فورۋمنىڭ پلەنارلىق وتىرىسىندا ق ر ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ ءسوز سويلەدى.
ءوز سوزىندە ەرمەكبايەۆ قازىرگى داۋىردەگى ءدىن سالاسىنداعى مەملەكەتتىك ساياساتتى جۇيەلى جۇزەگە اسىرۋدىڭ باستى باعىتتارىنا توقتالدى.
«قوعامدا كەز-كەلگەن دەسترۋكتيۆتى ءدىني يدەولوگيانى مۇلدەم قابىلداماۋدى قالىپتاستىرۋىمىز كەرەك. بۇل جەردە بىرلىك پەن جالپى ۇجىمدىق كۇش-جىگەر ماڭىزدى. ەلباسى مەن مەملەكەتتىك ساياساتتى قولداۋ تەك قانا سوزبەن ەمەس، كۇندەلىكتى مىنەز-قۇلىقتا، ىس-ارەكەتتە، ءتىپتى سىرتقى بەينەسىندە كورىنەتىنىن ءار ازامات ءوز جاقىندارىنا،تانىستارىنا ءتۇسىندىرۋى قاجەت»- دەپ اتاپ ءوتتى ءوز سوزىندە ۆەدومستۆ باسشىسى.
«كەيبىر ادامدار بار. ءسوز جۇزىندە بيلىكتىڭ، مەملەكەتتىڭ ۇستانىمىنا قارسى شىقپايمىز دەيدى. مەملەكەت باسشىسىنىڭ ساياساتىن قولدايمىز دەپ ايتا تۇرا، ءىس جۇزىندە، ايتالىق، مەكتەپ كيىم ۇلگىسىن ساقتاۋ تۋرالى ناقتى نورماتيۆتىك قۇقىقتىق اكتىلەردى بۇزادى. بۇل ءبىر عانا جايت. بۇدان سىرت مەملەكەت بەكىتكەن زاڭ تالاپتارىنا قاراماستان وزدەرىنىڭ ءدىني بىرلەستىكتەرىن تىركەۋدەن ادەيى باس تارتادى.
ۇشىنشىدەن، ءدىني ۋاجدەرىمەن ەكپە ەگۋدەن، قان قۇيۋدان باس تارتادى؛ ينتەرنەتتەن شەتەلدىڭ راديكالدى ءدىن ۋاعىزداۋشىلارىنىڭ دارىستەرىن جۇكتەپ تاراتادى.
پرەزيدەنتتىڭ قازاقستان جۇرتشىلىعىنا جانە سالت-داستۇرلەرىنە جات سىرتقى كورىنىستەرگە جول بەرمەۋ تۋرالى ايتقاندارىنا قاراماستان مۇندايلار باسقا ەلدەرگە ءتان قارا كيىم كيۋ، ساقال قويۋ، قىسقا شالبار كيۋدى جالعاستىرۋدا» - دەدى نۇرلان ەرمەكبايەۆ.
ايتا كەتەلىك، فورۋمنىڭ جۇمىسىنا ورتالىق مەملەكەتتىك ورگانداردىڭ باسشىلارى جانە وكىلدەرى، ق ر پارلامەنتى ءماجىلىسىنىڭ دەپۋتاتتارى، ءدىنتانۋشى-عالىمدار، ەلدەگى جوعارى وقۋ ورىندارىنداعى ءدىنتانۋ كافەدرالارىنىڭ تاجىريبەلى وقىتۋشىلارى، عىلىمي قىزمەتكەرلەر مەن ءدىني بىرلەستىك جانە ۇەۇ-داردىڭ وكىلدەرى قاتىستى.
استانادا وتكەن قازاقستان ءدىنتانۋشىلارىنىڭ VII فورۋمى «قوعامدىق سانانى جاڭعىرتۋدا ءدىن سالاسىنداعى مەملەكەت ساياساتىنىڭ ءرولى» اتتى تاقىرىپقا ارنالدى. شارا ۇيىمداستىرۋشىلارىنىڭ پىكىرىنشە، وسىناۋ فورۋمنىڭ ماقساتى مەن مىندەتى – ەلىمىزدىڭ ءدىن سالاسىنداعى مەملەكەتتىك ساياساتتى جۇزەگە اسىرۋ ءۇشىن عىلىمي جانە ساراپشىلار قاۋىمداستىعىن جانە ۇەۇ-دىڭ وكىلدەرىن بىرلەسىپ، جۇمىس ىستەۋگە شاقىرۋ بولىپ تابىلادى.
