Qurylys alańdaryn aralaý barysynda Danial Ahmetov mańyzdy áleýmettik nysandardyń qurylysy keste boiynsha júrip jatqanyna kóz jetkizdi. Stepnoidaǵy 300 oryndyq mektep jyl sońynda paidalanýǵa beriledi. Iaǵni, 3-shi toqsannan bastap oqýshylar jańa mekteptiń partasyna otyrady. Buryn Stepnoida mektep bolǵan joq. Balalar 10 shaqyrym jerdegi mektepke baryp oqityn.
– Áleýmettik nysannyń qurylysymen qatar aýdannyń kommýnaldyq máselesin de sheshemiz. Mektepke tartylatyn jylý qubyry Stepnoidyń kóp qabatty úilerin de jylýmen qamtamasyz etetin bolady. Ortalyqtan taratylatyn jylý júiesi turǵyndarǵa biyl jetedi, – dedi aimaq basshysy.
Vostochnyi shaǵyn aýdanynda 1200 oryndyq mektep salynyp jatyr. Ol da jyldyń sońyna qarai paidalanýǵa beriledi. Jaqyn kúnderi árleý jumystary bastalady. Qurylys barysynda energiiamen, jylýmen jáne sýmen qamtamasyz etý máseleleri týyndaǵan edi, biraq qazir barlyǵy sheshildi.
– Vostochnyidaǵy jańa mektepti jergilikti jurt asyǵa kútip júr. Óitkeni, ondaǵy eki mektepte de bala tolyq, shaǵyn aýdannyń halqy ósip keledi. Endi jańa mektep oqýshylarǵa qatysty biraz máseleni sheshedi. Búgin men Semei qalasynyń bilim bólimine mektep qajettiligin zerteýdi tapsyrdym. Eger qajettilik bar bolsa, biz 600 oryndyq taǵy bir tiptik mektep salýǵa daiynbyz, – dedi ákim.
Sondai-aq, Danial Ahmetov Semeidiń «Ortalyq» jylytý qazandyǵyn qaita jańǵyrtý jumysynyń barysyn baqylady. Munda jóndeý jumystary 75%-ǵa aiaqtalǵan. Qazir taǵy bir qazandyq ornatylatyn qosymsha nysannyń qurylysy júrip jatyr. Endi qazandyqtyń qýaty 84 Gkal-ǵa deiin artady.
Qurylysshylardyń aitýynsha, 26 jeltoqsan – Energetikter kúnine orai nysan paidalanýǵa beriledi. Semeidegi barlyq qazandyqty qaita jańǵyrtý oblys ákimniń jeke baqylaýynda bolady jáne júrgizilip jatqan jumystar qalany jylýmen qamtamasyz etýdiń basty máselelerin sheshýge múmkindik beredi.
Sondai-aq, «Beibitshilik» aralyna barǵan aimaq basshysyna Semei qalasy ákiminiń orynbasary Dimitrii Garikov araldy abattandyrý jobasyn tanystyrdy. Sonymen qatar, oblys basshysy perinataldyq ortalyqqa baryp, júrgizilgen kúrdeli jóndeý jumystarynyń nátijesin baǵalady.
Danial Ahmetov nysandardy aralap bolǵannan keiin qala joldaryn jóndeý, Semei qalasynyń ortalyq saiabaǵyn abattandyrý, qysqy jylytý maýsymyna daiyndyq jáne 2022 jylǵa turǵyn úi qurylysyn josparlaý máseleleri boiynsha keńes ótkizdi.
