جۋىق ارادا الەۋمەتتىك جانە ەڭبەك قاتىناستارىن رەتتەۋ جونىندەگى جاڭا كەلىسىمگە قول قويىلادى. قۇجاتقا ءۇشجاقتى كەلىسىم نەگىزىندە –ۇكىمەت، جۇمىسشىلار مەن جۇمىس بەرۋشىلەردىڭ رەسپۋبليكالىق بىرلەستىكتەرى اراسىنداعى ىنتىماقتاستىق شەڭبەرىندە قول قويىلادى. 

بۇل قۇجات الەۋمەتتىك ارىپتەستىكتى دامىتۋ جانە الەۋمەتتىك-ەڭبەك قاتىناستارىن رەتتەۋ پرينسيپتەرىنە نەگىزدەلگەن. سونىمەن بىرگە، ەلدىڭ ەكونوميكالىق دامۋىنىڭ تۇراقتىلىعىن قامتاماسىز ەتۋگە جانە ادام كاپيتالىنداعى ينۆەستيسيالاردى ارتتىرۋعا سەپ بولادى.

قۇجات ق ر ەڭبەك جانە حالىقتى الەۋمەتتىك قورعاۋ مينيسترلىگىندە تالقىلاندى. جۇمىس توبىنىڭ وتىرىسىنا ۇلتتىق ەكونوميكا، قارجى، دەنساۋلىق ساقتاۋ، مادەنيەت جانە سپورت، ينۆەستيسيالار جانە دامۋ، اۋىلشارۋاشىلىعى مينيسترلىكتەرىنىڭ ماماندارى مەن «اتامەكەن» ۇلتتىق كاسىپكەرلەر پالاتاسىنىڭ، «Kazenergy» قاۋىمداستىعى، جۇمىس بەرۋشىلەر كونفەدەراسياسى، كاسىپوداقتار فەدەراسياسى، ءىرى جۇمىس بەرۋشىلەر مەن كاسىپوداقتاردان كەلگەن وكىلدەر قاتىستى.

ەسكە سالا كەتەيىك مۇنىڭ الدىنداعى قۇجاتقا 2014 جىلى قول قويىلعان بولاتىن. ال وسى جولعى كەلىسىمنىڭ ماقساتى – وعان قاتىسۋشىلاردىڭ ءوزارا ءىس-قيمىلىن ءتيىمدى رەتتەۋ ارقىلى لايىقتى ەڭبەك جاعدايلارىن قامتاماسىز ەتۋ. قۇجات ءتيىمدى جۇمىسپەن قامتۋ جانە ادام كاپيتالىن دامىتۋ، ەڭبەك ونىمدىلىگى مەن ەڭبەكاقى تولەۋ، الەۋمەتتىك ساياسات، ەڭبەك قورعاۋ جانە الەۋمەتتىك سەرىكتەستىكتى دامىتۋ ماسەلەلەرىن قارايدى. سونداي-اق، الەۋمەتتىك جاۋاپكەرشىلىكتى ارتتىرۋ سەكىلدى ەڭبەك قاتىناستارىنىڭ اسپەكتىلەرىن قاراستىرادى.

جۇمىس توبىنا قاتىسقاندار ءوز ۇسىنىستارىن كەلىسىمنىڭ جاڭا رەداكسياسىنا جولدادى. بۇل – كاسىبي ءبىلىم بەرۋ جۇيەسىن جاڭعىرتۋ، كادرلاردى سەرتيفيكاتتاۋدى  قالىپتاستىرۋ، كاسىبي ۇتقىرلىقتى دامىتۋ، الەۋمەتتىك ساقتاندىرۋ جۇيەسىن جەتىلدىرۋ جانە تاعى باسقا ماسەلەلەر بويىنشا مىندەتتەمەلەردىڭ پاكەتى بولىپ تابىلادى.

كەلىسىمنىڭ سوڭعى نۇسقاسىنا قول قويۋ 2017 جىلدىڭ 25 جەلتوقسانىنا جوسپارلانعان. بۇل كەلىسىم 2018 -2020 جىلدار ارالىعىن قامتىماق.