قۇرىلىس الاڭدارىن ارالاۋ بارىسىندا دانيال احمەتوۆ ماڭىزدى الەۋمەتتىك نىسانداردىڭ قۇرىلىسى كەستە بويىنشا ءجۇرىپ جاتقانىنا كوز جەتكىزدى. ستەپنويداعى 300 ورىندىق مەكتەپ جىل سوڭىندا پايدالانۋعا بەرىلەدى. ياعني، 3ء-شى توقساننان باستاپ وقۋشىلار جاڭا مەكتەپتىڭ پارتاسىنا وتىرادى. بۇرىن ستەپنويدا مەكتەپ بولعان جوق. بالالار 10 شاقىرىم جەردەگى مەكتەپكە بارىپ وقيتىن.
– الەۋمەتتىك نىساننىڭ قۇرىلىسىمەن قاتار اۋداننىڭ كوممۋنالدىق ماسەلەسىن دە شەشەمىز. مەكتەپكە تارتىلاتىن جىلۋ قۇبىرى ستەپنويدىڭ كوپ قاباتتى ۇيلەرىن دە جىلۋمەن قامتاماسىز ەتەتىن بولادى. ورتالىقتان تاراتىلاتىن جىلۋ جۇيەسى تۇرعىندارعا بيىل جەتەدى، – دەدى ايماق باسشىسى.
ۆوستوچنىي شاعىن اۋدانىندا 1200 ورىندىق مەكتەپ سالىنىپ جاتىر. ول دا جىلدىڭ سوڭىنا قاراي پايدالانۋعا بەرىلەدى. جاقىن كۇندەرى ارلەۋ جۇمىستارى باستالادى. قۇرىلىس بارىسىندا ەنەرگيامەن، جىلۋمەن جانە سۋمەن قامتاماسىز ەتۋ ماسەلەلەرى تۋىنداعان ەدى، ءبىراق ءقازىر بارلىعى شەشىلدى.
– ۆوستوچنىيداعى جاڭا مەكتەپتى جەرگىلىكتى جۇرت اسىعا كۇتىپ ءجۇر. ويتكەنى، ونداعى ەكى مەكتەپتە دە بالا تولىق، شاعىن اۋداننىڭ حالقى ءوسىپ كەلەدى. ەندى جاڭا مەكتەپ وقۋشىلارعا قاتىستى ءبىراز ماسەلەنى شەشەدى. بۇگىن مەن سەمەي قالاسىنىڭ ءبىلىم بولىمىنە مەكتەپ قاجەتتىلىگىن زەرتەۋدى تاپسىردىم. ەگەر قاجەتتىلىك بار بولسا، ءبىز 600 ورىندىق تاعى ءبىر تيپتىك مەكتەپ سالۋعا دايىنبىز، – دەدى اكىم.
سونداي-اق، دانيال احمەتوۆ سەمەيدىڭ «ورتالىق» جىلىتۋ قازاندىعىن قايتا جاڭعىرتۋ جۇمىسىنىڭ بارىسىن باقىلادى. مۇندا جوندەۋ جۇمىستارى 75%-عا اياقتالعان. ءقازىر تاعى ءبىر قازاندىق ورناتىلاتىن قوسىمشا نىساننىڭ قۇرىلىسى ءجۇرىپ جاتىر. ەندى قازاندىقتىڭ قۋاتى 84 گكال-عا دەيىن ارتادى.
قۇرىلىسشىلاردىڭ ايتۋىنشا، 26 جەلتوقسان – ەنەرگەتيكتەر كۇنىنە وراي نىسان پايدالانۋعا بەرىلەدى. سەمەيدەگى بارلىق قازاندىقتى قايتا جاڭعىرتۋ وبلىس اكىمنىڭ جەكە باقىلاۋىندا بولادى جانە جۇرگىزىلىپ جاتقان جۇمىستار قالانى جىلۋمەن قامتاماسىز ەتۋدىڭ باستى ماسەلەلەرىن شەشۋگە مۇمكىندىك بەرەدى.
سونداي-اق، «بەيبىتشىلىك» ارالىنا بارعان ايماق باسشىسىنا سەمەي قالاسى اكىمىنىڭ ورىنباسارى ديميتريي گاريكوۆ ارالدى اباتتاندىرۋ جوباسىن تانىستىردى. سونىمەن قاتار، وبلىس باسشىسى پەريناتالدىق ورتالىققا بارىپ، جۇرگىزىلگەن كۇردەلى جوندەۋ جۇمىستارىنىڭ ناتيجەسىن باعالادى.
دانيال احمەتوۆ نىسانداردى ارالاپ بولعاننان كەيىن قالا جولدارىن جوندەۋ، سەمەي قالاسىنىڭ ورتالىق ساياباعىن اباتتاندىرۋ، قىسقى جىلىتۋ ماۋسىمىنا دايىندىق جانە 2022 جىلعا تۇرعىن ءۇي قۇرىلىسىن جوسپارلاۋ ماسەلەلەرى بويىنشا كەڭەس وتكىزدى.
