Qarjy ministri Álihan Smaiylov 2020 jyly Dýbaida ótetin EKSPO kórmesine qatysatyndai jáne oǵan 22 mln dollar jumsaityndai Qazaqstanǵa ne kóringenin túsindirip berdi, dep habarlaidy Dalanews.kz Sputnik-ke silteme jasap.
Ministr atap ótkendei, Qazaqstan úkimeti 2025 jylǵa qarai sheteldik tikelei investitsiia kólemin 34 mlrd dollarǵa jetkizý mindetin ózine júktep otyr. 2019 jyly onyń kólemi 24 mlrd dollardy qurapty.
"Biz taǵy 10 mlrd dollar investitsiia tartqymyz keledi. Ol úshin bizge 2020 jyldyń 20 qazanynan bastap 2021 jyldyń 10 sáýirine deiin jarty jyl boiy Dýbaida ótetin EKSPO kórmesine qatysý kerek.
"Múmkindikter" degen tehnologiialyq klaster aiasynda "Qazaqstan" degen pavilon bolady, oǵan álemniń ár túkpirinen investorlar keledi. Pavilondaǵy ýaqytsha qurylystar úshin 8,8 milliard teńge nemese 22 million dollar bólingen", - dedi Úkimet otyrysynan shyqqan Smaiylov.
Onyń sózinshe, eger sheteldik investorlar "Qazaqstan" degen pavilondy kórgen soń elge qosymsha sheteldik investitsiialar kelse, bul bólingen aqshamyz áli eselep qaitady, ashylatyn jańa óndirister, jumys oryndary men salyq esebinen Qazaqstan utady.
"Qazaqstan úshin ol kórmege qatysý óte mańyzdy, sol úshin oǵan aqsha bólindi", - dedi Smaiylov.
Ol aitqandai, bul pavilon – ulttyq, sondyqtan oǵan ketetin aqsha respýblika biýdjetinen bólindi.
