"استانا كونسەرت" كومپانياسىنىڭ پروديۋسەرى مالىك حاسەنوۆ ورتالىق كوممۋنيكاسيالار قىزمەتىندە وتكەن بريفينگىدە الەمدىك جۇلدىزداردىڭ كونسەرت بەرۋى ەلىمىزگە قانداي پايدا اكەلەتىنىن ايتىپ بەردى، دەپ حابارلايدى Dalanews.kz.
ول دجەننيفەر لوپەس كونسەرتتەرىنىڭ بيلەتتەرى 40 مينۋتتا لەز جوق بولعانىن ەسكە سالدى، ونىڭ 35%-ىن شەتەلدىكتەر،ياعني سىرتتان كەلەتىن تۋريستەر ساتىپ العان.
"ال "Backstreet Boys" كونسەرتىنە كەلەتىن بولساق، بيلەت باعاسى 40 مىڭ تەڭگەدەن باستالادى، ءسويتىپ ساناتىنا قاراي قىمباتتاي بەرەدى. ول ارادا 13 ءتۇرلى سانات بار، ياعني ادامدار قالتاسىنداعى اقشاسىنا قاراي ورىن تاڭدايدى. بىزگە بيلەتتەر باعاسى قولجەتىمدى سياقتى. تاعى ءبىر ماسەلە. ارينە، انشلاگ بولادى. سونداي-اق ءبىز الىپساتارلارمەن دە كۇرەسەتىن بولامىز، ءبىر قولعا تەك ءتورت بيلەت بوساتىلاتىن بولادى"، - دەپ سەندىرەدى ول.
"Kazakh Tourism" ۇك" اق-تىڭ جوبالاردى سۇيەمەلدەۋ دەپارتامەنتىنىڭ ديرەكتورى الىشەر تۇرسىن استاناداعى دجەننيفەر لوپەس كونسەرتىندە 10 مىڭنان استام، الماتىداعىسىنا 8 مىڭنان استام كورەرمەن كەلەدى دەپ كۇتىلىپ وتىرعانىن جەتكىزدى.
"الەمدىك تاجىريبە، اسىرەسە باتىس ەۋروپا تۇرعىسىنان الىپ قاراستىرساق، 10 مىڭ ادامعا ارنالعان كونسەرت ورتا ەسەپپەن شاعىن جانە ورتا بيزنەس ءۇشىن 1 ميلليون دوللاردان استام قوسىمشا تابىس اكەلەدى"، – دەيدى ول.
جالپى، مالىك حاسەنوۆتىڭ ايتۋىنشا، جىل قورىتىندىسى بويىنشا وسى كونسەرتتەردى ۇيىمداستىراتىن كومپانيالار توبى 1 ملرد تەڭگەدەن استام سوماعا سالىق تولەيدى.
"استاناداعى كونسەرت بويىنشا 400 ملن تەڭگەدەن استام. بۇل سوما قايدان شىقتى دەيسىز بە؟ نەگىزىنەن، 65%-دان استامى - جۇلدىز گونورارىنان بەيرەزيدەنت ءۇشىن تولەنەتىن سالىق، ول الماتىداعى، سول سەكىلدى استاناداعى كونسەرت ءۇشىن دە تولەنەدى جانە تيىسىنشە مۇنداي سالىقتى Backstreet Boys توبى دا تولەيدى. ءقازىر تەك شىلدە ايى، جىلدىڭ ورتاسى عانا، سوندىقتان دا الدا ۇيىمداستىرىلاتىن وسىنداي باسقا ءىس-شارالار دا بولادى، ول تۋرالى كەيىنىرەك ايتامىز، ءبىراق سولاردىڭ بارلىعىن قوسقاندا وسى كونسەرتتەردى ۇيىمداستىرۋمەن اينالىساتىن كومپانيالار توبى جىل سوڭىندا 1 ملرد تەڭگەدەن استام سوماعا سالىق تولەيدى دەپ بولجانادى"، - دەپ اتاپ ءوتتى "استانا كونسەرت"كومپانياسىنىڭ پروديۋسەرى.
2025 جىلدىڭ 1 تامىزىندا امەريكالىق پوپ-جۇلدىز دجەننيفەر لوپەس ءوزىنىڭ Up All Night الەمدىك تۋرى اياسىندا قازاقستاندا العاش رەت ونەر كورسەتەدى. العاشقى كونسەرت ەلورداداعى Astana Arena-دا وتەدى. Backstreet Boys العاش رەت 19 قىركۇيەكتە الماتىدا جانە 21 قىركۇيەكتە استانادا ونەر كورسەتەدى.
