قازاقستانداعى ءىرى دۇكەندەر جەلىلەرىنىڭ ءبىرى قازاق تىلىندەگى جارناماسىندا ورەسكەل قاتەلىكتەر جىبەرىپ، الەۋمەتتىك جەلىدە سىنعا ۇشىرادى، دەپ حابارلايدى Dala News.
داۋدىڭ باستالۋىنا بلوگەردىڭ جازباسى سەبەپ بولدى. ول ءىرى برەندتىڭ ناۋرىزعا ارنالعان جارناماسىن مىسالعا كەلتىرىپ، ماتىندەگى تىلدىك قاتەلەرگە نازار اۋدارعان.
اۆتوردىڭ ايتۋىنشا، قازاق ءتىلى – جاي عانا «گالوچكا ءۇشىن» قولدانىلاتىن قۇرال ەمەس، ول مادەنيەت پەن اۋديتورياعا دەگەن قۇرمەتتىڭ كورىنىسى.
«قازاق ءتىلى – بۇل جاي عانا لوكاليزاسيا ەمەس. بۇل – قۇرمەت. ال ماتىندە ورەسكەل قاتەلەر بولسا، ول نەمقۇرايدىلىقتى كورسەتەدى»، – دەپ جازدى ول.
پايدالانۋشىلار اسىرەسە جارناماداعى قاراپايىم سوزدەردىڭ وزىندە قاتە كەتكەنىنە نازار اۋدارعان. بۇل جاعداي كوپشىلىكتىڭ نارازىلىعىن تۋعىزدى.
جەلى قولدانۋشىلارى ءىرى كومپانيالار قازاقستان نارىعىندا جۇمىس ىستەي وتىرىپ، مەملەكەتتىك تىلگە جاۋاپكەرشىلىكپەن قاراۋى ءتيىس ەكەنىن اتاپ ءوتتى.
كوپشىلىك پىكىرىنشە، مۇنداي جاعدايلار كاسىبي رەداكتورلارمەن جۇمىس ىستەمەۋدىڭ جانە ساپانى باقىلاۋدىڭ السىزدىگىن كورسەتەدى.
«ەگەر قازاقستاندا جۇمىس ىستەسەڭ، ءماتىندى كەم دەگەندە ءتىل ماماندارىنا تەكسەرتۋ كەرەك»، – دەپ جازادى جەلى قولدانۋشىلارى.
وقيعا قوعامدا كەڭ تالقىلانىپ، ءتىل ماسەلەسىنىڭ ءالى دە وزەكتى ەكەنىن كورسەتتى. ساراپشىلاردىڭ ايتۋىنشا، بۇل تەك ءبىر كومپانيانىڭ ماسەلەسى ەمەس، جالپى بيزنەستەگى جۇيەلى پروبلەما.
قوعام بەلسەندىلەرى ءىرى برەندتەردەن مەملەكەتتىك تىلگە قۇرمەتپەن قاراپ، ساپالى كونتەنت ۇسىنۋدى تالاپ ەتۋدە.
