Belgili zańger Erjan Esimhanov Qýandyq Bishimbaevtyń isine qatysty 3 sáýirde ótken sot otyrysyna pikir bildirdi, - dep habarlaidy Dalanews.kz.
"Eger arsyzdyq ne ekenin bilmegen bolsańyzdar búgin biz oǵan kýá boldyq. Búgin qorqaqtyq degen ne ekenine de kýá boldyq. Bul eldi 30 jyldan artyq bilegen adamdardyń beinesi. Kóptegen adam "nege dál osy protseske nazar qatty aýyp ketti? Elde basqa problema joq pa?" dep surap jatady. Bireýler sý tasqyny týraly sóz qozǵaidy. Iá, onyń bári ras. Elde problema jetip artady. Biraq dál qazir búkil el Bishimbaevtyń protsesin kórip otyr.
Men elde 40 jyl turyp, 20 jyldan beri jumys istep júrgen adammyn jáne ony (Bishimbaevty) tyńdap otyryp, jaǵamdy ustadym. Onyń áielin qalai soqqyǵa jyqqanyn bylai qoiǵanda, ulttyq ekonomika ministrligin basqarǵan adam áieli túrli jaraqat alǵannan keiin dárigerge emes, balgerge habarlasqany tańǵaldyrdy", - deidi zańger.
Ol eldegi sý tasqyny máselesin de qozǵai ketti.
"Eldegi sý tasqyny neden shyqqany da belgili boldy. Tasqynmen kúres – ol ǵylymnyń, injenerlerdiń, geologtardyń, gidrologtardyń jumysy. Qandai da bir problema bolsa sol saladaǵy adamǵa júginý – oilaý tásiliniń biri. Al bizdiń eldi mamandarǵa emes, balgerlerge júginetin elder basqarǵan. Bishimbaev isi men sý tasqyny – taiaqtyń eki ushy, bul eldegi protsesterdi kásibi mamandar emes, kezdeisoq adamdar basqaryp otyrǵanyn kórsetip otyr", - deidi Esimhanov.
Ol Bishimbaev protsesi – eldiń ainasy ekenin aitady.
"Al biz – jaqynyna qol kótermegen, balasyna durys tárbie berip, adal eńbekpen aqsha taýyp otyrǵan adamdar elimizde shyn máninde ne bolyp jatqanyn túsiný úshin osyndai protsesterdi qaldyrmai kórýimiz kerek. Ádilettilik, sýdialar men prokýrorlar, ministrler men kúieýler qandai ekenin kórý kerek. Sebebi deni saý adam ainalasyndaǵylardyń da esi durys dep oilaidy. Al shyn máninde olai emes.
Bishimbaev protsesi – terapiia sekildi. Adam aýrýy asqynǵannan keiin ǵana terapiiadan ótse, odan aiyǵý da aýyr bolady. Biraq sol terapiiadan ótý kerek, sebebi bul sol problemanyń jalǵyz sheshimi. Problemanyń bar ekenin moiyndamasań onymen kúrese almaisyń", - deidi zańger.
Aita keteiik, buǵan deiin Erjan Esimhanov "Bishimbaev isi" eldegi sot júiesiniń qandai kúide ekenin áshkerelep bergenin aitqan bolatyn.
Aita keteiik, áleýmettik jelide qazaqstandyqtar sýdia, prokýror men advokattardyń dórekiligine narazy bolǵan. Zańgerdiń sózinshe,olardyń ózin ustaýyna tańǵalýdyń qajeti joq.
"Bul búkil el onlain kórýge múmkindik alǵan aýqymdy protsess, sondyqtan kásibi mamandar da, qatysy joq adamdar da protseske qatysty pikir bildirýge tyrysyp jatyr. Olardyń kóbi protsess qalai órbip jatqanyna narazy. Prokýrorlar selqos, aiyptalýshynyń advokattary dóreki, sýdia protsesti baqylaýda ustamai otyr deidi. Sondyqtan adamdarda protsess baqylaýda tur, sheshim belgili, ádildik bolmaidy degendei oi qalyptasqandai bolǵan.
Bul qalypty nárse, árkim óz oiyn aitýǵa quqyly. Biraq bir niýans bar. Muny buǵan deiin sot protsesterine qatysqan adam túsinedi. Olardyń ózin bulai ustaýy jańalyq emes, olar ózin únemi osylai ustaidy. Únemi. Prokýrorlar selqos. Bir tujyrymdy qaitalai beredi. Zańgerler olar ne úshin bir nárseni qaitalai beretinin túsinedi, aiyptaýshy taraptyń belgili bir protsedýralyq mindeti bar, olar sol tapsyrmany oryndaýy kerek", - deidi zańger.
