ەنەرگەتيكا ءمينيسترى الماسادام ساتقالييەۆ قازاقستاندا ەكىنشى اتوم ەلەكتر ستانسياسىن (اەس) سالۋ بويىنشا رەفەرەندۋم وتكىزۋگە قاتىستى سۇراققا جاۋاپ بەردى، دەپ حابارلايدى Dalanews.kz.
ساتقالييەۆتىڭ ايتۋىنشا، رەفەرەندۋم وتكىزۋ قاجەتتىلىگى جوق جانە ول وتكىزىلمەيدى.
“زاڭناماعا سايكەس، بۇل ستانسيا ۇكىمەتتىڭ شەشىمى بويىنشا سالىنادى”، – دەپ جاۋاپ بەردى ول.
بۇگىن ۇكىمەتتىڭ كەڭەيتىلگەن وتىرىسى بارىسىندا مەملەكەت باسشىسى قاسىم-جومارت توقايەۆ ۇكىمەتكە ەكىنشى اەس سالۋعا ورىن ىزدەۋدى تاپسىردى.
سونىمەن قاتار،
ۇكىمەتتىڭ كەڭەيتىلگەن وتىرىسىندا پرەمەر-مينيستر ولجاس بەكتەنوۆ بيىل قازاقستاندا ءۇش اەس سالىنۋى مۇمكىن ەكەنىن مالىمدەدى.
"الماتى وبلىسىندا العاشقى اەس سالۋ بويىنشا قاجەتتى كەلىسىمدەر جاقىن ارادا جاسالادى. سونداي-اق ەكىنشى جانە ءۇشىنشى اتوم ەلەكتر ستانسيالارىن سالۋعا بولاتىن ايماقتاردى انىقتاۋ بويىنشا تالداۋ جۇمىستارى اياقتالۋعا جاقىن"، – دەدى بەكتەنوۆ.
ەسكە سالايىق، الماتى وبلىسى جامبىل اۋدانى ۇلكەن اۋىلى ماڭىندا قۋاتتىلىعى 2–2،8 گۆت بولاتىن اتوم ەلەكتر ستانسياسىن سالۋ ماسەلەسى تالقىلانىپ جاتىر.
مينيسترلىك وكىلدەرىنىڭ مالىمەتىنشە، يادرولىق تەحنولوگيا جەتكىزۋشى الەۋەتتى كومپانيالارمەن كەلىسسوزدەر جۇرگىزىلىپ جاتىر. سونىمەن قاتار ۇسىنىستاردى باسەكەلەستىك نەگىزدە قاراستىراتىن ۇكىمەتارالىق كوميسسيا قۇرىلعان.
