«دارا» قايىرىمدىلىق قورى پەركينس (اقش) مەكتەبىمەن ءۇش جىلدىق كەلىسىم-شارتقا وتىردى. تاراپتار كورۋ قابىلەتى بۇزىلعان بالالاردىڭ ساپالى ءبىلىم الۋىنا قولجەتىمدىلىكتى جاقسارتۋ ماقساتىندا ىنتىماقتاستىق ورناتۋ تۋرالى ۋاعدالاستى.

جوبانىڭ العاشقى بەنەفيسيارى – الماتىداعى وستروۆسكيي اتىنداعى №4 مەكتەپ. بۇل زاعيپ جانە ناشار كورەتىن بالالاردى وقىتاتىن قازاقستانداعى ەڭ كونە مەكتەپ.

الماتى قالاسىنىڭ ءبىلىم باسقارماسى، دارا قورى جانە №4 ارنايى مەكتەپ-ينتەرناتى كورۋ قابىلەتى بۇزىلعان جانە كوپتەگەن دامۋ كەمىستىگى بار بالالارعا ارنالعان ءبىلىم بەرۋ جۇيەسىن جەتىلدىرۋ باعدارلاماسىن ىسكە اسىرۋ بويىنشا مەموراندۋمعا قول قويدى.

جوبانى ىسكە اسىرۋدىڭ ءبىرىنشى كەزەڭى وسى جىلدىڭ 6 اقپانىندا باستالدى. ەۋروپا جانە ەۋرازيا بويىنشا پەركينس مەكتەبىنىڭ ديرەكتورى داريا ۋدوۆيۆيچ جانە پەركينس مەكتەبىنىڭ جاتتىقتىرۋشىسى جانە كەڭەسشىسى سونيا اليموۆيچ الماتىداعى وستروۆسكيي مەكتەبىنە باردى. حالىقارالىق ماماندار وقىتۋ باعدارلاماسىمەن تانىسىپ، بالالاردىڭ ينتەرناتتا ءومىر ءسۇرۋ جاعدايلارىن كورىپ، توپتاردا جۇمىس ىستەيتىن مۇعالىمدەرمەن كەزدەستى.

پەركينس مەكتەبى ءبىلىم بەرۋ سالاسىنداعى الەمدىك كوشباسشى بولىپ تابىلادى. ول 1829 جىلى اشىلعان اقش-تاعى ەڭ كونە ءبىلىم بەرۋ مەكەمەسى.

كورۋ قابىلەتى بۇزىلعان، سونداي-اق 3 جاستان 21 جاسقا دەيىنگى كوپتەگەن دامۋ اقاۋلارى بار بالالارعا جان-جاقتى ءبىلىم بەرەدى. سونىڭ ىشىندە قۇلاقتارى ەستىمەيتىن جانە كوزدەرى كورمەيتىن بالالار بار. مەكتەپ الەمنىڭ 97 ەلىندە جۇمىس ىستەيدى.

بۇگىنگى تاڭدا قازاقستاندا كورۋ قابىلەتى بۇزىلعان بالالارعا ارنالعان 11 مەكتەپ اشىلىپ، وندا 1450-گە جۋىق بالا ءبىلىم الۋدا. الماتىدا كورۋ قابىلەتى ناشار بالالاردىڭ سانى شامامەن 456. ولاردىڭ جارتىسىنان استامى زاعيپ جانە ناشار كورەتىن بالالارعا ارنالعان №4 ارنايى مەكتەپ-ينتەرناتىندا وقيدى. سونىمەن قاتار، ۇيدە وقيتىن بالالار مەكتەپكە بەكىتىلەدى.

جوبانىڭ ەكىنشى كەزەڭىن جۇزەگە اسىرۋ اياسىندا وستروۆسكيي اتىنداعى №4 مەكتەپتىڭ مۇعالىمدەرى ەلىمىز بويىنشا وسىنداي مەكتەپتەردە جۇمىس ىستەيتىن ارىپتەستەرىمەن وزدەرىنىڭ تاجىريبەلەرىمەن بولىسەدى.