ەلىمىزدە وندىرىلەتىن تاعام ونىمدەرى كولەمىن ارتتىرۋ جانە يمپورتتىق ازىق-تۇلىكتەردى ازايتۋ – پاندەميا كەزەڭىندە ەرەكشە سيپاتتاعى وتكىر ماسەلە بولعانى بەلگىلى. بۇل جايىندا مەملەكەت باسشىسى قاسىم-جومارت توقايەۆتىڭ جولداۋىندا «اۋىل شارۋاشىلىعىن دامىتپاي، باسەكەگە قابىلەتتى ەكونوميكا قۇرۋ مۇمكىن ەمەس» دەپ ايتقان بولاتىن.
– وسى باعىتتا بەرىلەتىن سۋبسيديالاۋ ەرەجەلەرى مال بورداقىلاۋ ورىندارىندا ءبىر مەزگىلدە كوپ مولشەردە مال باسىنىڭ بولۋىن تالاپ ەتەدى. ونىڭ تالاپتارىن كىشى شارۋاشىلىق تۇگىلى، ءىرى شارۋاشىلىقتاردىڭ ءوزى ورىنداي الماي وتىر، – دەدى اتاپ ءوتتى سەناتور.
قولدانىستاعى ەرەجەدە ءىرى قارا مالىن بورداقىلاۋ ورىندارىندا ءبىر مەزگىلدە 5000 باس مالدى ۇستاۋ كەرەك ەكەن. ەگەر قوراڭىزدا مۇنشاما باس مال بولماسا سۋبسيديا الامىن دەپ دامەلەنبەي-اق قويىڭىز.
دەپۋتات قاتال كونتينەنتالدى، قۇرعاق كليماتتى جاعدايىمەن ەرەكشەلەنەتىن، جەر ۇستىندە جارامدى سۋ كوزى جوققا ءتان اتىراۋ مەن ماڭعىستاۋ وبلىستارىنىڭ كاسىپكەرلەرى ءبىر مەزگىلدە 2000 باس ءىرى قارا سانىن 500 باسقا دەيىن ءتۇسىرۋ تۋرالى مينيسترلىككە ۇسىنىس ەنگىزىپىت. وكىنىشە وراي، اۋىل شارۋاشىلىعى مينيسترلىگى شارۋالاردىڭ ۇسىنىسىن قاراۋعا اسىقپاعان سىڭايلى. وسىدان كەيىنسەناتور عۇمار دۇيسەمبايەۆ بۇل ءىستى دەرەۋ ۇكىمەت باسشىسىنا جەتكىزۋدى ءجون كورىپتى.
جەرگىلىكتى جەردەن شابىلعان ءشوپ مال ازىعى ءۇشىن جەتكىلىكسىز بولۋىنا بايلانىستى مال شارۋاشىلىعىنا قاجەتتى قۇراما جەم مەن ازىقتىق ءدان ەلىمىزدىڭ استىقتى ايماقتارىنان ساتىپ الىنىپ، تاسىمالداناتىنى بەلگىلى. بۇل فەرمەرلەرگە قارجىلاي اۋىرتپالىق تۇسىرەتىنى ايتپاسا دا تۇسىنىكتى. دەپۋتاتتىڭ ايتۋىنشا، وسىنىڭ ءبارى شاعىن جانە ورتا بيزنەستىڭ دامۋىنا جانە ايماقتاردى جەرگىلىكتى ەت ونىمدەرىمەن قامتاماسىز ەتۋگە كەدەرگى كەلتىرۋدە.
دەپۋتات پالاتانىڭ جالپى وتىرىسىندا: «ەلىمىز بويىنشا جاڭا دامىپ كەلە جاتقان كىشى شارۋاشىلىقتاردى كوتەرۋ جانە ءوزىمىزدى تازا ساپالى ەت ونىمدەرىمەن قامتاماسىزۋ ەتۋ ءۇشىن بورداقىلاۋ الاڭدارىندا ءبىر مەزگىلدە تۇراتىن مال سانىن تومەندەتۋ قاجەت» دەيدى.
عۇمار دۇيسەمبايەۆتىڭ ايتۋىنشا، ەرەجەدە ءار وبلىستىڭ ەرەكشەلەگىن ەسكەرە وتىرىپ، ءارتاراپتاندىرۋ تۇرىندە قاراۋ قاجەت. جوعارىدا اتالعان ەكى وبلىستا ءبىر مەزگىلدە بورداقىلاۋعا تۇراتىن مال سانىن ەرەجەدە 500 باسقا دەيىن تومەندەتسە، وسى كاسىپپەن اينالىساتىن شارۋا قوجالىقتارى بىرتىندەپ اياققا تۇرعاننان كەيىن ءبىر مەزگىلدە ۇستايتىن مال سانىن ۇلعايتۋعا مۇمكىندىك بەرەدى.
