بريتاندىق Victoria Oil & Gas مۇناي-گاز كومپانياسى قازاقستانعا قارسى حالىقارالىق ينۆەستيسيالىق داۋلاردى رەتتەۋ ورتالىعىنا (ICSID) شاعىم ءتۇسىردى. ورتالىقتىڭ مالىمەتىنشە، ارىز 21 ناۋرىزدا تىركەلگەن، دەپ حابارلايدى Dalanews.kz.
Energy Monitor سالالىق Telegram-ارناسىنىڭ حابارلاۋىنشا، 2021 جىلدىڭ ساۋىرىندە كومپانيا قازاقستاندى سوتقا بەرەتىنىن مالىمدەپ، اتىراۋ وبلىسىنداعى كەمەركول كەن ورنىن بارلاۋ جانە مۇناي ءوندىرۋ كەلىسىمشارتىنىڭ بۇزىلۋىنا بايلانىستى جۇزدەگەن ميلليون دوللار تالاپ ەتپەك بولعان.
كانالدىڭ دەرەگىنە سۇيەنسەك، Victoria Oil & Gas 2005 جىلى كەمەركول كەن ورنىنداعى 100% ۇلەستى 8،5 ميلليون دوللارعا ساتىپ الىپ، بىرنەشە ۇڭعىما بۇرعىلاپ ۇلگەرگەن. الايدا 2008 جىلى ونىڭ جەر قويناۋىن پايدالانۋ جونىندەگى كەلىسىمشارتى توقتاتىلعان.
