ەربايان مۇحتار ىسىندەگى قورعاۋشى ينگا يمانباي مەن اتا-اناسى ىستە كۇدىكتى جوق دەگەنگە پىكىر ءبىلدىردى، دەپ حابارلايدى Dalanews.kz.
ينگا يمانباي پروكۋرور ايتقان مالىمدەمەنىڭ بارلىعىن ولار ءبىر اي بۇرىن جاريالاعانىن ايتتى. ونىڭ ىشىندە، ءالى كۇنگە دەيىن ەشكىم كۇدىكتى رەتىندە تانىلماعانى جانە پروسەسسۋالدىق شەشىمدەر قابىلدانباعانى تۋرالى اقپارات بار. ىستە تەكسەرۋگە الىنعان تۇلعالار بار، ونىڭ ىشىندە قورعاۋ قۇقىعىنا يە كۋاگەرلەر – ولار كۇدىكتى مارتەبەسىنە ءبىر قادام قالدى دەگەن ءسوز. ءبىراق تەرگەۋ ورگاندارى ووارعا قاتىستى شەشىم قابىلداۋعا اسىعار ەمەس.
"بىزدە بۇل ءىستى تەرگەۋ اقيقاتتى انىقتاۋ ءۇشىن ەمەس، قوعامنىڭ نازارىن ەسكەرە وتىرىپ قانا جۇرگىزىپ جاتقانداي اسەر قالىپتاستى. ءىستى جابۋعا بۇعان دەيىن دە تالپىنىس بولعان – تەك ەرباياننىڭ اتا-اناسى ماعان جۇگىنگەننەن كەيىن عانا تەرگەۋ قايتا جانداندىرىلعان. سوندىقتان، تەرگەۋدىڭ جالعاسۋى تەك قوعامدىق رەزونانس پەن سىزدەردىڭ قولداۋلارىڭىزدىڭ ارقاسىندا مۇمكىن بولدى. قازىرگى تاڭدا ءبىزدىڭ ويىمىزشا، تەرگەۋشىلەر ەرباياننىڭ ەسىن جيىپ، ءوزى بىردەڭە ايتقانىن كۇتىپ وتىر. ءبىراق ءبىز ءىستىڭ ءادىل قارالۋى ءۇشىن كۇرەسەمىز – اشىق سوت پروسەسىن وتكىزۋگە جانە بارلىق كىنالىلەردى، سونىڭ ىشىندە جاۋاپتى وفيسەرلەردىڭ جازالانۋى ءۇشىن ايانبايمىز، دەلىنگەن مالىمدەمەدە.
ينگا يمانباي نەلىكتەن قولداۋ ماڭىزدى ەكەنىن ءتۇسىندىردى.
"بۇل ءىستىڭ جابىلماۋى جانە شىندىقتىڭ اشىلۋى تەك قوعامنىڭ نازارىندا ۇستاۋ ارقىلى مۇمكىن بولادى. سول سەبەپتى، بۇل ىسكە بەي-جاي قاراماي، قولداۋ كورسەتكەن ءاربىر جانعا العىسىمىزدى بىلدىرەمىز. سونىمەن قاتار، ءبىز ەرباياننىڭ تەزىرەك ساۋىعىپ كەتۋىن تىلەيمىز. ول ەمدەۋدىڭ ءبىرىنشى كەزەڭىنەن ءوتتى جانە جاقىن ارادا وڭالتۋ پروسەسىن باستايدى. وسىعان بايلانىستى، ونىڭ ەمىنە قاراجات جيناۋ ءالى دە جالعاسۋدا"، دەيدى ينگا يمانباي.
ەربايان مۇحتار 2024 جىلدىڭ جەلتوقسان ايىندا اۋرۋحاناعا ءتۇستى. ۇلتتىق ۇلاننىڭ اسكەري بولىمىندەگىلەر اتا-اناسىنا ونىڭ اجەتحانادا قۇلاپ، باسىن پليتكاعا سوققانىن ايتقان. الايدا، ولار بۇل نۇسقاعا سەنبەي، ەرباياننىڭ سوققىعا جىعىلعانىن دالەلدەۋگە تىرىستى.
قازاقستاندىقتار جاس ساربازدىڭ ەمىنە 230 ميلليون تەڭگە كولەمىندە قاراجات جينادى. قازىرگى ۋاقىتتا مۇحتار استانادا، ول تۇركيادا ەمنىڭ العاشقى كەزەڭىن اياقتادى.
