– ونەرلى وتباسىندا تۋىلىپسىڭ، قارشادايىڭنان ءانشى بولۋدى ارماندادىڭ با؟
– ونەرلى وتباسىندا تۋىلعانىما، وسىنداي اتا-انام بولعانىنا ءوزىمدى ەرەكشە باقىتتى سەزىنەمىن. اتا-انام ونەر ادامدارى بولماعاندا، قانشا قۇلشىنعانىممەن، ءانشى بولۋىم ەكىتالاي ەدى.
– سەنىڭشە قالاي جاقسى ءانشى بولۋعا بولادى؟
– مەنىڭشە، مۋزىكالىق جاعىنان تابىسقا جەتۋ ءۇشىن كاسىبي قابىلەت باسىم بولۋ كەرەك. ەڭ ماڭىزدىسى، ءاندى جۇرەكپەن ايتا ءبىلۋىڭ كەرەك. مەن مايكل دجەكسوننىڭ، دجەكي چاننىڭ، لۋچانو ءپاۆاروتتيدىڭ جانكۇيەرىمىن. ولاردىڭ بارلىعى تاباندى ماڭداي تەردىڭ ارقاسىندا تابىسقا جەتكەن. بارىنەن دە ماڭىزدىسى، ولاردىڭ ءبارى الەمدىك دەڭگەيدەگى جۇلدىزدار بولسا دا، ەرەكشە كىشىپەيىل، باۋىرمال جاندار. سوندىقتان مەن ولاردى ۇلگى تۇتامىن.
– ونەر جولىڭدا ساعان ەرەكشە ىقپال ەتكەن ادام بولدى ما، سول تۋرالى ايتىپ بەرسەڭ؟
– ماعان ەرەكشە اسەر ەتكەن ادام، ارينە، مەنىڭ اتا-انام. سول كىسىلەردىڭ ارقاسىندا وسى كۇنگە جەتتىم. ۇستازدارىما دا ەرەكشە العىس ايتامىن. ولار ءارقاشاندا ماعان قولۇشىن بەرىپ، مەنى قولداپ كەلەدى. ءارى مەنىڭ كاسىبي دەڭگەيىمنىڭ وسۋىنە ماعان مول ءبىلىم بەردى.
– قازاق، ورىس، يتاليان، فرنسۋز تىلدەرىندە، ءتىپتى جۇڭگو تىلىندە ءان ايتىپ الەمدى تاڭعالدىردىڭ. وسى تىلدەردى قالاي ۇيرەندىڭ؟
– مەن كوپ ىزدەنەمىن. وپەرالىق باعىتتا ءان ايتاتىن بولعاندىقتان، الەمنىڭ ءارتۇرلى تىلدەرىندە ايگىلى وپەرالاردى ورىنداپ كوردىم. ارينە، قۇلشىنا ۇيرەنۋ كەرەك. الدىمەن وسى ەلدەردىڭ مۋزىكاسى مەن اۋەنىن ۇناتۋ كەرەك. سوسىن ءان ءماتىنىن ۇيرەنەسىڭ. وسى اندەردى ءتىپتى تولىق تۇسىنە الاسىڭ. ۇستازدارىمنىڭ كومەگىمەن وسى تىلدەردى ۇيرەنۋگە تىرىسىپ، شەتەلدىك وپەرالاردى ناقىشىنا كەلتىرىپ ورىندادىم. سول ارقىلى نەمىس، ۋكراين، فرانسۋز، يتاليان، اعىلشىن، تۇرىك تىلدەرىن ۇيرەندىم. ءقازىر جۇڭگو ءتىلىن ۇيرەنىپ ءجۇرمىن.
– قىتايدا ءوتىپ جاتقان «Singer» ءان بايقاۋىنا قالاي كەلدىڭ؟ باسقا حالىقارالىق بايقاۋلارعا قاراعاندا قانداي ەرەكشەلىگىن بايقادىڭ؟
– بايقاۋدىڭ باس رەجيسسەرى، تالىمگەر حۋن تاو بۇرىنعى مەنىڭ حالىقارالىق بايقاۋلاردا ونەر كورسەتكەنىمدى بايقاپ، مەنى وسىندا شاقىردى. «Singer» بايقاۋى – ناعىز انشىلەر ب ا ق سىنايتىن ونەر دوداسى. ۋاقىتى مەن اينالىمى دا ەرەكشە ۇزاق. ول سەنىڭ ساحناداعى ءساتىڭدى عانا ەمەس، ءانشىنىڭ بايقاۋعا دايىندالۋ بارىسىن، سونداي-اق، ساحنادان تىس تۇرمىس-تىرشىلىگىن دە كورسەتەدى. كورەرمەندەرگە ءانشىنىڭ ونەرىمەن بىرگە ءومىرىن دە تولىق تانىستىرادى. مەن بۇرىنعى قاتىسقان بايقاۋلاردان «Singer» جوباسىنىڭ ەڭ ۇلكەن ەرەكشەلىگى –بۇندا مەنەن جاسى ۇلكەن، اتاعى ايگىلى، تابىسقا جەتكەن انشىلەرمەن بىرگە ب ا ق سىناۋعا تۋرا كەلدى.
