Elorda ákimdigi Astana Hub jáne Astana Innovations-pen birlesip, Astana Smart City akseleratoryn iske qosty,dep habarlaidy Dalanews.kz.
Qala ákimdiginiń resmi saitynyń málimetinshe, Astana Smart City densaýlyq saqtaý, sý resýrstaryn basqarý, kógaldandyrý, qaldyqtardy suryptaý, bilim berý, kólik jáne kommýnaldyq qyzmetter siiaqty túrli salany qamtidy. Baǵdarlamaǵa qatysý úshin álemniń túkpir-túkpirindegi MVP jáne odan joǵary satydaǵy jobalary biyl 7 shildege deiin ótinim bere alady.
– Baǵdarlama birneshe negizgi mindetti sheshýdi kózdeidi. Eń aldymen, startaptarǵa innovatsiialyq sheshimderdi naqty qala jaǵdaiynda synap, qadaǵalaýdyń biregei múmkindigi usynylady. Qala protsesterin ońtailandyrý úshin jasandy intellekt tehnologiialaryn damytýǵa erekshe den qoiylady. Baǵdarlamanyń mańyzdy aspektisi – qala infraqurylymy men qyzmetterin jaqsartý úshin ozyq sheshimder usyný, - dep jazylǵan astanahub portalynda.
Astana Smart City qatysýshylaryna qoldaý kórsetý úshin Astana Hub tehnoparkiniń Seed Money baǵdarlamasy arqyly qarjylandyrý júzege asyrylady. Atap aitqanda, 10 úzdik jobanyń árqaisysyna 5 mln teńgege deiingi qarajat usynylady. Baǵdarlama Astananyń aqparattyq tehnologiialar ortalyǵy retindegi mártebesin nyǵaityp, ázirlengen sheshimderdi syrtqy naryqqa masshtabtaý men eksporttaýǵa múmkindik berip, qalanyń básekege qabilettiligin arttyrady jáne innovatsiialyq ekonomikany damytýǵa yqpal etedi dep kútilýde.
Qatysýshylardy irikteý barysy onlain ótinim qabyldaý, bastapqy skrining, sarapshylarmen suhbat jáne 20 startap tańdalatyn aqtyq kezeńdi qamtidy.
Baǵdarlama 5 tamyzda bastalyp, 3 ai boiy oflain formatta ótedi. Oqytý sheńberinde qatysýshylar sala mamandarymen bailanys ornatyp, sarapshylarmen toptyq seminarlarǵa qatysyp, jeke konsýltatsiialar ala alady. Sondai-aq olarǵa jelilik trekerlermen trekshn-kezdesýler jáne ár apta saiyn jetekshi treker keńesi usynylady. Startaptar óz sheshimderin mekemelerde synaqtan ótkizip, osylaisha IT-sheshimderdi jetildirý jáne olardy elorda turǵyndary qajettilikterine qarai beiimdeý múmkindigine ie bolady.
Baǵdarlamanyń sheshýshi kezeńinde Demo Day uiymdastyrylady, munda qatysýshylar pilottyq joba nátijelerin ákimdik ókilderi men ekojúie sarapshylary nazaryna usynady. Eń utymdy IT-sheshimder ári qarai qoldanysqa engizý úshin tańdalady.
Astana Smart City baǵdarlamasy jáne qatysýǵa ótinim berý jónindegi málimetterdi astanahub.com platformasynan tabýǵa bolady.
