ۇستەمە اقى تولەۋ ءۇشىن نۇر-سۇلتان قالاسى بويىنشا مەديسينالىق ساقتاندىرۋ قورىنان 4،3 ملرد تەڭگە ءبولىندى. قور قارجى وپەراتورى رەتىندە مەديسينا قىزمەتكەرلەرىنىڭ ناۋرىزدان ماۋسىم ايى ارالىعىندا جالاقىسىنا قوسىمشا 32 ملرد استام تەڭگە تولەدى.
مەديسينالىق ساقتاندىرۋ قورىنىڭ نۇر-سۇلتان قالاسى بويىنشا فيليالى ءقاۋىپتى جاعدايدا جۇمىس ىستەيتىن دارىگەرلەر مەن مەديسينا قىزمەتكەرلەرىنىڭ سانى اي سايىن ارتىپ كەلە جاتقانىن حابارلادى.
ەگەر ناۋرىز ايىندا ۇستەمە اقىنى 1،8 مىڭنان استام قىزمەتكەر السا، مامىر ايىندا ولاردىڭ سانى 2،4 مىڭ ادامعا دەيىن ءوستى. ەندى ءامسق ماۋسىم ايىنا تولەم جاسايدى.
كوروناۆيرۋس بويىنشا ەپيدەمياعا قارسى ءىس-شارالارعا تارتىلعان مەديسينا قىزمەتكەرلەرىن ىنتالاندىرۋ جانە كوتەرمەلەۋ ءۇشىن جالاقىعا ۇستەمەاقى قاراستىرىلعان.
دەنساۋلىق ساقتاۋ مينيسترلىگىنىڭ بۇيرىعىمەن تاۋەكەل توپتار، الۋشىلاردىڭ ءتىزىمىن قالىپتاستىرۋ ءتارتىبى جانە تولەمدەر مولشەرى انىقتالدى. تاۋەكەل توبىنا بايلانىستى مەديسينا قىزمەتكەرلەرىنە 212 مىڭ تەڭگەدەن (5 اەك) 850 مىڭ تەڭگەگە دەيىن (20 اەك) قوسىمشا اقى بەرىلدى.
ەستەرىڭىزگە سالا كەتەيىك، ۇستەمەاقى الۋشىلار ءتىزىمىن جەدەل شتاب جانىنان قۇرىلعان وڭىرلىك كوميسسيا جاساقتايدى. كوميسسيا ءتوراعاسى اكىمدەردىڭ ورىنباسارلارى، سونداي-اق، ونىڭ قۇرامىنا مەديسينالىق ساقتاندىرۋ قورى فيليالدارىنىڭ قىزمەتكەرلەرى، وڭىرلىك مەملەكەتتىك باس سانيتارلىق دارىگەر، دەنساۋلىق ساقتاۋ باسقارمالارىنىڭ، ۇكىمەتتىك ەمەس ۇيىمداردىڭ وكىلدەرى كىرەدى.
ال، مەديسينالىق ساقتاندىرۋ قورى ءتىزىم بويىنشا دەرەكتەردىڭ دەنساۋلىق ساقتاۋ ءمينيسترىنىڭ «COVID-19 كوروناۆيرۋسپەن كۇرەس شەڭبەرىندە ەپيدەمياعا قارسى ءىس-شارالارعا تارتىلعان دەنساۋلىق ساقتاۋ ۇيىمدارىنىڭ قىزمەتكەرلەرىن قارجىلىق قولداۋداعى كەيبىر ماسەلەلەر تۋرالى» بۇيرىعىنا سايكەستىگىن تەكسەرەدى.
ەگەر مەديسينالىق قىزمەتكەرلەرىندە ۇستەمە اقىعا قاتىستى سۇراقتار تۋىنداسا، وڭىرلىك كوميسسياعا جۇگىنۋى قاجەت.
كوروناۆيرۋقا شالدىققان مەديسينا قىزمەتكەرلەرىنە قوسىمشا قارجىنى قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگى وڭىرلىك كوميسسيا شەشىمى نەگىزىندەگى دەنساۋلىق ساقتاۋ باسقارمالارىنىڭ ءوتىنىشى بوينىشا تولەيدى.
