قازاقستاندىق گروسسمەيستەر ءبيبىسارا اساۋبايەۆا ەڭ كوپ تابىس تاپقان ايەل شاحماتشىلاردىڭ ۇزدىك وندىعىنا ەندى. بۇل رەيتينگتى Forbes جاريالادى، دەپ حابارلايدى Dalanews.kz.
ساراپشىلاردىڭ ايتۋىنشا، شاحماتتا ايەل سپورتشىلاردىڭ تابىسى ءالى دە ەرلەردىڭ كىرىسىنەن تومەن. سوعان قاراماستان قازاقستاندىق شاحماتشى بيىلعى تىزىمدە جوعارى ناتيجەگە قول جەتكىزدى.
رەيتينگتە 21 جاستاعى ءبيبىسارا جەتىنشى ورىنعا تۇراقتادى. ول ءبىر جىل ىشىندە تۋرنيرلەردىڭ جۇلدە قورىنان 110 مىڭ دوللاردان استام تابىس تاپقان.
وتكەن ماۋسىمدا اساۋبايەۆا بليس شاحماتتان الەم چەمپيونى اتاعىن قايتا قورعاپ، Grand Swiss تۋرنيرىندە ءۇشىنشى ورىن الدى. سونداي-اق ول فريستايل تۋرىنا قاتىسقان العاشقى قىز اتانىپ، بۇل دا ونىڭ جىلدىق تابىسىنىڭ وسۋىنە ىقپال ەتتى.
ءتىزىمنىڭ كوشىن قىتايلىق شاحماتشى سزيۋي ۆەنسزيۋن باستاپ تۇر. ونىڭ تابىسى شامامەن 382 مىڭ دوللار. ال ۇزدىك وندىقتى ءۇندىستاندىق ديۆيا دەشمۋح 87 مىڭ دوللار ناتيجەمەن قورىتىندىلادى.
