Belgili zańger Djohar Ótebekov Qýandyq Bishimbaevtyń sot otyrysyna qatysty pikir bildirdi, - dep habarlaidy Dalanews.kz Nege.kz-ke siltep.
Djohar Ótebekov sýdia Aijan Qulbaevanyń áreketi durys emes dep esepteidi.
«Sýdia Saltanat Núkenovanyń ar-ojdany men abyroi-bedeline nuqsan keletin saýaldardy qoiýǵa jol berdi. Marqum bolǵan adamnyń atyna kúie jaǵyp, qaralaýǵa bolmaidy. «Ol ishimdikke qumar, otbasylyq erkekpen júrgen, ózin agressivti ustaityn, úi sharýasymen ainalyspaityn» taǵysyn taǵy degen Bishimbaevtyń portrettik sýretteme jasaýy tym artyq. Al sýdia Bishimbaev pen onyń qorǵaýshylaryna osylai aitýǵa nege ruqsat berip qoidy?
Munyń bári alqa bilerdiń kóz aldyna qaitys bolǵan jábirlenýshi Núkenovanyń jaǵymsyz obrazyn qalyptastyryp, Bishimbaevty «qurban» qylyp kórsetýi múmkin. Bul – sýdianyń qateligi. Kim bolsa da, adam óltirýge qaqysy joq.
1 sáýir kúngi otyrysta alqabilerdiń jábirlenýshi tarapqa qoiǵan suraǵy da aqylǵa qonymsyz. Sodan-aq olardyń Bishimbaevtyń jaǵyna shyǵyp otyrǵanyn baiqaýǵa bolatyndai. Jalpy, qylmystyq-protsesýaldyq zańynyń normasyna sáikes, sot alqabiler aldynda adamnyń jeke tulǵasyna qatysty jaittar kóterilmeýi kerek. Tek sol oqiǵa ǵana talqylanýy tiis. Zań aldynda, sot aldynda adamnyń quqyǵy birdei. Bishimbaevtyń da bul qaiǵyly oqiǵaǵa deiin agressivti, ishimdikke áýes, buryn isti bolǵany mańyzdy emes», – deidi zańger Nege.kz saityna.
Sonymen qatar, Ótebekov Bishimbaevqa qatysty sot otyrysyn onlain kórsetýdegi basty maqsat ne ekenin aitty.
Eń bastysy, bul istiń saiasatqa eshqandai qatysy joq. Sol úshin bul is bilikke qorqynyshty emes. Onyń ústine qalai bolǵanda da sottalatyn adam. Biraq bilik Bishimbaevtan mundai «tsirkti» kútpegen shyǵar, tipti sot otyrysynyń alqabilermen birge ótetinin oilamaǵan da bolýy múmkin. Sebebi, sýdia bilik ne aitsa, sonyń yǵymen sheshim qabyldaidy. Al halyq arasynan tańdalǵan alqabilerdiń qandai sheshim shyǵaratyny bilikke de, bizge de belgisiz. Sot sheshimin sýdia men 10 alqa bi shyǵarady. Sheshim qabyldaýǵa 11 daýystan 6 daýys jetkilikti. Tipti, Bishimbaevty aqtap, oǵan jeńil jaza taǵaiyndaýy da múmkin. Onyń isine basqasha kvalifikatsiialyq saralaý berilýi de yqtimal.
Alqabiler kásibi zańgerler emes, qoǵamnyń qarapaiym ókili. Olarǵa emotsiia kúshti áser etedi. Bishimbaev ári qarai da jábir kórgen Núkenovany qaralap, ózin aqtap «jylai» berse, alqabiler de janashyrlyq tanytyp, jazasyn jeńildetýi múmkin, – deidi zańger.
Sondai-aq, Ótebekov bilik sýdia men prokýrordyń baǵasyn tym «asyryp jibergen» siiaqty deidi.
«Tańdalyp alynǵan sýdia men prokýrorymyzdyń túri osyndai. Qazir halyq osy sot protsesiniń qalai ótip jatqanyn taiǵa tańba basqandai kórip otyr. Jabyq ótip jatqan sot otyrystarynda budan ótken soraqylyqqa kýá bolyp júrgenimizdi aitpai-aq qoiaiyn. Jalpy, biliktiń sot protsesin tikelei efirde ótkizý týraly sheshimi oryndy.
Osy arqyly «Bizde ádildik bar» degendi kórsetkisi kelgen shyǵar. Bir jaǵynan bul halyqtyń quqyqtyq mádenietin joǵary deńgeige kóteredi. Sot qalai ótip jatqanyn kórgen jurt sabaq alady dep oilaimyn», – dep túiindedi pikirin.
