«ورالدا وقۋشىلار مەن جاستارعا ارنالعان وسىنداي ءزاۋلىم سارايدىڭ بولعاندىعى مەنى قاتتى قۋانتتى. مۇندا جاستارعا ارنالعان ءارتۇرلى ۇيىرمەلەر، شاعىن ورتالىقتار مەن كوۆوركينگ ورتالىعى بار، سونداي-اق مۇندا جاستاردىڭ شىعارماشىلىق تۇرعىدا دامۋىنا جانە قوعام ءۇشىن پايدالى ىستەرمەن اينالاسۋىنا بارلىق جاعداي جاسالعان. ورتالىق 3D-اقپاراتتىق تەحنولوگيالارىمەن، سونىمەن قاتار زاماناۋي كوممۋنيكاسيا قۇرالدارىمەن جابدىقتالعان. ءبىزدىڭ مينيسترلىكتىڭ باعىتىنىڭ ءبىرى – جاستار ساياساتى بولعاندىقتان، باتىس قازاقستان وبلىسىنىڭ جاستارى «تۋعان جەر»، «اتامەكەن»، «الەۋمەتتىك باستامالار كارتاسى» جوبالارى بويىنشا بەلسەندى جۇمىس ىستەپ جاتقانىنا كوزىم جەتتى»، – دەدى نۇرلان ەرمەكبايەۆ.
مينيستر باتىس قازاقستان وبلىسىنىڭ جاستارىنىڭ قوعام ءۇشىن بەلسەندى باستامالاردان قالىس قالماي، وتە تۇششىمدى ۇسىنىستارىمەن كوزگە ءتۇسىپ جاتقاندىعىن اتاپ ءوتتى.
«جاستار تاراپىنان قوعام ءۇشىن ماڭىزدى ساۋالدار كەلىپ تۇسۋدە. جالپى قازىرگى جاستاردىڭ بويىنان ىنتا-جىگەردىڭ، بولاشاققا دەگەن نىق سەنىمنىڭ لەبى سەزىلەدى. وسىنداي بەلسەندى جاستارعا ءبىز مەملەكەت تاراپىنان قولداۋ كورسەتۋىمىز كەرەك»، – دەدى مينيستر.
وقۋشىلار مەن جاستار سارايىنا قاراستى «باستاۋ» كوۆوركينگ-ورتالىعى بيىلعى جىلدىڭ قازان ايىندا اشىلعان بولاتىن. كوۆوركينگ ورتالىعىنىڭ جۇمىسى «رۋحاني جاڭعىرۋ» باعدارلاماسىنىڭ شەڭبەرىندە جاستاردىڭ باستامالارىن دامىتۋ، ولاردىڭ قوعام ومىرىنە بەلسەندى اتسالىسۋىنا باعىتتالعان.
