تۇركىستان وبلىسىنىڭ اكىمى دارحان ساتىبالدى قازىعۇرت اۋدانىنا جۇمىس ساپارىمەن بارىپ، اۋدان اكتيۆىمەن كەزدەستى. كوشپەلى ماجىلىستە اۋداننىڭ وزەكتى ماسەلەلەرى ورتاعا سالىنىپ، شەشۋ جولدارى تالقىلاندى.

حالىقپەن العاشقى جارتىجىلدىقتاعى كەزدەسۋلەردە كوتەرىلگەن ماسەلەلەردىڭ ورىندالۋ بارىسى سارالاندى. ءوڭىر باسشىسى كەمشىلىكتەرگە جەكە-جەكە توقتالىپ، جۇمىس بارىسىنداعى ولقىلىقتاردى قاتاڭ سىنعا الدى. جۇمىستى شيراتۋدى تاپسىرىپ، ولاردى تەز ارادا رەتكە كەلتىرۋ ءۇشىن اۋدان اكىمىنە 1- شىلدەگە دەيىن ۋاقىت بەردى. قىزمەتىنە سايكەس كەلمەيتىن باسشىلار مەن مەملەكەتتىك قىزمەتشىلەرگە شارا كورىلەدى.

ماجىلىستە قازىعۇرت اۋدانىنىڭ اكىمى ازيزحان يسمايلوۆ 2022 جىلى اتقارىلعان جۇمىستار بويىنشا ەسەپ بەردى. بارلىق سالاداعى كورسەتكىشتەر باياندالىپ، قارجىنى تالاپ ەتەتىن جوبالار ورتاعا سالىندى.

قازىعۇرتتىڭ دامۋ بارىسى تالقىلانعان ماجىلىستە دارحان ساتىبالدى اۋدان اكىمىنە ينۆەستيسيا تارتۋ، كاسىپكەرلەرگە قولداۋ كورسەتۋ، تۇرعىندارعا مەملەكەتتىك باعدارلامالار مەن جەڭىلدىكتەر تۋرالى اقپارات بەرۋ، اۋىل شارۋاشىلىعىن جانداندىرۋ، ينفراقۇرىلىمدى جاقسارتۋ، ءبىلىم جانە مەديسينا سالاسىن جاڭعىرتۋ جانە وزگە دە ماسەلەلەر بويىنشا جۇمىس اتقارۋدى تاپسىردى. ءاربىر ورىنباسار مەن ءبولىم باسشىلارىنىڭ ۋاجدەرى تىڭدالدى.

تۇركىستان وبلىسى اكىمى اپپاراتىنىڭ باسشىسى ەركەعالي ءالىمقۇلوۆ اۋدانىڭ ەكونوميكالىق-الەۋمەتتىك دامۋىنداعى كەدەرگىلەرگە توقتالدى. انىقتاعان ءبىرقاتار كەمشىلىكتەر بويىنشا قولعا الىناتىن شارالاردى بايانداپ بەردى. تالداۋ قورىتىندىسى نەگىزگى كورسەتكىشتەردىڭ تومەندەگەنىن كورسەتكەن. اۋىل شارۋاشىلىعى سالاسىندا قويىلعان مەجەلەر ورىندالماعان. قۇرىلىس جۇمىستارى بويىنشا بەكىتىلگەن جوسپار جۇزەگە اسپاعان. كىرىس كولەمى تومەندەگەن. اۋداندا سالىق بازاسىن ۇلعايتۋ بويىنشا رەزەرۆتەر كوپ. سالىق سالۋ وبەكتىلەرىنىڭ (تويحانا، جانارماي قۇيۋ ستانسياسى، ت.س.س) باعالاۋ قۇندارى نارىقتىق باعادان تومەن باعالانعان. تيىسىنشە سالىق از تولەنۋدە.

