مەملەكەتتىك كەڭەسشى ەرلان قارين ءال-فارابي اتىنداعى قازاق ۇلتتىق ۋنيۆەرسيتەتىنىڭ قۇرىلعانىنا 90 جىل تولۋىنا وراي وتكەن سالتاناتتى جيىنعا قاتىستى، - دەپ حابارلايدى Dalanews.kz. 

مەملەكەتتىك كەڭەسشى بىرەگەي ءبىلىم ورداسىنىڭ تاريحي ماڭىزىنا، پرەزيدەنتتىڭ باستاماسىمەن قولعا الىنعان ىلكىمدى ىستەرگە توقتالدى.

"مەملەكەت باسشىسى قاسىم-جومارت كەمەل ۇلىنىڭ باستاماسىمەن ەلدە اۋقىمدى جانە تەرەڭ وزگەرىستەر ءجۇرىپ جاتىر. 2029 جىلعا دەيىن ينفراقۇرىلىم جۇيەسىن جاڭارتۋعا قاتىستى كەشەندى جوسپار قابىلداندى. تەك بيىلدىڭ وزىندە 6 مىڭ شاقىرىمنان استام ينجەنەرلىك-كوممۋنيكاسيا جەلىسى جوندەلدى جانە 12 مىڭ شاقىرىم جول جوندەۋدەن ءوتىپ، سالىنىپ جاتىر. 3 اۋەجايدىڭ جاڭا تەرمينالى ىسكە قوسىلدى"، - دەيدى ەرلان قارين. 

مەملەكەتتىك كەڭەسشى بيىل 100-دەن استام مەكتەپ سالىندى، سونىڭ ىشىندە 53 جايلى مەكتەپ بارىن اتاپ ءوتتى. 

"سوڭعى ون جىلدا رەكوردتىق استىق جينالدى. 18 ميلليون شارشى مەتر تۇرعىن ءۇي پايدالانۋعا بەرىلدى. سونداي-اق، بيىل جالپى قۇنى 1،27 تريلليون تەڭگە بولاتىن 169 كاسىپورىن ىسكە قوسىلدى. 14 مىڭعا جۋىق جۇمىس ورنى اشىلدى. مۇنىڭ ءبارى – مەملەكەت باسشىسىنىڭ باستاماسىمەن جاسالىپ جاتقان جوسپارلى، جۇيەلى جۇمىستىڭ ناتيجەسى"، – دەدى مەملەكەتتىك كەڭەسشى.