قارجىلىق مونيتورينگ اگەنتتىگى 2024 جىلدى قورىتىندىلاي كەلە، قىلمىسكەرلەر ءوز كىرىستەرىن زاڭداستىرۋ ءۇشىن جەكە تۇلعالاردى بەلسەندى تۇردە پايدالانعانىن ناقتىلايدى. ماسەلەن،6،2 مىڭ "دروپ كارتالار" ارقىلى جىلىستاتىلعان قىلمىستىق اقشا اينالىمى 24 ملرد تەڭگەنى قۇرادى. ال "دروپتارعا" ەلىمىزدىڭ وسال توپتارى وكىلدەرى تارتىلعان، دەپ جازادى Dalanews.kz.
بۇل ارادا مىنا ەكى سوزگە تۇسىنىكتەمە بەرە كەتەلىك:
- دروپتار – بۇل بانكتىك كارتالار مەن شوتتاردى راسىمدەۋ ءۇشىن قولدانىلاتىن جالعان تۇلعالار.
- ينتەرنەت-بانكينگكە قاشىقتان قول جەتكىزۋ ماقساتىندا كاسىبي جىلىستاۋشىلار ءۇشىنشى تۇلعالارعا تىركەلگەن بايلانىس وپەراتورلارىنىڭ SIM كارتالارىن پايدالانعان.
كوبىنەسە "دروپ-كارتالار" ەسىرتكى ساۋداسى، كيبەرالاياقتىق، زاڭسىز قۇمار ويىندار جانە باسقا دا قىلمىستىق ارەكەتتەرگە بايلانىستى سحەمالاردا قولدانىلادى.
"ءىس جۇزىندە "دروپتار" دەپ اتالاتىندار حالىقتىڭ وسال توپتارىنا جاتاتىن ادامدار بولدى (جۇمىسسىزدار، ستۋدەنتتەر، زەينەتكەرلەر جانە باسقالار)، ولار قىلمىستىق سحەمالارداعى رولدەرىنىڭ بارلىق سالدارىن تۇسىنبەيدى. مۇنداي كارتالاردىڭ يەلەرىنىڭ 90%-دان استامى رەزيدەنت ەمەس تۇلعالار بولعان. ولار تۋرالى اقپارات شەتەلدىك مەملەكەتتەردىڭ قۇقىق قورعاۋ ورگاندارىنا بەرىلدى"، دەلىنگەن قما حابارلاماسىندا.
مۇنداي زاڭسىز ارەكەتتەردى بولدىرماۋ ءۇشىن قارجىلىق مونيتورينگ اگەنتتىگى ۋاكىلەتتى ورگاندارمەن بىرلەسىپ كەلەسى شارالاردى قابىلدادى:
- بانكتىك كارتالاردى ءۇشىنشى تۇلعالارعا بەرۋ ءۇشىن اكىمشىلىك جانە قىلمىستىق جاۋاپكەرشىلىكتى كۇشەيتۋگە باعىتتالعان زاڭنامالىق وزگەرىستەر باستاماشىلىق ەتىلدى؛
- كۇدىكتى شوتتارداعى قاراجاتتى "توقتاتۋ" جانە قاشىقتىقتان بانكتىك قىزمەت كورسەتۋدى ءوشىرۋ مەحانيزمى ەنگىزىلدى؛
- ءبىر كليەنتكە بەرىلەتىن بانكتىك كارتالاردىڭ سانىن شەكتەۋ جانە 10 نەمەسە ودان دا كوپ كارتالارى بار كليەنتتەرگە تەكسەرىستەر كۇشەيتىلدى؛
- كۇدىكتى وپەراسيالاردى انىقتاۋ جانە كۇماندى كليەنتتەردى قارجى مونيتورينگىنىڭ سۋبەكتىلەرىنىڭ قىزمەتتەرىنەن اجىراتۋ ءۇشىن تيپولوگيالار ازىرلەندى.
قما ونلاين ديالوگ ارقىلى بەيتانىس ازاماتتار نەمەسە كومپانيانىڭ وكىلدەرى حابارلاسىپ، شوتىڭىزعا سىياقىعا اقشا اۋدارىپ، ەسەلەپ وڭاي اقشا تابۋدى ۇسىنعان جاعدايدا قىراعىلىق تانىتىپ، ءوزىڭىزدى قىلمىستىق سحەمانىڭ مۇشەسى بولۋدان ساقتاڭىز.
