پاۆلودار وبلىسى اكىمى ءابىلقايىر سقاقوۆتىڭ توراعالىعىمەن وتكەن ءوڭىر اكىمدىگىنىڭ كەڭەيتىلگەن ماجىلىسىندە سويلەگەن مادەنيەت، تىلدەردى دامىتۋ جانە ارحيۆ ءىسى باسقارماسىنىڭ باسشىسى تىلدەردى دامىتۋ مەن قولدانۋدىڭ 2011-2019 جىلدارعا ارنالعان مەملەكەتتىك باعدارلاماسىنىڭ ورىندالۋى تۋرالى اقپارات جەتكىزدى.
ەرنۇر داۋەنوۆتىڭ ايتۋىنشا، باعدارلامادا ايقىندالعان بارلىق كورسەتكىشتەر ورىندالىپ، نەگىزگى ينديكاتورلار ىسكە اسىرىلدى. ماسەلەن، مەملەكەتتىك ءتىلدى مەڭگەرگەندەر ۇلەسى بىلتىر 87،1%-عا، اعىلشىن ءتىلىن – 24،3%-عا، 3 ءتىلدى مەڭگەرگەندەر – 22،2%-عا جەتكەن.
سويتە تۇرا، وبلىستىق مادەنيەت، تىلدەردى دامىتۋ جانە ارحيۆ ءىسى باسقارماسىنىڭ باسشىسى قوعامدا قازاق ءتىلىن قولدانباۋ ماسەلەسىنىڭ وزەكتىلىگىن جوعالتپاعانىن دا جاسىرماي ايتتى. جاعدايدى تۇزەتۋ ماقساتىندا ەرنۇر داۋەنوۆ باسقارمانىڭ وسى باعىتتاعى نەگىزگى ۇستانىمدارىن جەتكىزدى.
– بىرىنشىدەن، ءتىلدىڭ قولدانىسىنا قاجەتتىلىك تۋدىرۋ كەرەك، – دەدى ەرنۇر داۋەنوۆ. – بۇل – اۋلاداعى دۇكەننىڭ ساتۋشىسىنان باستاپ، جۇمىستاعى ارىپتەستەرمەن، جالپى، كۇنى بويى كەزدەسەتىن ادامدارمەن، ونىڭ ىشىندە وزگە ەتنوس وكىلدەرىمەن دە، ەڭ الدىمەن قازاقشا سويلەسۋدى بىلدىرەدى. كەيىننەن كەرەگىن قاجەتتى تىلدە تۇسىندىرۋگە بولادى. سول ارقىلى كوشەدە، قوعامدىق كولىك پەن قىزمەت كورسەتۋ ورىندارىندا، ساۋدا ورتالىقتارىندا، الەۋمەتتىك جەلىلەردە مەملەكەتتىك تىلگە دەگەن سۇرانىستى كوبەيتۋىمىز قاجەت، – دەدى باسقارما باسشىسى.
باسقارما باسشىسىنىڭ وبلىسى اۋماعىندا ەرىكتىلەر جىلىنا وراي ءتىل ەرىكتىلەرىنىڭ وبلىستىق جاساعى قۇرىلدى. ەرنۇر داۋەنوۆتىڭ پىكىرىنشە، قازاق ءتىلىن جەتىك بىلەتىن ءاربىر وبلىس تۇرعىنى – ءتىل ەرىكتىسىنە اينالۋى قاجەت.
ايبەك جۇماتوۆ
فوتو: ۆالەريي بۋگايەۆ
تاعا وقىڭىز:
https://dalanews.kz/50865