– «Singer» بايقاۋىندا وزىڭنەن قانداي ناتيجە كۇتەسىڭ؟
– بۇل سۇراق مەن ءۇشىن اۋىر. بايقاۋدىڭ ناتيجەسىنەن بۇرىن، ەڭ باستىسى، كورەرمەندەردىڭ قولداۋىنا يە بولسام دەيمىن. بارىنشا جاقسى ونەر كورسەتىپ، بۇدان دا بيىك بەلەستەرگە ۇمتىلىپ، جانكۇيەرلەرىمنىڭ كوڭىلىنەن شىعامىن دەپ ويلايمىن. ساحناداعى ارەكەتىمە كەيدە ءوزىم دە ءتانتى بولاتىن كەزىم بولادى.
– سەنىڭ ونەرىڭنەن قازاقستان مەن قىتايدىڭ مۋزىكالىق ۇندەستىگىن بايقاعانداي بولدىق. مۇنىڭ سىرى نەدە دەپ ويلايسىڭ؟
– ەكى ەل مۋزىكاسىنىڭ كەيبىر تۇستارى ساباقتاسىپ جاتادى. وزىندىك ەرەكشەلىكتەرى دە از ەمەس. قازاقستان مەن قىتايدىڭ انشىلىك ونەرى جوعارى دەڭگەيدە دامىعان دەپ ايتۋعا بولادى. قىتايلىق كورەرمەندەردىڭ ىستىق ىقىلاسىن كورگەندە بەينە تۋعان جەردەگى دوستارىمنىڭ ىستىق قۇشاعىنا بولەنگەندەي سەزىندىم. قىتايلىق انشىلەردىڭ قازاقستانعا كەلىپ، ونەر كورسەتۋىن قولدايمىن. ءبىزدىڭ ەلىمىزدە ولاردى ەرەكشە قىزۋ قارسى الادى دەپ سەنەمىن.
– قىتايلىق انشىلەردەن كىمدى ۇناتاسىڭ؟ ونىڭ ونەرىن قالاي باعالايسىڭ؟
– مەنىڭ جاقسى كورەتىن انشىلەرىم كوپ. قىتايلىق انشىلەرمەن كوپ كەزدەسۋلەردە بولدىم. بارلىعى وتە قاراپايىم، اشىق-جارقىن، يناباتتى ادامدار ەكەن. مەن تالىمگەر حان حۋندى، لين جىشۋان تالىمگەردى وتە جاقسى كورەمىن. «Singer» باعدارلاماسى ارقىلى لين جىشۋان تالىمگەرمەن تانىستىم. العاش كەزىككەنىمىزدە ول كىسى ماعان سونداي جاقىن سەزىلدى. وتە كىشىپەيىل، جىلى ءجۇزدى ادام.
– جۇڭگو مەن قازاقستان – دوستىق قارىم-قاتىناستاعى كورشى ەلدەر. بيىل قىتايدىڭ قازاقستانداعى تۋريزم جىلى. قازاقستانعا بارعىسى كەلەتىن قىتايلىقتارعا ءوز ەلىڭدى قالاي تانىستىرار ەدىڭ؟
– بيىل ماۋسىم ايىندا قازاقستاندا ەكسپو-2017 حالىقارالىق كورمەسى باستالادى. ەكسپو كورمەسى تۇڭعىش رەت ورتالىق ازيا ەلىندە وتكىزىلەدى. بارلىقتارىڭىزدى قازاقستانعا كەلىپ، ەكسپو كورمەسىن تاماشالاۋعا، قازاقتىڭ اسەم تابيعاتىن كورۋگە، ءدامدى تاعامدارىنان اۋىز تيۋگە شاقىرامىن. ءبارى ساتىمەن بولسا، مەن اتالمىش كورمەدە ءان ايتاتىن بولامىن.
– ءسوز سوڭىندا جانكۇيەرلەرىڭە قانداي تىلەك جولدايسىڭ؟
– ارماندارىڭىزدىڭ ورىندالۋىن، ءومىر جولدارىڭىزداعى كوزدەگەن ماقساتتارىڭىزعا قول جەتكىزۋلەرىڭىزدى تىلەيمىن. ارماننىڭ بارلىعى ورىندالادى. ويتكەنى، سىزدەر مەنىڭ ارمانىمنىڭ ورىندالۋىنا قولداۋ كورسەتتىڭىزدەر. سىزدەردىڭ ءار كۇنىڭىز كوڭىلدى، ءتاتۋ-تاتتى، مەيىرىمدى دە سىيلاستىققا تولۋ بولۋىن تىلەيمىن.
ريزابەك نۇسىپبەك ۇلى
