الماتىداعى دجەننيفەر لوپەس كونسەرتىنە 27 مىڭ كورەرمەن جينالدى، ال ودان تۇسكەن تابىس 10 ملرد تەڭگەنى قۇرادى، دەپ حابارلايدى Dalanews.kz.
ايتا كەتسەك، الماتىداعى ورتالىق ستاديوندا 2025 جىلى 10 تامىزدا دجەننيفەر لوپەستىڭ اۋقىمدى شوۋى ءوتتى.
قالا اكىمدىگىنىڭ مالىمەتىنشە، وعان 27 مىڭ كورەرمەن قاتىستى، ونىڭ ىشىندە 35 ەلدەن كەلگەن 7 مىڭ شەتەلدىك قوناق بولدى.
ەكونوميكالىق تيىمدىلىك تە جوعارى كورسەتكىشكە جەتتى:
- 10 ملرد تەڭگەدەن استام اينالىم؛
- شامامەن 600 ملن تەڭگە سالىق ءتۇستى؛
- كونسەرت كۇنى الماتىدا شەتەلدىك تۋريستەردىڭ ءوزى 5 ملرد تەڭگەدەن استام اقشا قالدىردى.
دجەننيفەر لوپەس توبى كونسەرتتىڭ ۇيىمداستىرىلۋىن جوعارى باعالادى. ءانشىنىڭ تۋرىنىڭ باس رەجيسسەرى مەن تەحنيكالىق ديرەكتورى گريگوريي انتروپوۆ الماتىداعى دايىندىق جۇمىستارى بارلىق قالانىڭ ىشىندە ەڭ ۇزدىگى بولعانىن اتاپ ءوتتى.
"مۇنداي ءىرى مادەني ءىس-شارالار الماتىنىڭ تۋريستىك تارتىمدىلىعىن ارتتىرىپ، قالانىڭ الەمدىك گاسترولدەر كارتاسىنداعى ماڭىزدى نۇكتە رەتىندەگى مارتەبەسىن نىعايتادى"، - دەيدى اكىمدىكتەن.
بۇعان دەيىن الەمدىك جۇلدىزدىڭ استاناداعى شوۋىنا 15 مىڭ تۋريست كەلگەنى حابارلانعان. الدىن الا بولجام بويىنشا، ەل ەكونوميكاسىنا 6،5 ملرد تەڭگە تابىس اكەلىپ، 400 ملن تەڭگە سالىق ءتۇسۋى ءتيىس بولعان. سونداي-اق سايتىمىزدا "بەلسەندىلەر ۇدەرە كوتەرىلدى". الماتىداعى دجەي لونىڭ كونسەرتى وتپەي قالۋى مۇمكىن بە؟" دەگەن ماتەريال جاريالانعان.
