استانادا «WorldSkills Astana-2025» كاسىبي شەبەرلىك بويىنشا ايماقتىق چەمپيونات باستالدى. ەلوردادا وسىمەن ونىنشى رەت ءوتىپ جاتىر، دەپ حابارلايدى قالا اكىمدىگىنىڭ رەسمي سايتى.
چەمپيوناتقا 300 ۇمىتكەر، 250-گە جۋىق ساراپشى جانە 4000-نان استام قوناق قاتىسىپ جاتىر.
«WorldSkills» حالىقارالىق قوزعالىسىنىڭ باستى ماقساتى – جاستار اراسىندا جۇمىسشى ماماندىقتاردىڭ بەدەلىن ارتتىرۋ جانە كاسىبي داعدىلاردى دامىتۋ. قازاقستان 2014 جىلى جاھاندىق قاۋىمداستىققا ەندى، ال 2015 جىلى استانادا ءبىرىنشى قالالىق چەمپيونات ءوتتى.
وسى ون جىل ىشىندە WorldSkills Astana اۋقىمدى جوباعا اينالدى: 2025 جىلى 300-دەن استام قاتىسۋشى 49 قۇزىرەت بويىنشا سايىسقا تۇسۋگە ءوتىنىش بەردى.
جارىس 30 مامىرعا دەيىن ەلوردالىق كوللەدجدەردىڭ 15 الاڭىندا وتەدى. قاتىسۋشىلار پروتوتيپ جاساۋ، مەيرامحانا قىزمەتى، دانەكەرلەۋ، گرافيكالىق ديزاين، ءموبيلدى روبوتوتەحنيكا، موبيلوگرافيا، ينتەرنەت-ماركەتينگ جانە ت.ب. سالالاردا ءوز جەتىستىكتەرىن كورسەتەدى.
چەمپيونات نەگىزگى سالالارداعى كاسىپتەردىڭ كەڭ اۋقىمىن قامتيدى:
قۇرىلىس جانە ينجەنەريا: كىرپىش قالاۋ، گيپسوكارتون جانە سىلاق، پليتكا توسەۋ، ەلەكتر مونتاجداۋ، سانتەحنيكا جانە جىلۋمەن جابدىقتاۋ، اعاش ۇستاسى، تەمىر جول كولىگىن باسقارۋ، ەلەكتروۆوز باسقارۋ جانە ت.ب.
ونەركاسىپ جانە مەحاترونيكا: دانەكەرلەۋ تەحنولوگيالارى، توكارلىق جانە فرەزەرلىك جۇمىستار، كۋزوۆ جوندەۋ، پروتوتيپتەۋ، مەحاترونيكا، E-mobility.
Iت جانە سيفرلىق تەحنولوگيالار: جەلىلىك جانە جۇيەلىك اكىمشىلەندىرۋ، بۇلتتى باعدارلامالاۋ، ۆەب-تەحنولوگيالار، گرافيكالىق ديزاين، ينتەرنەت-ماركەتينگ، بيزنەسكە ارنالعان IT شەشىمدەر، ءموبيلدى قوسىمشالار ازىرلەۋ، كومپيۋتەرلىك ويىنداردى 3D مودەلدەۋ، ءموبيلدى فوتوسۋرەت، ۆيدەومونتاج.
قىزمەت كورسەتۋ جانە شىعارماشىلىق سالالار: مەيرامحانا قىزمەتى، اسپازدىق جانە كونديتەرلىك ونىمدەر، نان ءپىسىرۋ، شاشتاراز، ءسان تەحنولوگياسى، ءقوناقۇي قابىلداۋشىسى، فلوريستيكا.
ءبىلىم بەرۋ جانە الەۋمەتتىك كاسىپتەر: باستاۋىش سىنىپتاردا وقىتۋ، مەكتەپكە دەيىنگى تاربيە مەن وقىتۋ، دەنە شىنىقتىرۋ جانە سپورت، پەداگوگيكا.
كولىك، جوندەۋ جانە تەحنيكالىق قىزمەت كورسەتۋ: اقپاراتتىق كابەل جەلىلەرى، جولاۋشىلار ۆاگوندارىن جوندەۋ جانە تەحنيكالىق قىزمەت كورسەتۋ.
كاسىپكەرلىك جانە بيزنەس: كاسىپكەرلىك، قىزمەت كورسەتۋدى ۇيىمداستىرۋ.
چەمپيونات سونىمەن قاتار ارنايى جارىستاردى قامتيدى: Abilympics – مۇمكىندىگى شەكتەۋلى ستۋدەنتتەر ءۇشىن، DeafSkills – ەستۋ قابىلەتى بۇزىلعان قاتىسۋشىلار ءۇشىن، JasSkills – مەكتەپ وقۋشىلارى ءۇشىن.
قازىرگى ايماقتىق كەزەڭنىڭ جەڭىمپازدارى 2025 جىلدىڭ كۇزىندە وتەتىن ەل چەمپيوناتىنا قاتىسادى.
جارىستارمەن قاتار قالادا ءبىلىم بەرۋ جانە كاسىپتىك باعدار بەرۋ شارالارى وتكىزىلەدى:
* «100 بەيىندىك سىنىپ» جوباسى اياسىندا 8 باعىت بويىنشا مەكتەپ وقۋشىلارىنىڭ باسقوسۋى: سەرۆيس، IT، مەديسينا، تەمىر جول كولىگى، ديزاين، پەداگوگيكا، تىگىن ءوندىرىسى جانە تەحنيكالىق قىزمەت كورسەتۋ.
* «CHOCOLATINE KAZAKHSTAN 2025» رەسپۋبليكالىق چەمپيوناتى.
* الەۋمەتتىك سەرىكتەستەرمەن بىرگە كوللەدجدەردە ەكسكۋرسيالار مەن شەبەرلىك ساباقتارى.
