2025 جىلدان باستاپ الماتىدا «Damubala» باعدارلاماسىنا وزگەرىستەر ەنگىزىلدى، - دەپ حابارلايدى Dalanews.kz الماتى قالاسى اكىمدىگىنىڭ رەسمي سايتىنا سىلتەمە جاساپ.
وفەرتا شارتىنىڭ مەرزىمى وزگەردى
ەندى جەتكىزۋشىلەرمەن كەلىسىمشارتتار جىل سايىن جاسالادى. 2025 جىلدىڭ 15-21 قاڭتارى ارالىعىندا ق ر «مادەنيەت تۋرالى» جانە «دەنە شىنىقتىرۋ جانە سپورت تۋرالى» زاڭدارىنا سايكەس مەملەكەتتىك سپورتتىق جانە شىعارماشىلىق تاپسىرىس قىزمەتتەرىن كورسەتۋشى جەتكىزۋشىلەردى قابىلداۋ جۇرگىزىلدى. 22 قاڭتار مەن 4 اقپان ارالىعىندا قولدانىستاعى جانە جاڭا جەتكىزۋشىلەردىڭ وتىنىمدەرى قاراستىرىلىپ، مەملەكەتتىك شىعارماشىلىق تاپسىرىستى ورنالاستىرۋ قاعيدالارىنا سايكەس باعالاندى.
سونىمەن قاتار، وفەرتا شارتىنا سايكەس، كەلىسىمشارتتار جىل سايىن قايتا جاسالادى. بۇل وزگەرىس ۆاۋچەرلەردى ءادىل بولۋگە، ۇدەرىستىڭ اشىقتىعىن ارتتىرۋعا جانە جەتكىزۋشىلەردىڭ جاۋاپكەرشىلىگىن كۇشەيتۋگە باعىتتالعان. بۇرىن وفەرتا شارتتارىندا مەرزىم بەلگىلەنبەيتىن. اۋدان اكىمدىكتەرى جەتكىزۋشىلەرمەن كەزدەسۋلەر وتكىزىپ، ەنگىزىلگەن وزگەرىستەر بويىنشا ءتۇسىندىرۋ جۇمىستارىن جۇيەلى تۇردە جۇرگىزىپ كەلەدى.
بالالار ساباقتارىن جالعاستىرادى
2025 جىلدىڭ باسىنان بەرى الماتىدا وفەرتا جاڭارتۋ ۇدەرىسى ءجۇرىپ جاتىر. دەگەنمەن، بارلىق جەتكىزۋشىلەر 2025 جىلدىڭ 1-21 قاڭتار ارالىعىندا كورسەتكەن قىزمەتتەرى ءۇشىن اقى الادى.
باعدارلاماعا قاتىساتىن بالالار ساباقتارىن جالعاستىرا بەرەدى
الماتى ءماسليحاتى 2025 جىلعا ارنالعان شىعارماشىلىق ۇيىرمەلەر مەن سپورتتىق سەكسيالاردى قارجىلاندىرۋعا 15،1 ملرد تەڭگە ءبولدى.
مىندەتىنە سالعىرت قاراعان جەتكىزۋشىلەر تىزىمنەن شىعارىلادى
الماتى قالاسىنىڭ قوعامدىق كەڭەسىمەن بىرلەسىپ، قىزمەت كورسەتۋشىلەردىڭ جۇمىسىنا مونيتورينگ جۇرگىزىلدى. ناتيجەسىندە، مىندەتىنە سالعىرت قاراعان جەتكىزۋشىلەر تۋرالى بارلىق مالىمەت قۇقىق قورعاۋ ورگاندارىنا جىبەرىلدى.
وسىلايشا، باعدارلامانى جۇزەگە اسىرۋدىڭ العاشقى كەزەڭى رەتىندە قازىرگى جەتكىزۋشىلەرمەن قايتا كەلىسىم جاساۋ جانە جاڭا وتىنىمدەردى قاراستىرۋ شارالارى قولعا الىندى. ءاربىر جەتكىزۋشى ءوز ينفراقۇرىلىمىنىڭ ۇيىرمە نەمەسە سەكسيا تۇرىنە قويىلاتىن تالاپتارعا سايكەستىگىن راستاۋعا ءتيىس.
ساباقتارعا قاتىسۋدى باقىلاۋ ەنگىزىلەدى
ۆاۋچەرلەر جەتكىزۋشىنىڭ بالانىڭ زاڭدى وكىلىمەن كەلىسىمشارتقا وتىرعانىنا قاراي 2025 جىلدىڭ سوڭىنا دەيىن بەرىلەدى. ودان كەيىن بالالاردىڭ ساباققا قاتىسۋىن ناقتىلاۋ ءۇشىن ارنايى جۇيەگە قوسىلۋ قاجەت. سونداي-اق، ۆاۋچەرلەر اي سايىنعى ليميت نەگىزىندە، بەلگىلى ءبىر سانىنا قاراي ۇلەستىرىلەدى. بىلتىر الماتىدا بالالاردىڭ ساباقتارعا ناقتى قاتىسۋىن راستاۋ ءۇشىن بيومەتريالىق سايكەستەندىرۋ (Face ID) جۇيەسى ەنگىزىلگەن بولاتىن. وسىعان بايلانىستى، 2025 جىلى جەتكىزۋشىلەرمەن كەلىسىمشارت جاساۋ كەزىندە بالالاردىڭ 100% Face ID جۇيەسىنە قوسىلۋى مىندەتتى شارت بولماق.
قالا اكىمدىگى تۇرعىنداردى تەك رەسمي اقپارات كوزدەرىنە، ياعني الماتى اۋداندارىنىڭ اكىمدىكتەرى باسقاراتىن باعدارلامانىڭ وپەراتورلارىنا سەنۋگە شاقىردى.
