ۇلتتىق ۇلاننىڭ اسكەري بولىمىندە اۋىر باس جاراقاتىن الىپ، مۇگەدەك بولعان ەربايان مۇحتاردىڭ قازىرگى جاعدايى بەلگىلى بولدى، دەپ حابارلايدى Dalanews.kz.
ساربازدىڭ تۋىسىنىڭ ايتۋىنشا، ىستامبۇلدا جاسالعان وپەراسيادان كەيىن ەرباياننىڭ جاعدايى ەداۋىر جاقسارعان.
“مۇحتار ەرباياننىڭ قازاقستانعا ورالعانىنا ءبىر اي ءوتتى، جانە وسى ۋاقىت ىشىندە مەن ونىڭ وڭالۋىمەن اينالىسىپ كەلەمىن. ءبىزدىڭ جەتىستىكتەرىمىز ايتارلىقتاي! ىستامبۇلدا جاسالعان وپەراسيادان كەيىن ونىڭ جاعدايى الدەقايدا جاقساردى، ءقازىر ءبىز كۇن سايىن قيمىل-قوزعالىسىن جانە سويلەۋ قابىلەتىن قالپىنا كەلتىرۋ ءۇشىن تىنباي جۇمىس ىستەپ جاتىرمىز.
العاشقى كۇندەرى ايتقانىمداي، مەن ەرباياننىڭ ساۋىعىپ كەتەتىنىنە سەنەمىن. اللانىڭ قالاۋىمەن ءبارى جاقسى بولادى”، - دەپ جازدى ولار ەرباياننىڭ رەسمي پاراقشاسىندا.
تۋىسىنىڭ سوزىنشە، قازىرگى ۋاقىتتا ساربازدىڭ ەمىنە قاجەتتى قاراجات جيناۋ جۇمىستارى جالعاسىپ جاتىر.
“الدا قاسيەتتى رامازان ايى كەلە جاتىر. بارشاڭىزدى ەربايان ءۇشىن دۇعا ەتۋگە جانە ونىڭ ساۋىعىپ كەتۋىنە قولداۋ بىلدىرۋگە شاقىرامىن. اتا-اناسى ءالى دە قاراجات جيناۋدى جالعاستىرۋدا، ويتكەنى ەربايانعا قوسىمشا تەكسەرۋلەر مەن ۇلكەن رەابيليتاسيالىق جۇمىس قاجەت.
ونىڭ كوزىندەگى وت – ومىرگە دەگەن قۇشتارلىعى، ساۋىعىپ كەتۋگە دەگەن ۇمتىلىسى. ول بەرىلمەيدى، ءبىز دە قولداۋ كورسەتۋىمىزدى توقتاتپايمىز! ءار كۇن سايىن تالماي ەڭبەكتەنىپ، ماقساتىنا جاقىنداي تۇسۋدە”، — دەدى ولار.
ايتا كەتەيىك، ەربايان مۇحتار 2024 جىلدىڭ جەلتوقسان ايىندا اۋرۋحاناعا ءتۇستى. ۇلتتىق ۇلاننىڭ اسكەري بولىمىندەگىلەر اتا-اناسىنا ونىڭ اجەتحانادا قۇلاپ، باسىن پليتكاعا سوققانىن ايتقان. الايدا، ولار بۇل نۇسقاعا سەنبەي، ەرباياننىڭ سوققىعا جىعىلعانىن دالەلدەۋگە تىرىستى.
قازاقستاندىقتار جاس ساربازدىڭ ەمىنە 230 ميلليون تەڭگە كولەمىندە قاراجات جينادى. قازىرگى ۋاقىتتا مۇحتار استانادا، ول تۇركيادا ەمنىڭ العاشقى كەزەڭىن اياقتادى.
