چەرنوگوريا سوتى دينا ءتاڭسارىنى قازاقستانعا ەكستراديسيالاۋدان باس تارتتى، دەپ حابارلايدى Dalanews.kz.
قوردىڭ حابارلاۋىنشا، دينا ءتاڭسارى بوستاندىققا شىقتى. الدىن الا مالىمەت بويىنشا، چەرنوگوريا سوتى ونى قازاقستانعا ەكستراديسيالاۋدان باس تارتۋ تۋرالى شەشىم قابىلداعان.
"نەمولچي" قورىنىڭ باسشىسى دينا ءتاڭسارى چەرنوگوريادا 14 ساۋىردە ۇستالدى.
بۇل تۋرالى دينا ءتاڭسارى جەلىدەگى پاراقشاسىندا جازبا جاريالاندى. دينا ءتاڭسارى قاماۋعا الىنار الدىندا ۆيدەوۇندەۋ جازىپ ۇلگەرگەن.
"قۇقىق قورعاۋشىلاردى، سونداي-اق جەرگىلىكتى جانە حالىقارالىق بۇقارالىق اقپارات قۇرالدارىن بۇل جاعدايعا نازار اۋدارۋعا شاقىرامىز. قوسىمشا اقپارات قاجەت بولعان جاعدايدا، تومەندەگى WhatsApp ءنومىرى ارقىلى بايلانىسۋعا بولادى”، – دەلىنگەن جازبادا.
ءىىم 2024 جىلى نەمولچي.kz قورىنىڭ جەتەكشىسى دينا تاڭسارىگە التى قىلمىستىق ءىس بويىنشا ايىپ تاعىلعان، ونىڭ ەكەۋى الاياقتىقپەن بايلانىستى ەكەنىن حابارلاعان بولاتىن.
دينا سمايىلوۆا رەتىندە دە بەلگىلى تاڭسارىگە جالعان اقپارات تاراتتى، جەكە ومىرگە قول سۇعىلماۋشىلىق قۇقىعىن بۇزدى جانە الاياقتىقپەن اينالىستى دەگەن ايىپ تاعىلىپ وتىر. بۇل تۋرالى تەرگەۋ كەزىندە بەلگىلى بولعان.
ول باسقاراتىن نەمولچي.kz قورى نەگىزىنەن قازاقستاندا ايەلدەر مەن بالالارعا قاتىستى زورلىق-زومبىلىققا قارسى ۇگىت-ناسيحاتپەن اينالىسادى.
دەگەنمەن، تەرگەۋ بارىسىندا ءتاڭسارىنىڭ ىس-ارەكەتىندە سايكەسسىزدىكتەر بولعانى انىقتالدى. ياعني سوت-مەديسينالىق ساراپتامالار ونىڭ جازبالارىندا ايىپتاۋ باسىم ەكەنىن كورسەتەدى، بيلىك مالىمەتىنشە، ولار تەك سۋبەكتيۆ كوزقاراستارعا نەگىزدەلگەن.
ونىڭ ۇستىنە، بەلگىلى بولعانداي، ول 2021 جىلدان بەرى قازاقستاننان تىس جەردە تۇرىپ، زورلىق-زومبىلىق قۇرباندارىنا كومەك كورسەتۋ ماقساتىندا الەۋمەتتىك جەلىلەردى پايدالانىپ جۇرگەن.
ونىڭ ىشىندە كوزگە تۇسكەنى - 2023 جىلدىڭ ساۋىرىندە جاريالانعان جازبا. وقيعا وسكەمەندە وزىنە قول جۇمساعان قىزبەن بايلانىستى. ءتاڭسارى ودان كەيىنگى جازبالارىندا قىزدىڭ وتباسىنا كوڭىل ايتىپ، ارتىنشا پوليسيا مالىمدەمەسىنە سەنبەيتىنىن جەتكىزگەن. سالدارىنان كامەلەتكە تولماعان بالانىڭ دەنساۋلىعىنا زيان كەلتىرۋ جانە بۇزاقىلىق جاساۋ باپتارى بويىنشا قىلمىستىق ءىس قوزعالىپ، سوتقا جولداندى.
پوليسيانىڭ و باستاعى مالىمدەمەسىنە سەنبەگەن دينا ءتاڭسارى جابىرلەنۋشىنىڭ ادۆوكاتىنا دەپ 20 ميلليون تەڭگە (44 000 اقش دوللارى) كولەمىندە اقشا جيناۋدى باستاعان.
الايدا ونىڭ ءبىر بولىگى عانا قاجەت ماقساتقا جۇمسالعان. قارجىلىق ەسەپتەردى تالداۋ كەزىندە قورعا ارنالعان قاراجات ءتاڭسارىنىڭ كۇيەۋىنىڭ جەكە شوتىنا اۋدارىلىپ، ونىڭ شەتەلدەگى جەكە شىعىندارىنا جۇمسالعانى انىقتالعان.
وسىلايشا قۇقىق قورعاۋ ورگاندارى دينا تاڭسارىگە بىلتىر 27 جەلتوقساندا ىزدەۋ جاريالادى. بۇل جايتقا جاۋاپ رەتىندە ول Instagram-پاراقشاسىندا الاڭداۋشىلىعىن ءبىلدىرىپ، ءوز ىسىنە قاتىستى جەتى جابىرلەنۋشى بار ەكەنىن باسا ايتىپ، قازاقستان حالقىنان قولداۋ سۇرادى.
بىلتىر قاراشادا قور جەتەكشىسى جەكە شوتتارى بۇعاتتالا باستاعانىن، ال جەلتوقساندا شىعىس قازاقستان وبلىسى پوليسەيلەرى الاياقتىققا قاتىستى ايىپ تاققانىن ايتقان. وسىلايشا ول جانە كۇيەۋى المات مۇحامەدجانوۆ "نەمولچي.kz قىزمەتىنە بايلانىستى قۋعىنعا ۇشىرادىق" دەپ ەۋروپادان ساياسي باسپانا سۇراعان.
ايتا كەتەيىك، 2017 جىلى قۇرىلعان «نەمولچي.kz» قورى قايىرىمدىلىق ارقىلى قازاقستاندا ايەلدەر مەن بالالارعا قاتىستى زورلىق-زومبىلىقپەن كۇرەسۋمەن اينالىسادى. سوڭعى شىققان داۋلارعا قاراماستان، قور سوڭعى بەس جىل ىشىندە ادام زورلادى دەگەن 81 ادامنىڭ ۇستىنەن قىلمىستىق ءىس قوزعالۋىنا سەبەپ بولعان. قور جابىرلەنۋشىلەرگە قۇقىقتىق، پسيحولوگيالىق جانە مەديسينالىق كومەكتى، سونداي-اق جابىرلەنۋشىلەردى قورعاۋ ءۇشىن ءبىلىم بەرۋ باستامالارى مەن زاڭنامالىق ناسيحات جاعىنان ءارتۇرلى قولداۋ كورسەتەدى.
