بەلگىلى زاڭگەر دجوحار وتەبەكوۆ قۋاندىق بيشىمبايەۆتىڭ سوت وتىرىسىنا قاتىستى پىكىر ءبىلدىردى، - دەپ حابارلايدى Dalanews.kz Nege.kz-كە سىلتەپ.
دجوحار وتەبەكوۆ سۋديا ايجان قۇلبايەۆانىڭ ارەكەتى دۇرىس ەمەس دەپ ەسەپتەيدى.
«سۋديا سالتانات نۇكەنوۆانىڭ ار-وجدانى مەن ابىروي-بەدەلىنە نۇقسان كەلەتىن ساۋالداردى قويۋعا جول بەردى. مارقۇم بولعان ادامنىڭ اتىنا كۇيە جاعىپ، قارالاۋعا بولمايدى. «ول ىشىمدىككە قۇمار، وتباسىلىق ەركەكپەن جۇرگەن، ءوزىن اگرەسسيۆتى ۇستايتىن، ءۇي شارۋاسىمەن اينالىسپايتىن» تاعىسىن تاعى دەگەن بيشىمبايەۆتىڭ پورترەتتىك سۋرەتتەمە جاساۋى تىم ارتىق. ال سۋديا بيشىمبايەۆ پەن ونىڭ قورعاۋشىلارىنا وسىلاي ايتۋعا نەگە رۇقسات بەرىپ قويدى؟
مۇنىڭ ءبارى القا بيلەردىڭ كوز الدىنا قايتىس بولعان جابىرلەنۋشى نۇكەنوۆانىڭ جاعىمسىز وبرازىن قالىپتاستىرىپ، بيشىمبايەۆتى «قۇربان» قىلىپ كورسەتۋى مۇمكىن. بۇل – سۋديانىڭ قاتەلىگى. كىم بولسا دا، ادام ولتىرۋگە قاقىسى جوق.
1 ءساۋىر كۇنگى وتىرىستا القابيلەردىڭ جابىرلەنۋشى تاراپقا قويعان سۇراعى دا اقىلعا قونىمسىز. سودان-اق ولاردىڭ بيشىمبايەۆتىڭ جاعىنا شىعىپ وتىرعانىن بايقاۋعا بولاتىنداي. جالپى، قىلمىستىق-پروسەسۋالدىق زاڭىنىڭ نورماسىنا سايكەس، سوت القابيلەر الدىندا ادامنىڭ جەكە تۇلعاسىنا قاتىستى جايتتار كوتەرىلمەۋى كەرەك. تەك سول وقيعا عانا تالقىلانۋى ءتيىس. زاڭ الدىندا، سوت الدىندا ادامنىڭ قۇقىعى بىردەي. بيشىمبايەۆتىڭ دا بۇل قايعىلى وقيعاعا دەيىن اگرەسسيۆتى، ىشىمدىككە اۋەس، بۇرىن ءىستى بولعانى ماڭىزدى ەمەس»، – دەيدى زاڭگەر Nege.kz سايتىنا.
سونىمەن قاتار، وتەبەكوۆ بيشىمبايەۆقا قاتىستى سوت وتىرىسىن ونلاين كورسەتۋدەگى باستى ماقسات نە ەكەنىن ايتتى.
ەڭ باستىسى، بۇل ءىستىڭ ساياساتقا ەشقانداي قاتىسى جوق. سول ءۇشىن بۇل ءىس بيلىككە قورقىنىشتى ەمەس. ونىڭ ۇستىنە قالاي بولعاندا دا سوتتالاتىن ادام. ءبىراق بيلىك بيشىمبايەۆتان مۇنداي «سيركتى» كۇتپەگەن شىعار، ءتىپتى سوت وتىرىسىنىڭ القابيلەرمەن بىرگە وتەتىنىن ويلاماعان دا بولۋى مۇمكىن. سەبەبى، سۋديا بيلىك نە ايتسا، سونىڭ ىعىمەن شەشىم قابىلدايدى. ال حالىق اراسىنان تاڭدالعان القابيلەردىڭ قانداي شەشىم شىعاراتىنى بيلىككە دە، بىزگە دە بەلگىسىز. سوت شەشىمىن سۋديا مەن 10 القا بي شىعارادى. شەشىم قابىلداۋعا 11 داۋىستان 6 داۋىس جەتكىلىكتى. ءتىپتى، بيشىمبايەۆتى اقتاپ، وعان جەڭىل جازا تاعايىنداۋى دا مۇمكىن. ونىڭ ىسىنە باسقاشا كۆاليفيكاسيالىق سارالاۋ بەرىلۋى دە ىقتيمال.
القابيلەر كاسىبي زاڭگەرلەر ەمەس، قوعامنىڭ قاراپايىم وكىلى. ولارعا ەموسيا كۇشتى اسەر ەتەدى. بيشىمبايەۆ ءارى قاراي دا ءجابىر كورگەن نۇكەنوۆانى قارالاپ، ءوزىن اقتاپ «جىلاي» بەرسە، القابيلەر دە جاناشىرلىق تانىتىپ، جازاسىن جەڭىلدەتۋى مۇمكىن، – دەيدى زاڭگەر.
سونداي-اق، وتەبەكوۆ بيلىك سۋديا مەن پروكۋروردىڭ باعاسىن تىم «اسىرىپ جىبەرگەن» سياقتى دەيدى.
«تاڭدالىپ الىنعان سۋديا مەن پروكۋرورىمىزدىڭ ءتۇرى وسىنداي. ءقازىر حالىق وسى سوت پروسەسىنىڭ قالاي ءوتىپ جاتقانىن تايعا تاڭبا باسقانداي كورىپ وتىر. جابىق ءوتىپ جاتقان سوت وتىرىستارىندا بۇدان وتكەن سوراقىلىققا كۋا بولىپ جۇرگەنىمىزدى ايتپاي-اق قويايىن. جالپى، بيلىكتىڭ سوت پروسەسىن تىكەلەي ەفيردە وتكىزۋ تۋرالى شەشىمى ورىندى.
وسى ارقىلى «بىزدە ادىلدىك بار» دەگەندى كورسەتكىسى كەلگەن شىعار. ءبىر جاعىنان بۇل حالىقتىڭ قۇقىقتىق مادەنيەتىن جوعارى دەڭگەيگە كوتەرەدى. سوت قالاي ءوتىپ جاتقانىن كورگەن جۇرت ساباق الادى دەپ ويلايمىن»، – دەپ تۇيىندەدى پىكىرىن.
