سپيكەردىڭ حابارلاۋىنشا، حالىقتى جۇمىسپەن قامتۋ ورتالىعى جۇمىسىنىڭ باستى ماقساتى-جۇمىس ىزدەۋشىلەردى جۇمىسقا ورنالاستىرۋعا جانە جۇمىس بەرۋشىلەرگە كادرلاردى ىرىكتەۋگە جاردەمدەسۋ، سونداي-اق جۇمىسپەن قامتۋعا جاردەمدەسۋدىڭ بەلسەندى شارالارىن ىسكە اسىرۋ جانە جۇمىسسىزدىقتان الەۋمەتتىك قورعاۋدى ۇيىمداستىرۋ.
ساعىندىق كەنجەبايەۆ الماتىنىڭ جۇمىسپەن قامتۋ ورتالىعى "2021-2025 جىلدارعا ارنالعان كاسىپكەرلىكتى دامىتۋ جونىندەگى ۇلتتىق جوبانى" ىسكە اسىرۋ اياسىندا قانداي جۇمىس اتقارعانىن ايتتى.
بىرىنشىدەن، مەگاپوليستە جۇمىسسىزداردى كاسىپتىك وقىتۋ بەلسەندى ءجۇرىپ جاتىر.
وقىتۋ جۇمىس بەرۋشىلەردىڭ ءوتىنىشى بويىنشا وقۋ ورتالىقتارىندا جانە جۇمىس بەرۋشىلەردىڭ جۇمىس ورنىندا جۇرگىزىلەدى. وقۋ ۇزاقتىعى 6 ايعا دەيىن. جوباعا قاتىسۋشىلار وقۋ اقىسىن تولەۋ بويىنشا (50 مىڭ تەڭگە) مەملەكەتتىك قولداۋمەن، (20 949 تەڭگە) ستيپەنديامەن قامتاماسىز ەتىلەدى. وقۋ اياقتالعاننان كەيىن جۇمىس بەرۋشى جۇمىسسىزداردى العان ماماندىعى بويىنشا تۇراقتى جۇمىس ورنىنا (كەمىندە 12 اي مەرزىممەن) جۇمىسقا ورنالاستىرۋعا مىندەتتەنەدى.
"بيىل 25 ماماندىق بويىنشا 1002 ادامدى وقىتۋ جوسپارلانعان، بۇگىنگى تاڭدا كاسىپتىك وقىتۋ كۋرستارىنا 1003 ادام جىبەرىلدى، ونىڭ ىشىندە 659 ادام وقۋدى اياقتادى، 499 ادام العان ماماندىعى بويىنشا تۇراقتى جۇمىس ورىندارىنا ورنالاستىرىلدى"، - دەپ ستاتيستيكانى كەلتىردى س.كەنجەبايەۆ.
بۇدان باسقا، جاپپاي كاسىپكەرلىكتى دامىتۋ شەڭبەرىندە ايلىق ەسەپتىك كورسەتكىشتىڭ 400 ەسەلەنگەن مولشەرىنە دەيىن (1 225 200 تەڭگە) مەملەكەتتىك گرانتتار بەرۋ كوزدەلگەن - بۇل جاڭا بيزنەستى باستاۋ جانە دامىتۋ ءۇشىن قايتارىمسىز نەگىزدە بەرىلەتىن باستاپقى كاپيتال.
گرانت قاراجاتى ءىسىن جاڭا باستاعان جاس كاسىپكەرلەرگە، سونداي-اق جەكەلەگەن الەۋمەتتىك ساناتتارعا جاتاتىن ادامدارعا (29 جاسقا دەيىنگى جاس كاسىپكەرلەر، ااك جانە كوپ بالالى رەتىندە، اسىراۋشىسىنان ايىرىلعانعا بايلانىستى جاردەماقى الۋشىلار، قانداستار، مۇگەدەك بالانى تاربيەلەپ وتىرعان مۇگەدەكتىگى بار ادامدار) وزدەرىنىڭ بيزنەس-الەۋەتىن ىسكە اسىرۋعا، ءوندىرىستى جولعا قويۋعا جانە دامىتۋعا، سونىمەن قوسا ءوزىن تۇراقتى تابىسپەن قامتاماسىز ەتۋگە مۇمكىندىك بەرەدى.
ايتا كەتەيىك، گرانتتار كەلەسى باعىتتاردى دامىتۋعا عانا بەرىلەدى: قاجەتتى قۇرال-سايمانداردى، ەڭبەك قۇرالدارىن، تەحنولوگيالىق جابدىقتاردى، جانۋارلاردى، مالدى، قۇستى، كوشەتتەردى، بۇتالاردى، تۇقىمداردى، ساتىپ الۋ، ءۇي-جايدى جالعا الۋ اقىسىن تولەۋ.
گرانتتار تۇتىنۋ ماقساتتارىنا، كرەديتتىك قارىزداردى وتەۋگە، تۇرعىن ءۇي جىلجىمايتىن مۇلىگىن ساتىپ الۋعا جانە سالۋعا، جەر ۋچاسكەلەرىن ساتىپ الۋعا، اكسيزدەلەتىن ءونىم وندىرۋگە بەرىلمەيدى.
بۇگىنگى تاڭدا مەملەكەتتىك گرانتتاردى 483 ۇمىتكەر الدى. تاعى 1086 ۇمىتكەرگە بەرۋ جوسپاردا.
