ءماجىلىس تاۋارلاردىڭ شىعارىلعان ەلىن ايقىنداۋ ماسەلەلەرى بويىنشا تۇزەتۋلەردى ءبىرىنشى وقىلىمدا ماقۇلدادى. زاڭ جوباسى قازاقستاندىق تاۋار وندىرۋشىلەردى جانە ولار وندىرەتىن تاۋارلاردى سايكەستەندىرۋدىڭ وڭتايلى جۇيەسىن قۇرۋعا باعىتتالعان، بۇل كەيىن مەملەكەتتىك قولداۋ كورسەتۋدىڭ تيىمدىلىگىن ارتتىرۋعا مۇمكىندىك بەرەدى، دەپ جازادى Dalanews.kz.
"نەگىزگى وزگەرىستىڭ ءبىرى – قازاقستاندىق تاۋار وندىرۋشىلەردىڭ ءتىزىلىمىن قۇرۋدى رەتتەۋ. بۇل جاڭا مەملەكەتتىك اقپاراتتىق جۇيەدە قازاقستاندىق وندىرۋشىلەر مەن ولار وندىرەتىن تاۋارلار تۋرالى اقپارات بولادى. ءتىزىلىم قولدانىستاعى "CT-KZ" نىسانىنداعى سەرتيفيكاتتار مەن يندۋستريالىق سەرتيفيكاتتى اۋىستىرۋعا ارنالعان. وندىرۋشىلەر تىزىلىمگە ەنگىزۋگە وتىنىمدەردى جەكە كابينەتى ارقىلى بەرە الادى. سالالىق مەملەكەتتىك ورگاندار مەن بىرلەستىكتەردى تارتا وتىرىپ، ونەركاسىپ جانە قۇرىلىس مينيسترلىگىنىڭ كوشپەلى كوميسسياسى ءوندىرىستى سيفرلىق تەكسەرۋدەن جانە باعالاۋدان كەيىن ءوندىرۋشىنى تىزىلىمگە ەنگىزۋ نەمەسە ەنگىزبەۋ تۋرالى شەشىم قابىلدايدى"، دەلىنگەن 2025 جىلعى 22 قاڭتارداعى ءماجىلىس باسپا ءسوز قىزمەتىنىڭ حابارلاماسىندا.
وسىلايشا "جالعان وندىرۋشىلەردىڭ" نەمەسە قازاقستاندىق ەمەس وندىرۋشىلەردىڭ مەملەكەتتىك قولداۋ شارالارىن الۋىنا توسقاۋىل قويۋ جوسپارلانىپ وتىر. ياعني، وندىرۋشىلەر "قازاقستاندا جاسالعان" برەندىمەن ساتۋعا دايىن ءونىمدى يمپورتتاماي، ناقتى تاۋار وندىرەتىنىن دالەلدەۋى كەرەك.
تىزىلىمگە ەنگىزىلگەن كاسىپورىندار رەتتەلەتىن ساتىپ الۋعا قاتىسۋ مۇمكىندىگىنە يە بولادى.
"CT-KZ" نىسانىنداعى سەرتيفيكاتتار مەن يندۋستريالىق سەرتيفيكاتتار 2026 جىلعى 1 قاڭتارىنا دەيىن قولدانىستا قالادى.
سونداي-اق زاڭ جوباسىندا العاش رەت قازاقستاننان شىققان تاۋارلار مەن قازاقستاندىق وندىرۋشىلەردىڭ زاڭدى انىقتامالارى قاراستىرىلعان.
ال جەر قويناۋىن پايدالانۋشىلار مەن كۆازيمەملەكەتتىك سەكتور قازاقستاندىق وندىرۋشىلەردەن تاۋار ساتىپ الۋعا مىندەتتى بولادى.
تاۋارلاردىڭ شىققان ەلىن انىقتاۋ ماسەلەلەرى بويىنشا تۇزەتۋلەر اياسىندا دەپۋتاتتار كۆازيمەملەكەتتىك سەكتور، تابيعي مونوپوليالار سۋبەكتىلەرى، سونداي-اق جەر قويناۋىن پايدالانۋشىلار ءۇشىن قاتتى پايدالى قازبالاردى ءوندىرۋ بويىنشا جاڭا مىندەتتەمەلەر ەنگىزۋدى ۇسىنىپ وتىر.
اتاپ ايتقاندا، جەر قويناۋىن پايدالانۋشىلار ءۇشىن ليسەنزيالاۋ شارتتارىن قاتتى پايدالى قازبالاردى ءوندىرۋ بويىنشا ىشكى قۇندىلىقتى دامىتۋ باعدارلامالارىن ىسكە اسىرۋ جونىندەگى مىندەتتەمەلەرمەن تولىقتىرۋ ۇسىنىلادى. سونداي-اق سالانى دامىتۋعا باعىتتالعان كەلىسىمدەردى جوسپارلاۋ جانە جاساسۋ راسىمدەرىن جۇزەگە اسىرۋ قاراستىرىلعان. مۇنداي كومپانيالار اقپاراتتىق جۇيەدە بەلگىلى ءبىر تاۋارلاردى ساتىپ الۋعا قاجەتتىلىكتەرىن ورنالاستىرۋعا مىندەتتى بولادى.
"ياعني، وسى تەتىك ارقىلى كۆازيمەملەكەتتىك سەكتورداعى كومپانيالارعا، تابيعي مونوپوليالار سۋبەكتىلەرىنە، جەر قويناۋىن پايدالانۋشىلارعا تاۋار جەتكىزگىسى كەلەتىن شاعىن جانە ورتا كاسىپكەرلىك سۋبەكتىلەرى ولاردىڭ ساتىپ الۋلارىنا باسىمدىقپەن قاتىسۋ ارقىلى ءوز ونىمدەرىن جەتكىزە الادى. تالاپتار جاسالعان كۇنىنە قاراماستان، قاتتى پايدالى قازبالاردى وندىرۋگە ارنالعان بارلىق قولدانىستاعى كەلىسىمشارت پەن ليسەنزيالارعا قولدانىلادى"، دەلىنگەن حابارلامادا.
بۇعان دەيىن سايتىمىزدا "ۇلتتىق كومپانيالارىمىزعا نە بولعان؟ دەپۋتاتتار نەگە ءۇنسىز" دەگەن ماقالا جاريالانعان بولاتىن.
