پرەزيدەنت توقايەۆ بيىلعى جولداۋىندا ەلىمىزدىڭ اگروونەركاسىپ سەكتورىن دامىتۋ بويىنشا سالالىق مينيسترلىك پەن ءوڭىر اكىمدەرىنە ناقتى مىندەت جۇكتەگەن ەدى. 

شىعىس قازاقستان وبلىسىنىڭ اكىمى دانيال احمەتوۆتىڭ اتاپ وتكەنىندەي وڭىردە وسىمدىك شارۋاشىلىعىن دامىتۋ باعدارلاماسى ىسكە اسىرىلىپ جاتىر، تيىمدىلىگى جوعارى داقىلداردىڭ القاپتارىن ۇلعايتا وتىرىپ، ەگىستىكتى ءارتاراپتاندىرۋ جۇرگىزىلۋدە.

«شىعىس قازاقستانعا ەلىمىزدە وسىرىلەتىن كۇنباعىس كولەمىنىڭ 66%-ى كەلەتىنىن ەسكەرسەك، ءبىزدىڭ باستى مىندەتىمىز – ونى قايتا وڭدەۋ كولەمىن ۇلعايتۋ»، — دەيدى ول.

نارىققا جوعارى ساپالى دايىن ءونىمدى شىعارۋ ءۇشىن وسى جىلدىڭ باسىنان بەرى وبلىستا قۋاتى 300 مىڭ توننا ءىرى ماي ەكستراكسيالاۋ زاۋىتى («Altyn Shyghys» ج ش س) پايدالانۋعا بەرىلدى، وسكەمەن قالاسىندا قۋاتى جىلىنا 50 مىڭ توننا كۇنباعىس مايى زاۋىتى («ALTAI MAI» ج ش س) سالىنىپ جاتىر.

وسىلايشا، جاڭا ماي ەكستراكسيالاۋ زاۋىتتارىنىڭ ىسكە قوسىلۋى جۇمىس ىستەپ تۇرعان وندىرىستەردى ەسكەرە وتىرىپ، قايتا وڭدەۋ كولەمىن 1 ملن تونناعا دەيىن، وسىمدىك مايلارىنىڭ ەكسپورتىن 1،3 ەسە ۇلعايتۋعا مۇمكىندىك بەرەدى.

احمەتوۆتىڭ ايتۋىنشا ءوڭىر باسشىلىعى ايماقتاعى بيزنەس-احۋالدى جاقسارتۋ جانە كاسىپكەرلىكتى جان-جاقتى قولداۋ باعىتىندا اۋقىمدى ءىس-شارالار اتقارۋدا.

"شاعىن جانە ورتا بيزنەس – ناقتى سەكتور تيىمدىلىگىنىڭ ماڭىزدى كورسەتكىشى، بۇل سالا ءبىزدىڭ جۇمىسىمىزدىڭ باسىمدىعى بولىپ قالا بەرمەك"، — دەدى اكىم.

اكىم ءمالىم ەتكەندەي بيىلعى جىلدىڭ باسىنان باستاپ بارلىق مەملەكەتتىك باعدارلامالار اياسىندا 4،4 ملرد تەڭگەگە شاعىن جانە ورتا بيزنەستىڭ 98 جوباسى سۋبسيديالانىپ، كەپىلدەندىرىلدى، بۇل نەگىزگى كاپيتالعا ينۆەستيسيالار كولەمىنىڭ 107،2%-عا (174،7 ملرد تەڭگە) جانە شوب-تان بيۋدجەتكە تولەنەتىن تولەمدەردىڭ 116،6-عا (54 ملرد تەڭگە) وسۋىنە ىقپال ەتكەن.