Ustalǵandardyń arasynda bulǵarlar, reseilikter, belarýster men Albaniia azamaty bar.
«Kompaniianyń iesi Grýziiada týǵan grek azamaty, esepshisi qazaqstandyq, menedjerler jáne logistikaǵa jaýapty adamdar reseilikter. Topta belorýs pen alban azamaty da bar», - dedi Bulǵariianyń barlaý qyzmetiniń (SANS) basshysy Plamen Tónchev.
SANS agenttiginiń habarlaýynsha, qylmystyq top Ýkrainadaǵy reseilik arnaiy bólimshelerge – Resei gvardiiasyna, áskeri barlaý qyzmetine, Vagner men sheshen sodyrlaryna arnalǵan taýarlardy eksporttaýmen ainalysqan.
Tintý kezinde optikalyq kózdeýishter men dúrbiler tabyldy. Qylmystyq top budan bólek baǵdarlamalyq ónimderdi, aviatsiialyq radioqabyldaǵyshtar men ballistikalyq eseptegishterdi Bulǵariia jerinen jibergeni týraly derekter bar.
El biligi bul ónimder Reseidiń turaqty armiiasyna emes, Ýkraina aýmaǵynda soǵysyp jatqan arnaiy jasaqtarǵa arnalǵan dep málimdedi.
Tergeý barysynda jinalǵan málimetterge sáikes, kúdiktiler jumys istegen kompaniia shamamen 2 million eýroǵa baǵalanǵan taýar satyp alǵan. Taýar Plovdiv qalasynda júk kóligine tielip, keiin Sofiia áýejaiy arqyly Ýkrainadaǵy basqynshylar basyp alǵan aimaqtarǵa jóneltilgen.
Kúdiktilerdiń keibiri Reseige ushpas buryn Sofiia áýejaiynda ustaldy, kýágerlerden jaýap alý jalǵasýda.
Qylmystyq top Eýroodaq aimaǵyndaǵy Reseige eksporttaýǵa tyiym salynǵan taýarlardy satyp alǵan, bularǵa Ulybritaniia, Shveitsariia, Serbiia, Singapýr jáne Birikken Arab Ámirlikterindegi sybailastary kómektesken.
«Eýroodaq pen NATO múshesi retinde Bulǵariia Ýkrainaǵa qarsy soǵys bastalǵannan keiin Resei Federatsiiasyna salynǵan sanktsiialardy saqtaýǵa mindetteme aldy», - deidi bul oraida Bas prokýrordyń orynbasary Mariia Pavlova.
Eldiń barlaý basqarmasynyń basshysy Plamen Tonchevtyń málim etkenindei qylmystyq topty quryqtaýǵa Eýropadaǵy birneshe memlekettiń qaýipsizdik qyzmeti atsalysqan.
"Operatsiia Sofiia áýejaiynda bastaldy, aldymen toptyń bes múshesi ustaldy. Ýkrainadaǵy soǵys pen Taiaý Shyǵystaǵy oqiǵalardy eskere otyryp, isti barynsha qupiia ári muqiiat júrgizýge tyrystyq», - dedi Tonchev.
https://dalanews.kz/sadak/93825-kiikter-shamadan-tys-kobeyip-ketti-shar
