Spikerdiń habarlaýynsha, halyqty jumyspen qamtý ortalyǵy jumysynyń basty maqsaty-jumys izdeýshilerdi jumysqa ornalastyrýǵa jáne jumys berýshilerge kadrlardy irikteýge járdemdesý, sondai-aq jumyspen qamtýǵa járdemdesýdiń belsendi sharalaryn iske asyrý jáne jumyssyzdyqtan áleýmettik qorǵaýdy uiymdastyrý.
Saǵyndyq Kenjebaev Almatynyń jumyspen qamtý ortalyǵy "2021-2025 jyldarǵa arnalǵan kásipkerlikti damytý jónindegi ulttyq jobany" iske asyrý aiasynda qandai jumys atqarǵanyn aitty.
Birinshiden, megapoliste jumyssyzdardy kásiptik oqytý belsendi júrip jatyr.
Oqytý jumys berýshilerdiń ótinishi boiynsha oqý ortalyqtarynda jáne jumys berýshilerdiń jumys ornynda júrgiziledi. Oqý uzaqtyǵy 6 aiǵa deiin. Jobaǵa qatysýshylar oqý aqysyn tóleý boiynsha (50 myń teńge) memlekettik qoldaýmen, (20 949 teńge) stipendiiamen qamtamasyz etiledi. Oqý aiaqtalǵannan keiin jumys berýshi jumyssyzdardy alǵan mamandyǵy boiynsha turaqty jumys ornyna (keminde 12 ai merzimmen) jumysqa ornalastyrýǵa mindettenedi.
"Biyl 25 mamandyq boiynsha 1002 adamdy oqytý josparlanǵan, búgingi tańda kásiptik oqytý kýrstaryna 1003 adam jiberildi, onyń ishinde 659 adam oqýdy aiaqtady, 499 adam alǵan mamandyǵy boiynsha turaqty jumys oryndaryna ornalastyryldy", - dep statistikany keltirdi S.Kenjebaev.
Budan basqa, jappai kásipkerlikti damytý sheńberinde ailyq eseptik kórsetkishtiń 400 eselengen mólsherine deiin (1 225 200 teńge) memlekettik granttar berý kózdelgen - bul jańa biznesti bastaý jáne damytý úshin qaitarymsyz negizde beriletin bastapqy kapital.
Grant qarajaty isin jańa bastaǵan jas kásipkerlerge, sondai-aq jekelegen áleýmettik sanattarǵa jatatyn adamdarǵa (29 jasqa deiingi jas kásipkerler, AÁK jáne kóp balaly retinde, asyraýshysynan aiyrylǵanǵa bailanysty járdemaqy alýshylar, qandastar, múgedek balany tárbielep otyrǵan múgedektigi bar adamdar) ózderiniń biznes-áleýetin iske asyrýǵa, óndiristi jolǵa qoiýǵa jáne damytýǵa, sonymen qosa ózin turaqty tabyspen qamtamasyz etýge múmkindik beredi.
Aita keteiik, granttar kelesi baǵyttardy damytýǵa ǵana beriledi: qajetti qural-saimandardy, eńbek quraldaryn, tehnologiialyq jabdyqtardy, janýarlardy, maldy, qusty, kóshetterdi, butalardy, tuqymdardy, satyp alý, úi-jaidy jalǵa alý aqysyn tóleý.
Granttar tutyný maqsattaryna, kredittik qaryzdardy óteýge, turǵyn úi jyljymaityn múligin satyp alýǵa jáne salýǵa, jer ýchaskelerin satyp alýǵa, aktsizdeletin ónim óndirýge berilmeidi.
Búgingi tańda memlekettik granttardy 483 úmitker aldy. Taǵy 1086 úmitkerge berý josparda.
