بەلگىلى زاڭگەر ەرجان ەسىمحانوۆ قۋاندىق بيشىمبايەۆتىڭ ىسىنە قاتىستى 3 ساۋىردە وتكەن سوت وتىرىسىنا پىكىر ءبىلدىردى، - دەپ حابارلايدى Dalanews.kz.
"ەگەر ارسىزدىق نە ەكەنىن بىلمەگەن بولساڭىزدار بۇگىن ءبىز وعان كۋا بولدىق. بۇگىن قورقاقتىق دەگەن نە ەكەنىنە دە كۋا بولدىق. بۇل ەلدى 30 جىلدان ارتىق بيلەگەن ادامداردىڭ بەينەسى. كوپتەگەن ادام "نەگە ءدال وسى پروسەسكە نازار قاتتى اۋىپ كەتتى؟ ەلدە باسقا پروبلەما جوق پا؟" دەپ سۇراپ جاتادى. بىرەۋلەر سۋ تاسقىنى تۋرالى ءسوز قوزعايدى. ءيا، ونىڭ ءبارى راس. ەلدە پروبلەما جەتىپ ارتادى. ءبىراق ءدال ءقازىر بۇكىل ەل بيشىمبايەۆتىڭ پروسەسىن كورىپ وتىر.
مەن ەلدە 40 جىل تۇرىپ، 20 جىلدان بەرى جۇمىس ىستەپ جۇرگەن اداممىن جانە ونى (بيشىمبايەۆتى) تىڭداپ وتىرىپ، جاعامدى ۇستادىم. ونىڭ ايەلىن قالاي سوققىعا جىققانىن بىلاي قويعاندا، ۇلتتىق ەكونوميكا مينيسترلىگىن باسقارعان ادام ايەلى ءتۇرلى جاراقات العاننان كەيىن دارىگەرگە ەمەس، بالگەرگە حابارلاسقانى تاڭعالدىردى"، - دەيدى زاڭگەر.
ول ەلدەگى سۋ تاسقىنى ماسەلەسىن دە قوزعاي كەتتى.
"ەلدەگى سۋ تاسقىنى نەدەن شىققانى دا بەلگىلى بولدى. تاسقىنمەن كۇرەس – ول عىلىمنىڭ، ينجەنەرلەردىڭ، گەولوگتاردىڭ، گيدرولوگتاردىڭ جۇمىسى. قانداي دا ءبىر پروبلەما بولسا سول سالاداعى ادامعا جۇگىنۋ – ويلاۋ ءتاسىلىنىڭ ءبىرى. ال ءبىزدىڭ ەلدى ماماندارعا ەمەس، بالگەرلەرگە جۇگىنەتىن ەلدەر باسقارعان. بيشىمبايەۆ ءىسى مەن سۋ تاسقىنى – تاياقتىڭ ەكى ۇشى، بۇل ەلدەگى پروسەستەردى كاسىبي ماماندار ەمەس، كەزدەيسوق ادامدار باسقارىپ وتىرعانىن كورسەتىپ وتىر"، - دەيدى ەسىمحانوۆ.
ول بيشىمبايەۆ پروسەسى – ەلدىڭ ايناسى ەكەنىن ايتادى.
"ال ءبىز – جاقىنىنا قول كوتەرمەگەن، بالاسىنا دۇرىس تاربيە بەرىپ، ادال ەڭبەكپەن اقشا تاۋىپ وتىرعان ادامدار ەلىمىزدە شىن مانىندە نە بولىپ جاتقانىن ءتۇسىنۋ ءۇشىن وسىنداي پروسەستەردى قالدىرماي كورۋىمىز كەرەك. ادىلەتتىلىك، سۋديالار مەن پروكۋرورلار، مينيسترلەر مەن كۇيەۋلەر قانداي ەكەنىن كورۋ كەرەك. سەبەبى دەنى ساۋ ادام اينالاسىنداعىلاردىڭ دا ەسى دۇرىس دەپ ويلايدى. ال شىن مانىندە ولاي ەمەس.
بيشىمبايەۆ پروسەسى – تەراپيا سەكىلدى. ادام اۋرۋى اسقىنعاننان كەيىن عانا تەراپيادان وتسە، ودان ايىعۋ دا اۋىر بولادى. ءبىراق سول تەراپيادان ءوتۋ كەرەك، سەبەبى بۇل سول پروبلەمانىڭ جالعىز شەشىمى. پروبلەمانىڭ بار ەكەنىن مويىنداماساڭ ونىمەن كۇرەسە المايسىڭ"، - دەيدى زاڭگەر.
ايتا كەتەيىك، بۇعان دەيىن ەرجان ەسىمحانوۆ "بيشىمبايەۆ ءىسى" ەلدەگى سوت جۇيەسىنىڭ قانداي كۇيدە ەكەنىن اشكەرەلەپ بەرگەنىن ايتقان بولاتىن.
ايتا كەتەيىك، الەۋمەتتىك جەلىدە قازاقستاندىقتار سۋديا، پروكۋرور مەن ادۆوكاتتاردىڭ دورەكىلىگىنە نارازى بولعان. زاڭگەردىڭ سوزىنشە،ولاردىڭ ءوزىن ۇستاۋىنا تاڭعالۋدىڭ قاجەتى جوق.
"بۇل بۇكىل ەل ونلاين كورۋگە مۇمكىندىك العان اۋقىمدى پروسەسس، سوندىقتان كاسىبي ماماندار دا، قاتىسى جوق ادامدار دا پروسەسكە قاتىستى پىكىر بىلدىرۋگە تىرىسىپ جاتىر. ولاردىڭ كوبى پروسەسس قالاي ءوربىپ جاتقانىنا نارازى. پروكۋرورلار سەلقوس، ايىپتالۋشىنىڭ ادۆوكاتتارى دورەكى، سۋديا پروسەستى باقىلاۋدا ۇستاماي وتىر دەيدى. سوندىقتان ادامداردا پروسەسس باقىلاۋدا تۇر، شەشىم بەلگىلى، ادىلدىك بولمايدى دەگەندەي وي قالىپتاسقانداي بولعان.
بۇل قالىپتى نارسە، اركىم ءوز ويىن ايتۋعا قۇقىلى. ءبىراق ءبىر نيۋانس بار. مۇنى بۇعان دەيىن سوت پروسەستەرىنە قاتىسقان ادام تۇسىنەدى. ولاردىڭ ءوزىن بۇلاي ۇستاۋى جاڭالىق ەمەس، ولار ءوزىن ۇنەمى وسىلاي ۇستايدى. ۇنەمى. پروكۋرورلار سەلقوس. ءبىر تۇجىرىمدى قايتالاي بەرەدى. زاڭگەرلەر ولار نە ءۇشىن ءبىر نارسەنى قايتالاي بەرەتىنىن تۇسىنەدى، ايىپتاۋشى تاراپتىڭ بەلگىلى ءبىر پروسەدۋرالىق مىندەتى بار، ولار سول تاپسىرمانى ورىنداۋى كەرەك"، - دەيدى زاڭگەر.
