ديماش قۇدايبەرگەن الەمدىك مۋزىكا سالاسىنداعى ايتۋلى جوبا Grammy Global Spin-گە قاتىستى، دەپ حابارلايدى Dalanews.kz.

4 جەلتوقساندا «Grammy» سىيلىعىنىڭ رەسمي سايتىندا جانە ونىڭ YouTube ارناسىندا ديماش قۇدايبەرگەننىڭ ءوز اۆتورلىق تۋىندىسى — «Fire» كومپوزيسياسىن ورىنداعان جاڭا بەينەجازباسى جاريالاندى.

قازان ايىندا نيۋ-يوركتەگى ايگىلى Madison Square Garden ساحناسىندا قازاق ونەرىن جوعارى دەڭگەيدە تانىستىرىپ، زور جەتىستىككە جەتكەننەن كەيىن، ءانشى امەريكانىڭ بەدەلدى مۋزىكالىق الاڭدارىنىڭ ءبىرى Grammy.com جانە ۇلتتىق دىبىس جازۋ ونەرى مەن عىلىمدارى اكادەمياسىمەن شىعارماشىلىق سەرىكتەستىك ورناتقان.

2021 جىلدىڭ قىركۇيەگىندە ىسكە قوسىلعان Global Spin جوباسى الەمنىڭ ءار تۇكپىرىندەگى ارتىستەردى قولداۋعا ارنالعان. بۇل جوباعا K-pop جۇلدىزدارى، نيگەريالىق حيپ-حوپ وكىلدەرى، شوتلاند فولك باعىتىنىڭ مۋزىكانتتارى جانە باسقا دا حالىقارالىق دەڭگەيدەگى ورىنداۋشىلار قاتىسقان. جوبانىڭ ءار شىعارىلىمى بەلگىلى ءبىر ءارتىس پەن ونىڭ ەلىنىڭ مادەنيەتىن تانىستىراتىن ەكسكليۋزيۆتى تىكەلەي ورىنداۋدان تۇرادى.

دىبىس جازۋ اكادەمياسى اقش-تاعى ورىنداۋشىلاردىڭ، كومپوزيتورلاردىڭ، پروديۋسەرلەردىڭ، دىبىس ماماندارىنىڭ قۇقىعىن قورعاۋمەن قاتار، الەمدەگى ەڭ بەدەلدى ماراپات — «Grammy» سىيلىعىن ۇيىمداستىرادى.

مۇنداي ۇيىمنىڭ قولداۋى — الەمدىك ساحنادا تۋعان ەلىنىڭ مادەنيەتىن تانىتىپ جۇرگەن ءارتىس ءۇشىن اسا ماڭىزدى جەتىستىك.