدى بۇل ورايدا باس پروكۋروردىڭ ورىنباسارى ماريا پاۆلوۆا.
ەلدىڭ بارلاۋ باسقارماسىنىڭ باسشىسى پلامەن تونچيەۆتىڭ ءمالىم ەتكەنىندەي قىلمىستىق توپتى قۇرىقتاۋعا ەۋروپاداعى بىرنەشە مەملەكەتتىڭ قاۋىپسىزدىك قىزمەتى اتسالىسقان.
"وپەراسيا سوفيا اۋەجايىندا باستالدى، الدىمەن توپتىڭ بەس مۇشەسى ۇستالدى. ۋكرايناداعى سوعىس پەن تاياۋ شىعىستاعى وقيعالاردى ەسكەرە وتىرىپ، ءىستى بارىنشا قۇپيا ءارى مۇقيات جۇرگىزۋگە تىرىستىق»، - دەدى تونچيەۆ.
https://dalanews.kz/sadak/93825-kiikter-shamadan-tys-kobeyip-ketti-shar
