الماتى قالاسى اكىمى ەربولات دوسايەۆ تۇركسىب اۋدانىنداعى «جەلتوقسان» ساياباعىن اباتتاندىرۋ جانە كوگالداندىرۋ جۇمىستارىنىڭ ارالىق ناتيجەلەرىمەن تانىستى. وبەكتىنى پايدالانۋعا بەرۋ مەرزىمى مەردىگەر ۇيىم تاراپىنان كىدىرىستەرگە بايلانىستى بىرنەشە رەت كەيىنگە شەگەرىلدى. كومپانيا بارلىق جۇمىستاردى اعىمداعى جىلدىڭ قىركۇيەگىنە دەيىن اياقتاۋى ءتيىس.

جوبا ساياباقتى اباتتاندىرۋ مەن كوگالداندىرۋدى، سونىڭ ىشىندە كولدى تازارتۋدى جانە ۇزىندىعى 40 مەتر كوپىر سالۋدى قاراستىرادى. بۇگىندە مەردىگەر كومپانيا جۇمىستاردىڭ ءبىر بولىگىن ورىندادى – ساياباق اۋماعىندا جاياۋ جۇرگىنشى جولدارى سالىندى، ورىندىقتار قويىلدى، جارىق شامدارى ورناتىلدى جانە 3 مىڭنان استام اعاش وتىرعىزىلدى.

تەكسەرۋ بارىسىندا قالا اكىمى تروتۋار پليتكالارىن توسەۋ ساپاسىن سىنعا الدى – بارلىق جاياۋ جۇرگىنشىلەر جولىندا توسەلگەن تاستار ەداۋىر وتىرىپ قالعان، ارالارى اجىراپ، جارىقتار بايقالادى. قالا باسشىسى اعاش ورىندىق كەشەندەرىنىڭ بەتىن وڭدەۋ تەحنولوگياسىنا قاتىستى ەسكەرتۋ جاسادى – ولاردان بوياۋ بۇكىل نىساندى پايدالانۋعا بەرگەنگە دەيىن ەسكىرىپ، ءتۇسىپ قالۋى ابدەن مۇمكىن. ساياباق اۋماعىن جارىقپەن تولىق قامتاماسىز ەتۋ ءۇشىن ەربولات دوسايەۆ جاياۋ جۇرگىنشىلەر جولىنىڭ ەكى جاعىنا دا جارىق شامدارىن ورناتۋدى تاپسىردى. سونداي-اق، كوگالداندىرۋ كەزىندە دۇرىس اعاش كوشەتتەرىن نەمەسە قاجەت بولعان جاعدايدا كوگالداردى تاڭداۋ ءۇشىن توپىراقتىڭ ەرەكشەلىكتەرىن ەسكەرۋ قاجەتتىگى اتاپ ءوتىلدى.

الماتى اكىمى ساياباقتاردىڭ بارىنشا جايلى بولۋىن، ويتكەنى مۇندا قالا تۇرعىندارى دەمالاتىنىن ەسكەرتتى. ول ءۇشىن اكىمدىك ءتيىستى اقشا قاراجاتىن بولەدى، ولار نىسانالى ماقسات بويىنشا پايدالانىلۋى ءتيىس. مەردىگەر ۇيىمعا ءوز قارجىسى ەسەبىنەن بارلىق ەسكەرتۋلەردى جويۋ جانە بارلىق تالاپتار مەن تەحنولوگيالىق پروسەستەردى ساقتاي وتىرىپ، اباتتاندىرۋ جانە كوگالداندىرۋ بويىنشا جۇمىستاردى ورىنداۋ تاپسىرىلدى.

الماتى اكىمىنە ساياباقتى دامىتۋ بويىنشا الداعى جوسپارلار تانىستىرىلدى. ماماندار سۋى از كولدى تازارتۋعا نيەتتى. سوڭعى جىلدارى توعان قامىسقا تولىپ، ءتۇبى تايازدانىپ قالعان، ال جاعالاۋىنا قۇرىلىس قوقىستارى توگىلگەن. كولدى تازارتۋ جوباسى اياسىندا ونى قالالىق ارىق جۇيەسىنە قوسۋ جوسپارلانۋدا، جاربۇلاق وزەنىنەن كولدىڭ سۋىن مولايتۋ مۇمكىندىگى قاراستىرىلۋدا.

ساياباقتى رەكونسترۋكسيالاۋ بارىسىندا جاياۋ جۇرگىنشىلەر كوپىرى، بالالار جانە سپورت الاڭدارى سالىنىپ، شاعىن ساۋلەت پىشىندەرى ورناتىلادى. بارلىق جۇمىستاردى مەردىگەر ۇيىم اعىمداعى جىلدىڭ قىركۇيەگىنە دەيىن اياقتاۋى ءتيىس. ەربولات دوسايەۆ ساياباقتى اباتتاندىرۋ جانە كوگالداندىرۋ جوباسى اياقتالعاننان كەيىن ساياباقتى  جەكە قابىلدايتىنىن اتاپ ءوتتى.

ساياباق پايدالانىلۋعا بەرىلگەننەن كەيىن جاقىن ماڭداعى جاس قانات، ماياك توعايى، كولحوزشى جانە ت.ب. شاعىن اۋدانداردىڭ 20 مىڭنان استام تۇرعىنى ءۇشىن جاڭا دەمالىس ءارى تارتىلىس ورتالىعى بولادى دەپ كۇتىلۋدە.