استانادا قازاقستان پرەمەر-مينيسترى ولجاس بەكتەنوۆ پەن رەسەي ۇكىمەتىنىڭ ءتوراعاسى ميحايل ءميشۋستيننىڭ كەزدەسۋى ءوتتى، دەپ حابارلايدى Dala News.

قازاقستانعا جۇمىس ساپارىمەن كەلگەن ميشۋستينمەن وتكەن كەلىسسوزدەر بارىسىندا تاراپتار ساۋدا-ەكونوميكالىق جانە ينۆەستيسيالىق ىنتىماقتاستىقتى، ونەركاسىپ، ەنەرگەتيكا، كولىك سالالارىنداعى بىرلەسكەن جوبالاردى، سونداي-اق ەكولوگيا باعىتىنداعى ءوزارا ءىس-قيمىلدى تالقىلادى.

ولجاس بەكتەنوۆ ەكى ەل اراسىنداعى قارىم-قاتىناس جاڭا دەڭگەيگە كوتەرىلگەنىن اتاپ ءوتتى.

«مەملەكەت باسشىسى قاسىم-جومارت كەمەل ۇلى توقايەۆ پەن ۆلاديمير ۆلاديميروۆيچ ءپۋتيننىڭ بىرلەسكەن كۇش-جىگەرىنىڭ ارقاسىندا قازاق-رەسەي قاتىناستارى ءوزارا ءىس-قيمىلدىڭ ساپالى جاڭا دەڭگەيىنە كوتەرىلدى. سوڭعى جىلدارى ءوزارا ساۋدا كولەمى 30 ملرد-تىق مەجەگە ەداۋىر جاقىندادى»، – دەدى ول.

ۇكىمەت باسشىسى رەسەي قازاقستان ەكونوميكاسىنداعى نەگىزگى ينۆەستورلاردىڭ ءبىرى ەكەنىن دە اتاپ ءوتتى. ماسەلەن، سوڭعى 20 جىلدا رەسەيلىك تىكەلەي ينۆەستيسيالار كولەمى $28،5 ملرد-قا جەتكەن. ال وتكەن جىلدىڭ 9 ايىندا قازاقستانعا $2،1 ملرد ينۆەستيسيا تارتىلعان.

ءوز كەزەگىندە ميحايل ميشۋستين قازاقستاندى جاڭا كونستيتۋسيانىڭ قابىلدانۋىمەن قۇتتىقتادى.

«ءسىزدى جانە قازاقستاندىقتاردى تاريحي وقيعامەن، جاڭا كونستيتۋسيالارىڭىزدىڭ قابىلدانۋىمەن شىن جۇرەكتەن قۇتتىقتايمىن. رەفەرەندۋم ناتيجەسى قازاقستان حالقىنىڭ ەل پرەزيدەنتى قاسىم-جومارت توقايەۆتىڭ باعىتىن قولدايتىنىن كورسەتتى»، – دەدى ول.

تاراپتار ەكىجاقتى ىنتىماقتاستىقتى ودان ءارى دامىتۋعا دايىن ەكەندەرىن ءبىلدىردى.