كەشە ازاماتتىق نەكەدەگى ايەلى سالتانات نۇكەنوۆانى ءولتىردى دەپ ايىپتالعان ەكس-مينيستر قۋاندىق بيشىمبايەۆقا سوت ۇكىمى شىقتى. بيشىمبايەۆتىڭ بۇرىنعى ايەلى نازىم قاھارمان سوت ۇكىمىنە قاتىستى پىكىر ءبىلدىردى، - دەپ حابارلايدى Dalanews.kz.

نازىم قاھارمان مەن قۋاندىق بيشىمبايەۆ 14 جىل وتاسقان، رەسمي نەكەدە بولعان. ولاردىڭ 3 بالاسى بار. ەرلى-زايىپتى 2020 جىلى، ەكس-مينيستر بۇرىنعى قىلمىستىق ءىسى بويىنشا كولونيادان بوساعاننان كەيىن ءبىر جىل وتكەن سوڭ اجىراسقان.

نازىم قاھارماننىڭ ايتۋىنشا، بۇل جايت ولارعا وڭاي تيمەگەن.

"ءبىر جاعىنان ايەل رەتىندە، وسى ەلدىڭ ازاماتى رەتىندە اشىق سوتتى قولدادىم، ويتكەنى بۇل پروسەستى قوعامنىڭ ساۋىعۋى مەن تەراپياسىنا قادام رەتىندە قابىلدايمىن. ەكىنشى جاعىنان، سوت بالالار مەن ماعان كۇيزەلىس بولىپ ءتيدى، ويتكەنى وندا ادامشوشىرلىق ءمان-جايلار بەلگىلى بولدى. بالالار مۇنى قابىلداپ، ءارى قاراي دا ءومىر ءسۇرۋى كەرەك. الەمدەگى بىردە-بىر بالاعا مۇنى تىلەمەيمىن. سوندىقتان ءبارى اياقتالعانىنا جەڭىلدەپ قالدىق"، - دەدى نازىم قاھارمان Tengrinews.kz-كە.

ول نۇكەنوۆتار وتباسىنا تاعى دا كوڭىل ايتتى.

"مەنىڭ ويىمشا، القابيلەر سوتى ءىستىڭ بارلىق اشىق جانە جابىق ماتەريالىن قاراپ، سانالى جانە دۇرىس شەشىم قابىلدادى"، - دەدى ول Tengrinews.kz-كە.

ايتا كەتەيىك، استانا قالاسىنىڭ مامانداندىرىلعان اۋدانارالىق سوتىندا قۋاندىق بيشىمبايەۆقا قاتىستى قىلمىستىق ءىس بويىنشا بىرنەشە سوت وتىرىسى ءوتتى. ونى ءدۇيىم جۇرت جوعارعى سوتتىڭ YouTube ارناسىنان ونلاين قارادى.

ازاماتتىق نەكەدەگى ايەلى سالتانات نۇكەنوۆانى ءولتىردى دەگەن ايىپپەن سوتتالىپ جاتقان ەكس-مينيستر قۋاندىق بيشىمبايەۆتى ادۆوكات لەيلا رامازانوۆا، نازكەن قۇسايىنوۆا، ەرلان عازىمجانوۆتار قورعادى.

ال مارقۇم سالتانات نۇكەنوۆانىڭ اعاسى ايتبەك امانگەلدى مەن ونىڭ وتباسىنىڭ ادۆوكاتتارى – جاننا ورازباحوۆا مەن ءاليا وماروۆا، يگور ۆرانچيەۆ.

27 ناۋرىزدا ەكس-مينيستر قۋاندىق بيشىمبايەۆتىڭ ءىسى بويىنشا القابيلەر تاڭدالعان ەدى. القابيلەر القاسىنا 12 ادام ىرىكتەلدى: 10 – نەگىزگى قۇرام، 2 – قوسالقى. سودان كەيىن اشىق سوت وتىرىستارى باستالدى. ال قۋاندىق بيشىمبايەۆ سوتتا سالتانات نۇكەنوۆانى اسا قاتىگەزدىكپەن ولتىرگەنىن مويىندامادى. بۇل وقيعا 2023 جىلى 9 قاراشادا استانا قالاسىنداعى BAU مەيرامحاناسىندا بولدى.

بيشىمبايەۆقا ەكى باپ بويىنشا ايىپ تاعىلدى:

• اسا قاتىگەزدىكپەن كىسى ءولتىرۋ (15 جىلدان 20 جىلعا دەيىن نەمەسە ءومىر بويىنا باس بوستاندىعىنان ايىرۋ)؛
• ازاپتاۋ (4 جىلدان 7 جىلعا دەيىن باس بوستاندىعىن شەكتەۋ نەمەسە وسى مەرزىمگە باس بوستاندىعىنان ايىرۋ).