تازالىعى سىن كوتەرمەيتىن عيماراتتار مەن ونىڭ اۋماعى كۇل-قوقىسقا تولعان نىسانداردىڭ جاۋاپتى باسشىلارى قاتاڭ سىنعا الىندى. كوپقاباتتى تۇرعىن ۇيلەر، مادەنيەت، سپورت، مەديسينا جانە ءبىلىم بەرۋ نىساندارىنىڭ، دەمالىس ورىندارى مەن بالالار الاڭشالارىنىڭ كۇتىپ-ۇستاۋى تومەن دەڭگەيدە. كوشەلەر مەن جول ساپاسىنا دا سىن وتە كوپ.

– اۋداندا شەشىمىن تاپپاعان ماسەلەلەر كوپ. ەكونوميكالىق، الەۋمەتتىك سالالار بويىنشا، سونداي-اق، ينفراقۇرىلىم بويىنشا اتقارىلىپ جاتقان جۇمىستاردا كەمشىلىكتەر كوپ. اۋىل شارۋاشىلىعى سالاسىنداعى كورسەتكىشكەر كەمىگەن. بۇل دەگەنىمىز، حالىقتىڭ تابىسى ازايدى دەگەن ءسوز.

جۇمىستى شيراتىپ، جوسپاردى ورىنداۋ كەرەك. اۋدان بيۋدجەتىنىڭ تۇسىمدەرىن ۇلعايتۋ بويىنشا ناقتى شارالار قابىلداسىن. ناتيجەسى باياندالسىن.

تالاپ وتە جوعارى. حالىققا شىن جانى اشيتىن ازاماتتار جۇمىس ىستەۋى كەرەك. جۇمىس ىستەگىسى كەلمەيتىن ادام سىلتاۋ ىزدەيدى. اقتالۋدىڭ قاجەتى جوق. سىزدەرگە قويىلاتىن تالاپ بار، ماعان قويىلاتىن تالاپ بار. ارتىق ەشنارسە سۇرامايمىز.
مەملەكەتتىك كىرىستەر باسقارماسىمەن بىرلەسە اۋدان بيۋدجەتىنىڭ تۇسىمدەرىن ۇلعايتۋدى قولعا الىڭىز. اۋداننىڭ دامۋى بويىنشا باستى باعىتتاردى بەلگىلەپ، دامۋ جوسپارىن ازىرلەپ، اۋداننىڭ ينۆەستيسيالىق كليماتىن جاقسارتۋ قاجەت.

ءبىلىم سالاسىنداعى وزەكتى ماسەلەلەردى جۇيەلى تۇردە شەشۋگە كۇش سالىنسىن. جاڭا ءوندىرىس ورىندارىن اشىپ، تۇرعىنداردى جۇمىسپەن قامتاماسىز ەتۋ قاجەت. تازالىققا ءمان بەرىلسىن. جىلدار بويى قاراۋسىز قالعان سوڭ عيماراتتار وسىنداي دەڭگەيگە تۇسكەن. تەك بيۋدجەتكە تاۋەلدى بولساق، ءىس العا باسپايدى. جاڭا فورماتتا جۇمىس ىستەۋگە بەت بۇرۋ شارت. ىزدەنىس كەرەك، – دەدى دارحان ساتىبالدى.

وبلىس اكىمى ءبىلىم، مادەنيەت، مەملەكەتتىك باعدارلامالاردى جۇزەگە اسىرۋ، سپورت، دەنساۋلىق ساقتاۋ، اباتتاندىرۋ، تازالىق ساقتاۋ، جاستارعا قولداۋ كورسەتۋ جۇمىستارىن دا ۇدايى نازاردا ۇستاۋدى تاپسىردى. كەمشىلىككە جول بەرگەن باسشىلارعا ەسكەرتۋ بەردى.

جاڭا فورماتتاعى كەزدەسۋلەردە وبلىس اكىمىنىڭ باسشىلىعىمەن ماسەلەلەر اشىق ايتىلىپ، شەشۋ جولدارى قارالادى. بارلىق سالا زەردەلەنەدى. وسى ارقىلى ءوڭىردى دامىتۋ جۇمىس ساپاسىن جاقسارتۋ، ەلدىڭ وتىنىشتەرى مەن ۇسىنىستارىن ساپالى ورىنداۋ، وبلىستىڭ دامۋ كورسەتكىشىن جاقسارتۋ كوزدەلگەن.