قارجى ءمينيسترى ءاليحان سمايىلوۆ 2020 جىلى دۋبايدا وتەتىن ەكسپو كورمەسىنە قاتىساتىنداي جانە وعان 22 ملن دوللار جۇمسايتىنداي قازاقستانعا نە كورىنگەنىن ءتۇسىندىرىپ بەردى، دەپ حابارلايدى Dalanews.kz Sputnik-كە سىلتەمە جاساپ.
مينيستر اتاپ وتكەندەي، قازاقستان ۇكىمەتى 2025 جىلعا قاراي شەتەلدىك تىكەلەي ينۆەستيسيا كولەمىن 34 ملرد دوللارعا جەتكىزۋ مىندەتىن وزىنە جۇكتەپ وتىر. 2019 جىلى ونىڭ كولەمى 24 ملرد دوللاردى قۇراپتى.
"ءبىز تاعى 10 ملرد دوللار ينۆەستيسيا تارتقىمىز كەلەدى. ول ءۇشىن بىزگە 2020 جىلدىڭ 20 قازانىنان باستاپ 2021 جىلدىڭ 10 ساۋىرىنە دەيىن جارتى جىل بويى دۋبايدا وتەتىن ەكسپو كورمەسىنە قاتىسۋ كەرەك.
"مۇمكىندىكتەر" دەگەن تەحنولوگيالىق كلاستەر اياسىندا "قازاقستان" دەگەن پاۆيلون بولادى، وعان الەمنىڭ ءار تۇكپىرىنەن ينۆەستورلار كەلەدى. پاۆيلونداعى ۋاقىتشا قۇرىلىستار ءۇشىن 8،8 ميلليارد تەڭگە نەمەسە 22 ميلليون دوللار بولىنگەن"، - دەدى ۇكىمەت وتىرىسىنان شىققان سمايىلوۆ.
ونىڭ سوزىنشە، ەگەر شەتەلدىك ينۆەستورلار "قازاقستان" دەگەن پاۆيلوندى كورگەن سوڭ ەلگە قوسىمشا شەتەلدىك ينۆەستيسيالار كەلسە، بۇل بولىنگەن اقشامىز ءالى ەسەلەپ قايتادى، اشىلاتىن جاڭا وندىرىستەر، جۇمىس ورىندارى مەن سالىق ەسەبىنەن قازاقستان ۇتادى.
"قازاقستان ءۇشىن ول كورمەگە قاتىسۋ وتە ماڭىزدى، سول ءۇشىن وعان اقشا ءبولىندى"، - دەدى سمايىلوۆ.
ول ايتقانداي، بۇل پاۆيلون – ۇلتتىق، سوندىقتان وعان كەتەتىن اقشا رەسپۋبليكا بيۋدجەتىنەن ءبولىندى.
