ءبىرى – ەرلاندى قولداسا، ەندى ءبىرى كۇمانمەن قاراپ وتىر وعان. كۇنى كەشە ءاسانالى ءاشىموۆ پەن نۇرلان ورازالين باستاعان بىرنەشە ونەر ادامدارى اراشا ءتۇستى ەرلانعا.
ءاسانالى اعا ءىنىسىن جاماناتقا قيمايتىنىن اشىپ ايتتى.
ەرلان ءبىلالدىڭ باسقا دا ارىپتەستەرى ولەڭ وقىپ، كوز جاسىنا ەرىك بەرگەنىنە كۋا بولدىق. دۇرىس قوي. اراشا تۇسكەنى ورىندى.
ءبىراق كوز جاسىن كول قىلىپ زاڭ ورىندارىنىڭ جۇمىسىنا "ىقپال" ەتۋ قازىرگى زاماندا اقىلعا سىيا ما؟
باسقا ادام جىلاسا ءبىر ءجون. باسقا ادام جىلاسا سەنەر ەدىك. ال ءارتىستىڭ ساحنادان بولەك مىنبەدە تۇرىپ جىلاعانىنا كىم سەنەدى؟
اكتەرلىك شەبەرلىك پەن شىنايىلىقتىڭ اراجىگىن اجىراتۋ قيىن مۇندايدا...
ەگەر ءىستى بولعان ادامنىڭ ءاربىر جاقتاۋشىسى سوت ورىندارىنا جىلاپ بارىپ، "قىسىم" جاساي بەرسە، ايىپتى ادامنىڭ ءبارى جازادان قۇتىلىپ كەتە بەرمەي مە؟
كەرەك دەسەڭىز، بۇل ىسكە ءاسانالى اعامىزدىڭ ارالاسۋى ارتىقتاۋ بولعان سياقتى. اتا ساقالى اۋزىنا تۇسكەن ابىز ادامدى "ادۆوكات" قىلۋدىڭ نە قاجەتى بار؟
ەرلاندى قولداۋشىلار ونى الدەكىمدەردىڭ ارانداتقانىن ايتىپ، وعان اراشا تۇسۋدە.
بىزدىڭشە، ەرلان ءبىلالدى الدەكىمدەر ارانداتىپ، اياقتان شالاتىنداي ۇلكەن ساياسي تۇلعا ەمەس. ونەر ادامى، ءارتىس اربىردەن سوڭ. بۇعان ءبىزدىڭ جۇيەنى جەتىك بىلەتىن جانداردىڭ سەنە قويۋى ەكىتالاي. ال مادەنيەت سالاسىندا ەڭبەك ەتىپ جۇرگەن ارىپتەستەرى تەاتر ديرەكتورىنا قاستىق ويلايدى دەگەنگە اۋزىڭ بارمايدى. ءبىراق، كىم بىلگەن...
وسى ءبىر داۋ-شاردى سىرتتان باقىلاعاندا ەلىمىزدەگى ونەر جانە مادەنيەت سالاسىنداعى قايراتكەرلەردىڭ وزدەرىن قورعاۋعا دارمەنسىز ەكەنىنە كوزىڭ جەتەدى.
الدىعا ءمۇيىزى قاراعايداي اعالاردى سالىپ، سوڭىنان ءىنى-قارىنداستىڭ جىلاپ-سىقتاۋى التى قىردىڭ استىندا قالعان ەسكى ءتاسىل ەمەس پە؟
جاماندىق شاقىرۋ اربىردەن سوڭ. ءبىلالدىڭ كوزى ءتىرى. تۇرمەدە ەمەس، ۇيدە. يتجەككەنگە ايدالعان جوق. ول زامان كەلمەسكە كەتكەن.
بۇل كۇرەس ەمەس، انىعىندا. بالكىم، باسقا جولمەن جۇرگەن ءجون شىعار. زاماناۋي جولمەن، دەموكراتيالىق جولمەن...
ءازىر رەسەيدە «گوگول-سەنتر» تەاترىنىڭ جەتەكشىسى كيريلل سەرەبرەننيكوۆكە قارسى ءىس ءجۇرىپ جاتىر. وندا دا ارتىستەر ارىپتەسىن قورعاۋدا.
ءبىراق بىزدىكىلەر سياقتى ولەڭ وقىپ، جىلاپ-سىقتاپ جۇرتتىڭ ەموسياسىمەن ويناعان ءارتىستى كورمەدىك.
سەرەبرەننيكوۆتىڭ ءتول تۋىندىسى اتىشۋلى «نۋرييەۆ» سپەكتاكلىن ساحنالاعان ارىپتەستەرى ساحناعا رەجيسسەردىڭ سۋرەتى بەينەلەنگەن جەيدەلەردى كيىپ شىقتى كۇنى كەشە. تەاتردىڭ الدىندا كۇندە ميتينگ. سەرەبرەننيكوۆ ءازىر ءۇي قاماقتا. انىعى، ونى ءبىلالعا قاراعاندا الدەقايدا اۋىر جازا كۇتىپ تۇر.
ءبىراق ونىڭ ارىپتەستەرى كۇرەستى توقتاتقان جوق. قايتا بۇل ءىستى ساياسيلاندىرۋعا تىرىسۋدا.
«ەگەر كيريلدى اباقتىعا قاماۋدىڭ ارتىندا ونى شىعارماشىلىعى تۇرسا ءبىر ادىم كەرى شەگىنبەيمىز. ال ەگەر قارجىلىق قىلمىسقا شاتىلعانى راس بولسا، وندا ءبىزدىڭ بۇل ىسكە ارالاسۋعا قاقىمىز جوق»، – دەيدى سەرەبرەننيكوۆتىڭ ارىپتەستەرى.
بىلسەك، سەرەبرەننيكوۆ - ەركىن ويلى ليبەرالداردىڭ كورنەكتى وكىلى. ونىڭ جاقتاستارى «بيلىك سەرەبرەننيكوۆتى سوتتاپ، سول ارقىلى ليبەرالدارعا قىر كورسەتۋدە» دەپ جورامالدايدى.
بىزدەگى جاعدايعا قايتا ورالساق. ەگەر ەرلان ءبىلالدىڭ ومىردەگى دوستارى، ونەردەگى ارىپتەستەرى ايتقانداي تەاتر ديرەكتورىنا الدەكىمدەر تۇزاق قۇرعانى راس بولسا، بۇل ءبىزدىڭ قۇقىق قورعاۋ جانە زاڭ ورىندارىنا ۇلكەن سوققى بولاتىنى ءسوزسىز.
مۇنى جىلاپ-سىقتاۋمەن، ولەڭ وقۋمەن دالەلدەي المايسىڭ، ءبىراق.
ءبارىمىز بىلەمىز، جىلاپ-سىقتاۋدىڭ ارتى ادەتتە نازاربايەۆتان اراشا سۇراۋمەن اياقتالاتىنىن...
نۇرلان جۇماحان
