قازاقستاندا ەندٸ ساربازدار ەسكەري بٶلٸمدٸ ٶزدەرٸ تاڭداي الادى, دەپ حابارلايدى Dalanews.kz.
قازاقستاندا ەسكەرگە شاقىرىلعان جاستارعا ەسكەري قىزمەت ورنىن ٶز بەتٸنشە تاڭداۋ مٷمكٸندٸگٸ بەرٸلەدٸ. بۇل ٷشٸن قورعانىس مينيسترلٸگٸ MyArmy.kz ينتەرنەت-پورتالىن ٸسكە قوستى. جاڭا جٷيە مەرزٸمدٸ ەرٸ كەلٸسٸمشارت نەگٸزٸندەگٸ قىزمەتكە قابىلداۋ پروتسەسٸن جەڭٸلدەتۋدٸ كٶزدەيدٸ.
پلاتفورمادا ٶتٸنٸش بەرۋگە, ەسكەري ماماندىقتار مەن دايىندىق شارتتارىمەن تانىسۋعا, سونداي-اق ونلاين-انىقتامالىق ارقىلى سۇراق قويۋعا بولادى. ەڭ باستى جاڭاشىلدىق – قالاعان ەسكەري بٶلٸمدٸ كٶرسەتۋ مٷمكٸندٸگٸ.
قازٸرگٸ ۋاقىتتا پورتال الماتى وبلىسىنداعى №78460 ەسكەري بٶلٸمٸنٸڭ بازاسىندا پيلوتتىق رەجيمدە جۇمىس ٸستەپ تۇر. تەستٸلەۋدەن كەيٸن جوبا بٷكٸل ەل بويىنشا ەنگٸزٸلەدٸ.
ۆەدومستۆو ٶكٸلدەرٸنٸڭ ايتۋىنشا, تسيفرلاندىرۋ ەسكەرگە شاقىرىلۋشىلار ٷشٸن ەسكەري قىزمەتتٸ بارىنشا اشىق ەرٸ تٷسٸنٸكتٸ ەتپەك.
ەسكە سالايىق, 18 قىركٷيەكتە ەسكەردە تاعى دا قايعىلى جاعداي بولدى. الماتى وبلىسى جامبىل اۋدانى مەتٸبۇلاق اۋىلىندا ورنالاسقان №01098 ەسكەري بٶلٸمٸندە 19 جاستاعى مەرزٸمدٸ سارباز دٸنمۇحامەد شىناربەك ٶلٸ تابىلدى.
مارقۇمنىڭ ەپكەسٸنٸڭ سٶزٸنشە, 2024 جىلى كٷزدە ەسكەرگە دانييال شىناربەك شاقىرىلسا, كٶكتەمدە ونىڭ ەگٸزٸ دٸنمۇحاممەد ەسكەر قاتارىنا الىنعان. ەكەۋٸ دە وتار گارنيزونىندا قىزمەت ەتكەن.
وتباسىنا مارقۇم سۋيتسيد جاسادى دەگەن حابار جەتكەن, الايدا تۋعان-تۋىستارى بۇل نۇسقاعا سەنبەيدٸ.
سونىمەن قاتار, جەتٸسۋدا مەرزٸمدٸ ەسكەري قىزمەتشٸ وق جاراقاتىنان قازا تاپتى.
مەرزٸمدٸ ەسكەري قىزمەتشٸ قاۋٸپسٸزدٸك ەرەجەلەرٸ ساقتالماۋ سالدارىنان وق جاراقاتىن الىپ, سول جەردە قازا تاپقان.
بۇل دەرەك بويىنشا قىلمىستىق ٸس قوزعالدى. قورعانىس مينيسترٸ تەرگەۋدٸ جەكە باقىلاۋىنا الدى.
