شىعىس قازاقستان وبلىسى اكىمدىگىنىڭ كەڭەيتىلگەن اپپارات كەڭەسىندە جىلىتۋ ماۋسىمى، قىس مەزگىلىندەگى جولدارداعى قاۋىپسىزدىك ماسەلەلەرى، سونداي-اق سۋ تاسقىنى كەزەڭىنە باعىتتالعان جوسپارلار تالقىلاندى.

بۇگىندە شىعىس قازاقستان وبلىسىنىڭ اۋماعىنداعى اۆتوموبيل جولدارىندا 19 جىلىتۋ، ءتورت مەديسينالىق-قۇتقارۋ پۋنكتى جانە 27 جول بويىنداعى كافە جۇمىس ىستەيدى. شقو توتەنشە جاعدايلار دەپارتامەنتىنىڭ باستىعى ەرلان نۇرپەيىسوۆتىڭ ايتۋىنشا، قازىرگى تاڭدا وبلىس جولدارىندا ۇزىندىعى 495 شاقىرىمدى قۇرايتىن 314 قار باسۋ ىقتيمالدىلىعى جوعارى ۋچاسكە بار.

– قىس ماۋسىمى باستالعالى وبلىستىڭ اۆتوموبيل جولدارىندا 12 اۆاريالىق-قۇتقارۋ جۇمىستارى جۇرگىزىلدى، ناتيجەسىندە توعىز ادام قۇتقارىلدى، ءقاۋىپسىز ورىندارعا 35 ادام ەۆاكۋاسيالاندى. قار باسۋ ىقتيمالدىلىعى جوعارى 314 ۋچاسكەسىنە ۇزىندىعى 20 676 پوگوندى مەتر قالقاندار ورناتىلدى. وبلىستىق بيۋدجەتتەن بولىنگەن قاراجاتتىڭ ارقاسىندا 2020 جىلى التاي اۋدانىندا زۋبوۆ ورتا مەكتەبىن قورعاۋ ءۇشىن 66 قالقان ورناتىلعانىن ەرەكشە اتاپ وتكىم كەلەدى، – دەدى ەرلان نۇرپەيىسوۆ.

جيىندا سونداي-اق، وبلىس اۋماعىنداعى سۋ تاسقىنى كەزەڭىنە قارسى دايىندىق تۋرالى ماسەلەلەر تالقىلاندى.

– بارلىق اكىمدەرگە اياز سالدارىنان جەردىڭ قاتۋ تەرەڭدىگىن زەرتتەۋدى تاپسىرامىن، اسىرەسە كاتونقاراعاي، گلۋبوكوە، شەمونايحا، اياگوز، التاي اۋداندارىنا ەرەكشە نازار اۋدارامىن. قازىرگى قاردىڭ دەڭگەيى بەلگىلى، ءبىراق ءبىز اقپان ايىندا دا قار مەن بوران بولاتىنىن ەسكەرۋىمىز قاجەت. سەنبىگە دەيىن سۋ تاسقىنى كەزەڭىنە دايىندىقتىڭ ەگجەي-تەگجەيلى جوسپارىن ەنگىزۋدى تاپسىرامىن. بارلىق سۋ قويمالارىنداعى سۋدىڭ جاعدايىن باقىلاۋدا ۇستاڭىزدار، – دەدى شقو اكىمى دانيال احمەتوۆ.

جالپى شىعىس قازاقستان وبلىسىندا جىلۋ بەرۋ ماۋسىمى قالىپتى جاعدايدا وتۋدە. ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسى وبلىس قالالارى مەن اۋداندارىنىڭ اكىمدىكتەرىمەن بىرلەسىپ، تەحنولوگيالىق بۇزۋشىلىقتاردىڭ تۋىنداۋىنا جانە ولاردى قىسقا مەرزىمدە جويۋعا كۇن سايىن مونيتورينگ جۇرگىزۋدە. وسى ورايدا وبلىس اكىمى دانيال احمەتوۆتىڭ تاپسىرماسى بويىنشا، سەمەي قالاسىنىڭ جاعدايى زەرتتەلدى. ناتيجەسىندە جەو-1، «عابباسوۆ»، «103 – يۋزا»، «ورتالىق»، «35 كۆارتال» قازاندىقتارى جانە جىلۋ جەلىلەرى تەكسەرىلدى. تەكسەرۋدىڭ الدىن الا ەسەبىن وبلىس اكىمىنىڭ ورىنباسارى باقىتجان باياحمەتوۆ باياندادى. ايماق باسشىسى سەمەيدەگى جىلۋ ماسەلەسى بويىنشا تولىق ەسەپتى جاقىن كۇندەرى دايىنداۋدى تاپسىرىپ، ماسەلە بارلىق جاۋاپتى ورگاندارمەن ەگجەي-تەگجەيلى تالقىلاناتىنىن اتاپ ءوتتى.

شقو اكىمىنىڭ باسپا ءسوز قىزمەتى