رەسپۋبليكالىق ادۆوكاتتار القاسىنىڭ ءتوراعاسى ايدىن بيكەبايەۆ ارىپتەستەرىنە ۇندەۋ جولداپ، ادۆوكاتتار القالارى باسشىلارىنىڭ قاتىسۋىمەن ارنايى كەڭەيتىلگەن وتىرىس وكىزىلەتىنىن ءمالىم ەتتى، دەپ حابارلايدى Dalanews.kz.
جيىندا "بيشىمبايەۆ ىسىنە" باس سۇققان ادۆوكاتتاردى جاريا تالقىلاۋدى توقتاتۋ تۋرالى ماسەلە قوزعالماق. ونىڭ ايتۋىنشا، سوڭعى وقيعا ادۆوكاتتاردىڭ كاسىبي ادەبىنە نۇقسان كەلتىرۋدە.
"ادۆوكاتتاردى بيشىمبايەۆ ىسىنە قاتىساتىن ارىپتەستەرىن جاريا تالقىلاۋدى توقتاتۋعا شاقىرامىن. بۇل ارەكەتتەر كاسىبي ادەپ كودەكسىن بۇزۋعا اكەلۋى مۇمكىن. ءار نارسەنىڭ شەگى بولۋى كەرەك. ءاربىر ادۆوكات ادۆوكاتۋرانىڭ بەدەلىن ويلاۋى ءتيىس"، - دەدى ول.
وسى تۇستا ول الداعى ۋاقىتتا ادۆوكاتتار اراسىندا رەسپۋبليكا دەڭگەيىندە كەڭەيتىلگەن وتىرىس وتكىزىلەتىنىن اتاپ ءوتتى.
"رەسپۋبليكالىق ادۆوكاتتار القاسىنىڭ ءتورالقاسى الداعى كۇندەرى وسى ىسكە بايلانىستى بارلىق ماسەلە بويىنشا اۋماقتىق ادۆوكاتتار القالارى باسشىلارىنىڭ قاتىسۋىمەن ارنايى كەڭەيتىلگەن وتىرىس وتكىزەدى"، - دەپ ءسوزىن قورىتىندىلادى ول.
ادۆوكاتتىڭ جاريالاعان جازباسى كوپشىلىك تاراپىنان كەڭىنەن قولداۋ تاپتى. الەۋمەتتىك جەلى قولدانۋشىلارى مۇنىڭ دۇرىس شەشىم بولاتىنىن جارىسا جازۋدا. "تاعىلعان كىنانىڭ، جاسالعان قىلمىستىڭ اۋىرلىعىنا قاراماستان اركىمنىڭ قورعانۋ قۇقىعى، كىناسىزدىك پرەزۋمپسياسىنىڭ ساقتالۋىن تالاپ ەتۋ قۇقىعى بارىن زاڭگەرلەر ەستەن شىعارماۋى كەرەك"، "دۇرىس ايتاسىز، ايدىن جولشى ۇلى! مەن سىزبەن تولىق كەلىسەمىن، قولدايمىن! سوت پروسەسسىندە ايدان اشىق ءبىر جاقتى ءوتىپ جاتقانىن كورۋگە بولادى! ارينە، مەن ءوز باسىم سوتتالۋشى بيشىمبايەۆتى اقتاپ وتىرعانىم جوق، ءبىراق بۇل جەردە ادۆوكاتتاردىڭ قۇقىعى بۇزىلىپ وتىرعانى بەلگىلى!"، "كەي ءقازاقتىلدى ادۆوكاتتارىڭىز ۇنەمى حايپ قۋىپ، وسەك جازادىعوي فەيسبۋكتە، ادۆوكاتتىق ەتيكادان جۇرداي نە ءۇشىن سوندايلار باقىلاۋعا الىنىپ، ليسەنزياسىنان ايىرمايسىزدار؟ تالايدىڭ جەكە ءومىرىن جازىپ تاس تالقان ەتتى"، "وتە دۇرىس شەشىم! ۇيات، كۇلكى بولدىق جەر جۇزىنە!100 % قولدايمىن!"، - دەيدى ولار.
ايتا كەتەيىك، استانا قالاسىنىڭ مامانداندىرىلعان اۋدانارالىق سوتىندا قۋاندىق بيشىمبايەۆقا قاتىستى قىلمىستىق ءىس بويىنشا سوت وتىرىسى ءالى دە جالعاسىپ جاتىر. ونى ءدۇيىم جۇرت جوعارعى سوتتىڭ YouTube كانالىنان ونلاين تاماشالاۋدا.
ازاماتتىق نەكەدەگى ايەلى سالتانات نۇكەنوۆانى ءولتىردى دەگەن ايىپپەن سوتتالىپ جاتقان ەكس-مينيستر قۋاندىق بيشىمبايەۆتى ادۆوكات لەيلا رامازانوۆا، نازكەن قۇسايىنوۆا، ەرلان عازىمجانوۆتار قورعاپ جاتىر.
ال مارقۇم سالتانات نۇكەنوۆانىڭ اعاسى ايتبەك امانگەلدى مەن ونىڭ وتباسىنىڭ ادۆوكاتتارى – جاننا ورازباحوۆا مەن اليا وماروۆا.
ەسكە سالايىق، 27 ناۋرىزدا ەكس-مينيستر قۋاندىق بيشىمبايەۆتىڭ ءىسى بويىنشا القابيلەر تاڭدالعان ەدى. القابيلەر القاسىنا 12 ادام ىرىكتەلدى: 10 – نەگىزگى قۇرام، 2 – قوسالقى. سودان كەيىن اشىق سوت وتىرىستارى باستالدى.
سونىمەن قاتار، قۋاندىق بيشىمبايەۆ سوتتا سالتانات نۇكەنوۆانى اسا قاتىگەزدىكپەن ولتىرگەنىن مويىندامادى. بۇل وقيعا 2023 جىلى 9 قاراشادا استانا قالاسىنداعى BAU مەيرامحاناسىندا بولدى.
بيشىمبايەۆقا ەكى باپ بويىنشا ايىپ تاعىلدى: اسا قاتىگەزدىكپەن كىسى ءولتىرۋ (15 جىلدان 20 جىلعا دەيىن نەمەسە ءومىر بويىنا باس بوستاندىعىنان ايىرۋ)؛ قيناۋ (4 جىلدان 7 جىلعا دەيىن باس بوستاندىعىن شەكتەۋ نەمەسە وسى مەرزىمگە باس بوستاندىعىنان ايىرۋ).
سونداي-اق ونىڭ تۋىسى باقىتجان بايجانوۆ تا كۇدىكتى رەتىندە قاماۋعا الىندى. وعان قىلمىستىق كودەكستىڭ ەكى بابى بويىنشا ايىپ تاعىلعان. ناقتىراق ايتساق، 432-بابى (اسا اۋىر قىلمىستى جاسىرىپ قالۋ)؛ 434-بابى (اسا اۋىر قىلمىستى حابارلاماۋ).
