مارتەبەلى مەيماندار تۇركىستان قالاسىندا 3-4 قازان ارالىعىندا وتەتىن «تاباررۋك-زيارات» پيلوتتىق جوباسىن ىسكە اسىرۋ جونىندەگى فورۋم جۇمىسىنا قاتىسۋ ءۇشىن ارنايى كەلگەن.
«تاباررۋك-زيارات» پيلوتتىق جوباسى ەكىجاقتى ىنتىماستىقتى نىعايتىپ، تۋريزم سالاسىن دامىتۋعا، تۋريستتەر اعىنىن ارتتىرۋعا باعىتتىلعان. ءوز كەزەگىندە، اتالعان جوبا ەكى ەلدىڭ سونىمەن قاتار، شەكارا ماڭىنداعى وڭىرلەردىڭ ەكونوميكالىق دامۋىنا وڭ سەرپىن بەرەدى.
ايتا كەتەيىك، ءتۋريزمدى دامىتۋ ماقساتىندا اعىمداعى جىلى ءازىربايجاندا تۇركى مەملەكەتتەرى ۇيىمىنا (بۇدان ءارى – تمۇ) مۇشە ەلدەردىڭ تۋريزم مينيسترلەرىنىڭ 7ء-شى وتىرىسى ءوتتى. ونىڭ قورىتىندىسى بويىنشا تمۇ حاتشىلىعىنىڭ، قازاقستان مەن وزبەكستان دەلەگاسيالارىنىڭ قاتىسۋىمەن «تاباررۋك-زيارات» پيلوتتىق جوباسىن ازىرلەۋ بويىنشا ءۇشجاقتى كەزدەسۋ وتكىزۋ كەلىسىلدى.
جوبانى ىسكە اسىرۋ ماسەلەلەرىن ودان ءارى پىسىقتاۋ ءۇشىن اعىمداعى جىلدىڭ 19 قىركۇيەگىندە قازاقستان مەن وزبەكستاننىڭ مۇددەلى مەملەكەتتىك ورگاندارى مەن ۇيىمدارىنىڭ، تمۇ حاتشىلىعىنىڭ قاتىسۋىمەن ونلاين كەڭەس وتكىزىلگەن.
ءوز كەزەگىندە، كەڭەس قورىتىندىسى بويىنشا «تاباررۋك-زيارات» پيلوتتىق جوباسىن ىسكە اسىرۋ جونىندەگى فورۋم» شەڭبەرىندە جوبانى ىسكە اسىرۋ ماسەلەلەرىن ودان ءارى تالقىلاۋ تۋرالى شەشىم قابىلداندى.
كەلىسىمگە سايكەس پيلوتتىق جوبانى جۇزەگە اسىرۋ بويىنشا ماسەلەلەردى تالقىلاۋ ماقساتىندا مۇددەلى مەملەكەتتىك ورگاندار مەن بيزنەس قاۋىمداستىقتىڭ قاتىسۋىمەن فورۋم اعىمداعى جىلدىڭ 3-4 قازان ارالىعىندا ۇيىمداستىرىلىپ وتىر.
تۇركىستانداعى تۋريزم جانە مەيماندوستىق ۋنيۆەرسيتەتىندە وتەتىن فورۋمعا تمۇ-نىڭ وكىلدەرى، قازاقستان جانە وزبەكستان رەسپۋبليكاسىنىڭ تۋريزم مينيسترلىگى، كەدەن قىزمەتى، شەكەرا قىزمەتى، ىشىك ىستەر قىزمەتى مەن تۋريستىك قاۋىمداستىق وكىلدەرى قاتىسادى.
