– جالپى ءبىزدىڭ قوجالىقتىڭ يەلىگىندە 8 گەكتار 16 سوتتىق سۋارمالى جەر بار. بيىل سونىڭ 3 گەكتارىنا قاربىز ەكتىك. العاشقى ءونىم كولەمى جامان بولعان جوق. قىرعىستاندىق كاسىپكەر كەلىپ، 20 توننانى كەلىسىنە 140 تەڭگەدەن تولەپ، ياكۋتياعا اكەتەمىن دەپ وتىر، – دەيدى قوجالىق ءتوراعاسى بورەحان ابىشيەۆ.
بيىل ماقتارال اۋدانىندا 19 500 گەكتارعا قاۋىن، 8 مىڭ 65 گەكتارعا قاربىز ەگىلگەن. ونىڭ ىشىندە ەرتە ەگىلگەن قاۋىن كولەمى 7800 گەكتاردى، ال قاربىز 5400 گەكتاردى قۇرايدى. اۋدان اكىمى جامانتاي بەيسەنبايەۆ "ءابىش-اتا" شارۋا قوجالىعىندا بولىپ، العاشقى ءونىمنىڭ ارتىلۋىنا كۋاگەر بولدى.
– ماقتارال اۋدانىنىڭ نەگىزگى كۇنكورىسى ەگىنشىلىك. سوندىقتان ماقتارالدىق ديقاندار كوكتەمنىڭ ءاربىر كۇنىن ءتيىمدى پايدالانۋدى ويلايدى. ەكى قاباتتى پلەنكاعا ەرتە پىسەتىن قاۋىن-قاربىز، باكلاجان، بالگارسكيي ەگەدى. بۇگىن مىنە، قاربىزىمىزدىڭ العاشقى ءونىمىن سوناۋ ياكۋتيا ەلىنە جونەلتكەلى وتىرمىز. بيىل ماقتارالدىق ديقانداردىڭ ءونىمى ءوتىمدى ءارى ءونىمدى بولادى دەگەن سەنىم بار، – دەيدى جامانتاي قاناي ۇلى.
مۇنان سوڭ ءوڭىر باسشىسى كاسىپكەر دەلدالدارمەن ارنايى كەزدەسىپ، سۇحبات قۇردى. قىرعىزستاندىق الىپساتار راۆشان حاكيموۆ 10 جىلدان بەرى ماقتارال اۋدانىنىڭ ديقاندارىمەن تىعىز قارىم-قاتىناستا جۇمىس ىستەپ كەلەدى ەكەن. الەمنىڭ ەڭ ءتاتتى قاۋىن-قاربىزى وسى جەردە وسەتىنىن ايتقان ول ماقتارالدىق ونىمدەرگە رەسەي فەدەراسياسى تاراپىنان سۇرانىس جوعارى ەكەنىن اتاپ ءوتتى.
– العاشقى قاربىز ءونىمىن رەسەيدىڭ ياكۋتيا قالاسىنا الىپ بارىپ ساتپاقشىمىز. وندا بارۋ ءۇشىن كەمىندە 10 كۇن جول جۇرەمىز. ديقانداردان قاربىزدىڭ كەلىسىن 140 تەڭگەدەن ساتىپ الۋدامىز جانە ول بىلتىرعى باعامەن سالىستىرعاندا قىمبات. ال، ياكۋتيادا باعانىڭ قالاي بولاتىنىن ءالى بىلمەيمىز. ماقتارالدىڭ قاۋىن-قاربىزى ەرەكشە ءتاتتى دامگە يە. سوندىقتان، رەسەيدە سۇرانىس وتە جوعارى، – دەيدى راۆشان حاكيموۆ.
كاسىپكەر دەلدالدارمەن بولعان كەزدەسۋىنەن سوڭ جامانتاي قاناي ۇلى "جانات" شارۋا قوجالىعىنا اتباسىن بۇردى. شارۋا قوجالىققا قاراستى 85 گەكتار جەر بار بولسا، بيىل سونىڭ 45 گەكتارىنا قاۋىن، 40 گەكتارىنا ماقتا ەگىلىپتى. قوجالىقتىڭ ءتوراعاسى ەرجان اساۋوۆ قاۋىننىڭ ەڭ ەرتە شىعاتىن "اەروپورت" سورتىن 70 كۇن بۇرىن ەگىپ، بۇگىن العاشقى ونىمدەرىن الۋدا ەكەن. سونداي-اق، ول قاۋىننىڭ كەلىسىن 400 تەڭگەدەن ساتىپ جاتقانىن ايتتى.
ايتا كەتەيىك، بىلتىر وڭتۇستىك قازاقستان وبلىسىنىڭ ديقاندارى 1 ميلليون 300 مىڭ توننا باقشا ونىمدەرىن وندىرسە، سونىڭ 631 مىڭ تونناسى ماقتارالدىق ديقاندارعا تيەسىلى بولاتىن.
https://dalanews.kz/36325
