قالا اكىمدىگىنىڭ رەسمي سايتىنىڭ مالىمەتىنشە، Astana Smart City دەنساۋلىق ساقتاۋ، سۋ رەسۋرستارىن باسقارۋ، كوگالداندىرۋ، قالدىقتاردى سۇرىپتاۋ، ءبىلىم بەرۋ، كولىك جانە كوممۋنالدىق قىزمەتتەر سياقتى ءتۇرلى سالانى قامتيدى. باعدارلاماعا قاتىسۋ ءۇشىن الەمنىڭ تۇكپىر-تۇكپىرىندەگى MVP جانە ودان جوعارى ساتىداعى جوبالارى بيىل 7 شىلدەگە دەيىن ءوتىنىم بەرە الادى. 

– باعدارلاما بىرنەشە نەگىزگى مىندەتتى شەشۋدى كوزدەيدى. ەڭ الدىمەن، ستارتاپتارعا يننوۆاسيالىق شەشىمدەردى ناقتى قالا جاعدايىندا سىناپ، قاداعالاۋدىڭ بىرەگەي مۇمكىندىگى ۇسىنىلادى. قالا پروسەستەرىن وڭتايلاندىرۋ ءۇشىن جاساندى ينتەللەكت تەحنولوگيالارىن دامىتۋعا ەرەكشە دەن قويىلادى. باعدارلامانىڭ ماڭىزدى اسپەكتىسى – قالا ينفراقۇرىلىمى مەن قىزمەتتەرىن جاقسارتۋ ءۇشىن وزىق شەشىمدەر ۇسىنۋ، - دەپ جازىلعان astanahub پورتالىندا. 

Astana Smart City قاتىسۋشىلارىنا قولداۋ كورسەتۋ ءۇشىن Astana Hub تەحنوپاركىنىڭ Seed Money باعدارلاماسى ارقىلى قارجىلاندىرۋ جۇزەگە اسىرىلادى. اتاپ ايتقاندا، 10 ۇزدىك جوبانىڭ ءارقايسىسىنا 5 ملن تەڭگەگە دەيىنگى قاراجات ۇسىنىلادى. باعدارلاما استانانىڭ اقپاراتتىق تەحنولوگيالار ورتالىعى رەتىندەگى مارتەبەسىن نىعايتىپ، ازىرلەنگەن شەشىمدەردى سىرتقى نارىققا ماسشتابتاۋ مەن ەكسپورتتاۋعا مۇمكىندىك بەرىپ، قالانىڭ باسەكەگە قابىلەتتىلىگىن ارتتىرادى جانە يننوۆاسيالىق ەكونوميكانى دامىتۋعا ىقپال ەتەدى دەپ كۇتىلۋدە. 

قاتىسۋشىلاردى ىرىكتەۋ بارىسى ونلاين ءوتىنىم قابىلداۋ، باستاپقى سكرينينگ، ساراپشىلارمەن سۇحبات جانە 20 ستارتاپ تاڭدالاتىن اقتىق كەزەڭدى قامتيدى. 

باعدارلاما 5 تامىزدا باستالىپ، 3 اي بويى وفلاين فورماتتا وتەدى. وقىتۋ شەڭبەرىندە قاتىسۋشىلار سالا ماماندارىمەن بايلانىس ورناتىپ، ساراپشىلارمەن توپتىق سەمينارلارعا قاتىسىپ، جەكە كونسۋلتاسيالار الا الادى. سونداي-اق ولارعا جەلىلىك ترەكەرلەرمەن ترەكشن-كەزدەسۋلەر جانە ءار اپتا سايىن جەتەكشى ترەكەر كەڭەسى ۇسىنىلادى. ستارتاپتار ءوز شەشىمدەرىن مەكەمەلەردە سىناقتان وتكىزىپ، وسىلايشا IT-شەشىمدەردى جەتىلدىرۋ جانە ولاردى ەلوردا تۇرعىندارى قاجەتتىلىكتەرىنە قاراي بەيىمدەۋ مۇمكىندىگىنە يە بولادى.

باعدارلامانىڭ شەشۋشى كەزەڭىندە Demo Day ۇيىمداستىرىلادى، مۇندا قاتىسۋشىلار پيلوتتىق جوبا ناتيجەلەرىن اكىمدىك وكىلدەرى مەن ەكوجۇيە ساراپشىلارى نازارىنا ۇسىنادى. ەڭ ۇتىمدى IT-شەشىمدەر ءارى قاراي قولدانىسقا ەنگىزۋ ءۇشىن تاڭدالادى. 

Astana Smart City باعدارلاماسى جانە قاتىسۋعا ءوتىنىم بەرۋ جونىندەگى مالىمەتتەردى astanahub.com پلاتفورماسىنان تابۋعا بولادى.